1 Ilig 16.12-40Fo꞉l ne, a꞉la꞉ta꞉ga꞉ Timoti na꞉no꞉ Ya꞉su Kelisowa꞉ ene nanogdo꞉ dian kalu ko꞉lo꞉, naino꞉ mo꞉fo꞉s we sa꞉sa꞉la꞉sa꞉ga꞉, Filibai amisa꞉na iliga꞉to꞉l. Godeya꞉no꞉ kaluka꞉isale Ya꞉su Keliso amilo꞉ tilida꞉da꞉sa꞉ga꞉lo꞉ sab gimo꞉wo꞉lo꞉, sa꞉sdo꞉ bo꞉fo꞉lowan kaluka꞉isale gimo꞉wo꞉lo꞉, a꞉la꞉ta꞉ga꞉ digo꞉n kaluka꞉isale gimo꞉wo꞉lo꞉ tambo sa꞉sa꞉liga꞉to꞉l.

2 Do Gode o꞉lia꞉ Alan Ya꞉su Keliso o꞉lia꞉ma꞉ ha꞉fo꞉ disa꞉lan man a꞉no꞉lo꞉, ha꞉sa mesa꞉no꞉ man a꞉no꞉lo꞉ gi o꞉lia꞉ doma꞉ki dulugu so꞉lo꞉l.

3 Niyo꞉ gio꞉ ko꞉lo꞉ asula꞉likiyo꞉, ni Godemo꞉wo꞉ mada o꞉m a꞉la꞉bo꞉ ho꞉leno꞉ tambo sa꞉la꞉lo꞉l. 4 Gode eyo꞉ gio꞉ tambo asuwa꞉foma꞉kiyo꞉, ne sagalo꞉wo꞉ alan dofo꞉liki, a꞉na dulugu sa꞉la꞉lo꞉l. 5 Sagalo꞉ alan a꞉no꞉ mo꞉wo꞉ we. Gio꞉ to nafa a꞉no꞉ ho꞉gi tilida꞉dakiyo꞉ negele dowaki, nanogo꞉ ua dimida꞉li mio꞉. A꞉la꞉ta꞉ga꞉ o꞉g wenamio꞉lo꞉ nanog a꞉no꞉ ua o꞉dia꞉li ha꞉na꞉lo꞉l ko꞉lo꞉, ne mada sagalab. 6 1Kol 1.8Gode eyo꞉ nanog nafa a꞉no꞉ gi usamio꞉ mo꞉mo꞉dalifa꞉ ko꞉lo꞉, eyo꞉ nanog a꞉no꞉ dia꞉li ha꞉na꞉la꞉ga꞉, Ya꞉su Kelisowa꞉ ene ho꞉lendo꞉ fa꞉la꞉dowab a꞉nami kedefa꞉ib. Gode eyo꞉ nanog a꞉no꞉ dimidama꞉ib a꞉la꞉likiyo꞉, ne hendele tili asulo꞉l. 7 Niyo꞉ gimo꞉lo꞉ a꞉la꞉do꞉ asulo꞉l a꞉no꞉ mada nafale, mo꞉wo꞉ ho꞉leno꞉ tambowo꞉ gio꞉ ni asulo꞉ usa da꞉lab. Ne dibolo aya silikiyo꞉lo꞉, ne to nafa we hendele a꞉laki fanda wida꞉lo꞉likiyo꞉lo꞉, nio꞉ tambo Godeya꞉lo꞉ ha꞉fo꞉ disa꞉lab us a꞉na dofo꞉liki, ene nanogo꞉ ua dia꞉sen. 8 Ya꞉su Keliso elo꞉ ha꞉fo꞉ disa꞉ a꞉ma꞉yo꞉ ne digidalitabikiyo꞉, niyo꞉ gi ko꞉lo꞉ ba꞉ba꞉no꞉wo꞉ mada alan asulo꞉l. A꞉no꞉ hendele a꞉la꞉bo꞉ Godeya꞉ eneno꞉ ba꞉da꞉sa꞉ga꞉ asulo꞉.

9 A꞉la꞉fo꞉ko꞉lo꞉ niyo꞉ gio꞉ Godemo꞉wo꞉ a꞉la꞉dulugu sa꞉la꞉lo꞉l. Gio꞉ to hendele a꞉no꞉ fanda asulaki, towo꞉ dinafa aloba꞉ma꞉no꞉wo꞉ alan doma꞉ki, a꞉la꞉ta꞉ga꞉ ha꞉fo꞉ disa꞉lan man a꞉no꞉ gili mela꞉no꞉ usamio꞉ halaido꞉ dowa꞉i ha꞉na꞉melea꞉ki, dulugu so꞉lo꞉l. 10 1Tes 5.23A꞉la꞉fo꞉ko꞉lo꞉ a꞉no꞉ fa꞉la꞉dowab amio꞉, gio꞉ man digalo꞉wo꞉ welo꞉b a꞉la꞉bo꞉ alobana asuluma꞉ib. A꞉la꞉ta꞉ga꞉ Ya꞉suwa꞉ ene ho꞉lendo꞉ fa꞉la꞉doma꞉nigab a꞉namio꞉, gio꞉ halalo꞉ mo꞉dimido꞉, malilo꞉ elena ba꞉ba꞉ib. 11 Ya꞉su Kelisowa꞉ man digalo꞉ a꞉no꞉, fo hedalu aumbo꞉ gili mela꞉no꞉ usamio꞉ ililifoma꞉kiyo꞉, dulugu so꞉lo꞉l. Kaluka꞉isale nolba꞉yo꞉ gi amilo꞉ ilili alitab a꞉no꞉ ba꞉dakiyo꞉, Godeyo꞉ alanka꞉ a꞉la꞉liki iwalu wabudakiyo꞉ dulugu sa꞉ma꞉ib.

12 Ni nao nado i, to we gio꞉ fanda asuluma꞉ki asulab. Hida꞉yo꞉ nelo꞉ amilo꞉ fa꞉la꞉dowa꞉i ya꞉lab wema꞉yo꞉, to nafa walama꞉no꞉wo꞉ mo꞉ka꞉laki, walafo꞉ ko꞉ ha꞉na꞉melea꞉ki mada asuwa꞉takigab. 13 Ilig 28.30A꞉la꞉do꞉ ga꞉iya꞉lab a꞉na ilikiyo꞉, Sisaya꞉ ene da꞉la꞉di kaluwo꞉ a꞉la꞉ta꞉ga꞉ amisa꞉n kaluka꞉isale wenamilo꞉ sab iliyo꞉lo꞉, ne Ya꞉su Kelisowa꞉ ene nanog dian kalu ko꞉lo꞉ dibolowa sab a꞉la꞉bo꞉ tambo fanda asululiab. 14 A꞉la꞉ta꞉ga꞉ ne ko꞉lo꞉ dibolo amilo꞉ sab wema꞉yo꞉ tilidabu kalu nolo꞉ halaido꞉wo꞉ a꞉na di ko꞉lo꞉, iyo꞉ mo꞉tagilaki, Godeya꞉ to nafa a꞉no꞉ halale wida꞉lab.

15-16 Hendele, kalu nolba꞉yo꞉ ne asuwa꞉takiyo꞉, Kelisowa꞉ to hendeleyo꞉ ko꞉lo꞉ wida꞉lab. Godeya꞉ to nafa a꞉no꞉ hendeleka꞉ a꞉lakiyo꞉ niyo꞉ fanda walama꞉ki, ne dibolowa disa꞉lo꞉b a꞉la꞉bo꞉ iliyo꞉ asulab ko꞉lo꞉, iliyo꞉ nemo꞉wo꞉ ha꞉fo꞉ disa꞉fo꞉likiyo꞉, Godeya꞉ ene towo꞉ wida꞉lab. Ko꞉sega kalu nolba꞉yo꞉ ne wa꞉la꞉ sa꞉ndakiyo꞉, Kelisowa꞉ towo꞉ a꞉na wida꞉lab. 17 Kalu i a꞉ma꞉yo꞉ asulo꞉wo꞉ digalo꞉lo꞉ mo꞉iliki, inin wiyo꞉ ko꞉lo꞉ duludaki, Ya꞉suwa꞉ to a꞉no꞉ a꞉na wida꞉lab. Ne dibolowa sabiyo꞉, iliyo꞉ hida꞉yo꞉ nolo꞉ nemo꞉ a꞉dimia꞉no꞉ asulakiyo꞉ wida꞉lab. 18-19 2Kol 1.11Kalu nolo꞉ asulo꞉wo꞉ digalo꞉ iliki widalikiyo꞉lo꞉, nolo꞉ asulo꞉wo꞉ mogago꞉ iliki widalikiyo꞉lo꞉, man a꞉la꞉ a꞉no꞉ ne mo꞉kele asuluma꞉no꞉. Ililo꞉ Ya꞉su ko꞉lo꞉ wida꞉lab a꞉no꞉ alandeyo꞉ o꞉m ko꞉lo꞉, ne mada sagalo꞉wo꞉ alan dowab.

Gililo꞉ ne asuwa꞉foma꞉kilo꞉ dulugu sa꞉la꞉sen a꞉no꞉lia꞉, Ya꞉su Kelisowa꞉ ene Mamaya꞉lo꞉ asuwa꞉tan a꞉no꞉lia꞉ma꞉yo꞉, ne nafaya sili handaloma꞉ki auma꞉ib. Ne a꞉no꞉ asulo꞉ ko꞉lo꞉, mada sagala꞉liki dia꞉mela꞉no꞉. 20 Nilo꞉ mada alan tili asulakilo꞉ yasilo꞉lo꞉ we. Ne Godeya꞉ nanog diakiyo꞉, ne mo꞉sendeloma꞉no꞉ asulo꞉l. O꞉g wenamio꞉lo꞉ tif amio꞉lo꞉, ne mela꞉no꞉ o꞉silikiyo꞉lo꞉, ne sowalikiyo꞉lo꞉, nilo꞉ dimido꞉ a꞉ma꞉yo꞉ Kelisowa꞉ wiyo꞉ ko꞉lo꞉ wabuluma꞉ki, ne halale kagama꞉no꞉ asulo꞉l. 21 Gala 2.20Niyo꞉ a꞉la꞉asulab. Ne mela꞉no꞉ o꞉silikiyo꞉, mela꞉no꞉ mo꞉wo꞉ Keliso e. A꞉la꞉ta꞉ga꞉ ne sowalikiyo꞉lo꞉, kelego꞉ nafaleyo꞉ a꞉na mada fa꞉la꞉doma꞉ib. 22-23 2Kol 5.8Ne henfelo꞉ wenamio꞉ o꞉silikiyo꞉, Godeya꞉ nanogo꞉ dimidakiyo꞉, fo nafale fa꞉la꞉do alifa꞉no꞉. Ko꞉sega niyo꞉ soma꞉no꞉ tog amiya꞉le, mela꞉no꞉ tog amiya꞉le, o꞉bamida꞉ kudu ha꞉na꞉nigo꞉ba꞉le babalab ko꞉lo꞉, ne amio꞉ asulo꞉wo꞉ a꞉la꞉ dowaki, tadowo꞉lab. Asulo꞉ alan nilo꞉ da꞉labo꞉ we. Ne sowa꞉sa꞉ga꞉ ha꞉nakiyo꞉, Keliso o꞉lia꞉ doma꞉no꞉ asulab. E o꞉lia꞉ doma꞉no꞉wo꞉ mada nafale a꞉lab ko꞉lo꞉, nolo꞉ a꞉ma꞉ tinio꞉ ko꞉lo꞉lab. 24 Ko꞉sega niyo꞉ gi ko꞉lo꞉ asuwa꞉ta꞉liki ha꞉na꞉melea꞉kiyo꞉, ne bo꞉ebo꞉ mo꞉sowaki, mela꞉no꞉wo꞉ o꞉dofo꞉lalega, a꞉no꞉ o꞉li a꞉la꞉asulo꞉l. 25 A꞉la꞉fo꞉ko꞉lo꞉ no꞉no꞉n asulakiyo꞉, ne o꞉mesa꞉no꞉ a꞉la꞉asulo꞉. Gili tilidabuwo꞉ halaido꞉ dowaki, a꞉la꞉ta꞉ga꞉ gio꞉ sagalo꞉wo꞉ alan doma꞉kiyo꞉, ne gi o꞉lia꞉ doma꞉nigo꞉l. 26 Ne wa꞉ka gilo꞉wa ya꞉ga꞉ dowalikiyo꞉, nanog nilo꞉ dimido꞉ a꞉na a꞉la꞉ta꞉ga꞉yo꞉, gio꞉ Ya꞉su Kelisowa dowalikiyo꞉ mada sagalema꞉ib.

27 A꞉fe 4.1,1Tes 2.12Gililo꞉ wa꞉la꞉b dimidama꞉no꞉wo꞉ we. Man gililo꞉ dimidama꞉no꞉ a꞉no꞉, Kelisowa꞉ ene to nafa o꞉lia꞉yo꞉ ego꞉le dowab a꞉no꞉ ko꞉lo꞉ kudu ha꞉na꞉bi. Giliyo꞉ a꞉la꞉dimidalikiyo꞉, ne gilo꞉wa ya꞉sa꞉ga꞉ ba꞉dalikiyo꞉lo꞉, ne mo꞉yalikiyo꞉lo꞉, gio꞉ asulo꞉ imilise dowaki, tilidabu gililo꞉wo꞉ halale o꞉ta꞉lisab a꞉la꞉do꞉ sa꞉lab a꞉no꞉ko꞉ da꞉ba꞉no꞉. A꞉la꞉ta꞉ga꞉ gio꞉ ua gasa dowaki, kaluka꞉isaleyo꞉ to nafa a꞉namio꞉ tilidabuma꞉ki, wida꞉laka꞉ a꞉la꞉do꞉ sa꞉labo꞉ da꞉ba꞉no꞉. 28 Gio꞉ gis kalu i a꞉no꞉ ba꞉da꞉ga꞉yo꞉, mada mo꞉tagilaki halale kagama꞉ib ko꞉lo꞉, man gililo꞉ dimidab a꞉ma꞉yo꞉ imo꞉ widakiyo꞉, Gode eyo꞉ iyo꞉ yasalaki, gio꞉ a꞉ma꞉la꞉ gasilia꞉ib a꞉la꞉liki widaki gab. 29 Ilig 16.19-40Gode eyo꞉ gio꞉ Kelisowa꞉lo꞉ tilidabu a꞉na doma꞉ki da꞉feyo꞉, ko꞉sega tilidabu imilig ko꞉mba. Gio꞉ Ya꞉suwa tilidabu amilo꞉ hida꞉yo꞉ dian a꞉no꞉lo꞉ gio꞉ dima꞉ki go꞉. 30 Tamin amilo꞉ hida꞉yo꞉ ne amilo꞉ fa꞉la꞉dowabikilo꞉ gilo꞉ ba꞉ba꞉ a꞉no꞉, a꞉la꞉ta꞉ga꞉ o꞉go꞉lo꞉ ne amilo꞉ o꞉fa꞉la꞉dowa꞉i ya꞉lab amilo꞉ gilo꞉ dabu a꞉no꞉, gio꞉lo꞉ hida꞉yo꞉wo꞉ o꞉leo꞉ngo꞉ka dia꞉i ha꞉na꞉lab.