13
God sabe gep ram waƚ gɨnab, a ga
(Mad 24:1-2; Luk 21:5-6)
Jisas God sabe gep ram u arö göm höŋ arö nɨŋöl gɨ, bɨ nɨpe ap nɨp haga, “Manö hag ñeb bɨ. Kabö aij udöm, ram aij gɨla i nöŋ!” a ga. Hageia, Jisas haga, “Ne kabö ram kub anɨbu nɨŋö, aij gö hagabön ar? Hainö ram anɨb i pa jö ma jö gɨ yulö, kabö ap, kabö ap adö au mɨdageinab; böŋ nöp pɨral yunab,” a ga. * Luk 19:44
Mɨŋör ugalöm uɫham mɨdeinaböl, a ga
(Mad 24:3-14; Luk 21:7-19)
Jisas anɨg hagöm, God sabe gep ram u arö göm, Olip Dum ara. God sabe gep ram u nö lau mɨdöp, Olip Dum nö lai mɨdöp. Jisas Olip Dum au asɨk mɨdö nɨŋöl göm, Pida, Jon, Jems, Edru kale yam apöm nɨp hagla, “Nan hagajan u, ñɨn mai rö gɨnab? Pen nan nɨhön rö gö nɨŋun hagnabun, ‘Nan anɨb gau mɨñi gɨnɨg gab,’ a gɨnabun?” ö gɨla. Hageila, Jisas kalɨp haga, “Nɨŋ aij gɨmim, manö piral haglö udagmim! Nɨbi bɨ iru nöp apöm, pir alöm, hib yad u udöl gɨ, hagnaböl, ‘Yad Jisas nöp auabin,’ a gɨnaböl. Anɨg haglö, nɨŋö hagaböl, a gɨmim, nɨŋagmim. ‘Ram mɨnöŋ gai i pen pen gaböl, ram mɨnöŋ gau pen pen gaböl,’ a gaiöl, gasɨ iru nɨŋagmim. Nan anɨb gau gɨnab u pen uri ram mɨnöŋ iƚ i nan gau magöŋhalö pɨs gɨnab, a gɨmim, gasɨ u nɨŋagmim. Nɨbi bɨ mɨgan rɨmnap uraköm, nɨbi bɨ mɨgan rɨmnap aip pen pen gɨnaböl. Kiŋ mɨgan rɨmnap uraköm, kiŋ mɨgan rɨmnap aip pen pen gɨnaböl. Ram mɨnöŋ gau magöŋhalö munmon udöm, kɨyö kub yabɨƚ apöm gɨnab. Nan gɨnab anɨb gau, nɨbi gau kalɨp nöd ñɨ pai ñɨŋajɨp, hainö ñɨ pai rɨkpal rö u gɨnab. Pen kale nɨŋ aij gɨmim mɨdaimim. Ñɨn rɨmnap kalöp dam Juda kansol bɨ gau kalɨp ñɨlö, manö kub hagnaböl. Ñɨn rɨmnap, Juda magum gep ram raul gau, ur udöm, kalöp paknaböl. Ñɨn rɨmnap, Jisas bɨ nɨpe, a göm, kalöp dam gapman bɨ kub abe kiŋ abe mɨdeinaböl au amöm, manö kub hagnaböl. Pen anɨg ud araiöl u, manö aij yad u gapman bɨ kub gau abe, kiŋ gau abe kalɨp hag ñɨnabim. * Mad 10:17-20 10 Pen nöd manö aij yad u, nɨbi bɨ ram mɨnöŋ ke gau gau magöŋhalö hag ñɨlö arnab nɨŋöm ñɨn hain hagpin u aunab.
11 “Pen kalöp manö kub hagnɨg ud araiöl u, manö pen aigöl gɨ hagun, a gɨmim, gasɨ iru nɨŋagmim. Hagnɨg gɨpe nɨŋöl gɨ, Ana Uɫ kalöp gasɨ aij ñö, hagnabim. Manö anɨbu kale ke hagagnabim; Ana Uɫ nɨpe ke hagnab. * Luk 12:11-12 12 Ñɨn anɨbu, mam bɨ gau uraköm, mam rɨmnap kalɨp al paklaŋ, a göm, kain gɨ dam bɨ manö nɨŋeb bɨ gau ñɨmagö adö kalɨp ñɨlö, al pak lɨnaböl. Nap bɨ gau uraköm, ñɨ pai kale ke gau kalɨp al pak lɨlaŋ, a göm, kain gɨ dam bɨ manö nɨŋeb bɨ gau ñɨmagö adö kalɨp ñɨlö, al pak lɨnaböl. Ñɨ pai gau uraköm, nɨme nap bɨ kalɨp nɨŋlö, mulu lugö, kalɨp al pak lɨlaŋ, a göm, kain gɨ dam bɨ manö nɨŋeb bɨ gau ñɨmagö adö kalɨp ñɨlö, al pak lɨnaböl. * Mad 10:21 13 Yad lau adö mɨdeinabim u nɨŋöm kalɨp mulu kal nɨŋnaböl u pen kale nɨbi bɨ an an, kƚö gɨmim yɨp arö gagmim, cɨg gɨmim nöp mɨdeinabim gau, ñɨn hain hagpin u aueinab, God kalöp ud kamɨŋ yunab,” a ga. * Mad 10:22; Jon 15:21
Hainö nan naij yabɨƚ waiö lɨnab, a ga
(Mad 24:15-28; Luk 21:20-24)
14 “Pen nan hil asɨ masɨ gep u, ka nɨpe aragep au am uraköl mɨdeinab, nɨŋnabim u, kale nɨbi bɨ ram mɨnöŋ Judia mɨdeinabim gau, yɨŋɨd pɨñɨŋ gɨ nö ilö gau armim. (Kale nɨbi bɨ manö i uri nöp amgö lɨ nɨŋabim gau, manö iƚ u rɨk nɨŋ aij gɨmim.) * Dan 9:27; 11:31; 12:11 15 Nɨbi bɨ ram adö laŋ mɨdeinabim gau, nan yad rɨmnap udnam, a gɨmim, ado gɨ ram raul aragmim. * Luk 17:31 16 Nɨbi bɨ wög naböŋ gau ajeinabim gau, waƚɨj mɨlö yad ap udnam, a gɨmim, ado gɨ ram aragmim. 17 Pen ñɨn anɨbu, nɨbi ñɨ mudun halö mɨdeinaböl gau abe, nɨbi ñɨ paiŋaŋ ci ñeinaböl gau abe, uɫham yabɨƚ pɨñɨŋ gɨ arnaböl. * Luk 23:29 18 Nan gɨnab anɨbu, God nɨp sabe gɨmim, ram yɨgön göp ñɨn u gagnɨm, a gɨmim. 19 Nɨhön gɨnɨg: God hadame dagol gau ram mɨnöŋ gɨ la ñɨn u rɨköm, mɨd damöm mɨñi mɨdpun ñɨn i, nan naij anɨbu rö ap gaga; hainö gau u rö nöp nan naij anɨbu rö ap gagnab. * Dan 12:1 Rep 7:14 20 Nan naij anɨbu pör gɨböp, nɨbi bɨ magöŋhalö um hakblap. Pen Bɨ Kub nɨpe nɨbi bɨ nɨpe udnab gau kalɨp gasɨ nɨŋöm, wasö gö me, nan naij anɨbu yöp magö ap gɨnab.
21 “Ñɨn anɨbu nɨbi bɨ rɨmnap kalöp hagnaböl, ‘Nɨŋim! Krais mɨdöp i! Krais mɨdöp daŋ!’ a gɨnaböl u pen nɨŋö hagaböl, a gɨmim, nɨŋagmim. 22 Nɨbi bɨ rɨmnap, God nɨbi bɨ nɨpe ke hag la gau kalɨp udun, a göm, piral hagöm hagnaböl, ‘Yad me Krais; yad me bɨ God manö hagep ap,’ a göm, nan gagep rö rɨmnap gɨnaböl. Pen God nɨbi bɨ nɨpe ke hag la gau udagnaböl, wasö. * Rep 13:13 23 Anɨb u, nɨŋ aij gɨmim. Nan nɨhön nɨhön hainö gɨnab u, yad kalöp hagnö nɨŋbim u me, nɨŋ aij göl gɨ mɨdaimim.
Jisas hainö ado gɨ aunab
(Mad 24:29-31; Luk 21:25-28)
24 “Pen mɨŋör kub anɨb gau gɨ hakö nɨŋöl gɨ, sɨdö u sɨb göm, rakɨn u mailö gagnab. 25 Gapɨ gau kumi kabö adö laŋ nɨbö pɨg ju lug auö nɨŋöl gɨ, nan kumi kabö adö laŋ mɨdöp gau, gɨdaŋ nɨbö gai nɨbö gɨnab. * Ais 13:10; Joe 2:10,31; 3:15; Rep 6:12-13 26 Ñɨn anɨbu, Bɨ Ñɨ nɨpe pɨdöŋ ke yabɨƚ udöm, mailö aij unbö ke halö kumi bad aŋ au auö nɨŋöl gɨ, nɨbi bɨ nɨp nɨŋnaböl. * Rep 1:7 27 Pen ejol nɨpe gau hag yuö ram mɨnöŋ ke gau gau magöŋhalö rɨgoŋ rɨgoŋ gau amöm, nɨbi bɨ nɨpe ke hag la gau uɫ göm nɨp daunaböl. * Mad 13:41; Mak 13:32
Mab sɨƚɨp lɨnab
(Mad 24:32-35; Luk 21:29-33)
28 Jisas haga, “Kale mab rauan gau nɨŋnabim u, manö hagabin i nɨŋ aij gɨnabim. Mab rauan gau sɨƚɨp löm, pɨdöŋ gö nɨŋöl gɨ, mɨñi sɨdö lɨnɨg gab, a gɨmim nɨŋbim. 29 Anɨb u rö, hainö nan hagpin gau gö nɨŋöl gɨ, ‘Mɨñi söl mɨdöp, Jisas haga rö gɨnɨg gab,’ a gɨmim nɨŋnabim. 30 Yad hagabin u gasɨ nɨŋöl gɨ mɨdaimim. Nɨbi bɨ mɨñi mɨdpal gau rɨmnap mɨdlö nɨŋöl gɨ, nan anɨb gau gɨ hakö, hainö umnaböl. 31 Kumi kabö adö laŋ abe, mɨnöŋ naböŋ iƚ i abe ur gɨnab; pen manö magö yad gau ur gagnab; pör pör nöp mɨdeinab.
Ñɨn mai aunabin u bɨ ap nɨŋagöp, a ga
(Mad 24:36-44; Luk 17:26-30,34-36)
32 “Ñɨn mai aka magö mai aunabin u, nɨbi bɨ rɨmnap nɨŋagpal, ejol gau nɨŋagpal, yad u rö nöp nɨŋagpin; Bapi nöp nɨŋöb. 33 Anɨb u me, ñɨn mai aunabin u nɨŋagpim rö, pör pör nɨŋ aij yabɨƚ göl gɨ mɨdaimim.
34 “Aunabin ñɨn anɨbu, aiud hagnɨg gabin i rö. Bɨ kub ap ram nɨpe u arö göm mɨgan ap arnɨg göm, bɨ wög gep nɨpe gau kalɨp wög adö ke ke hag löm, ‘Wög anɨg anɨg gɨmim,’ a göm, bɨ nɨpe ajöŋ iƚ abad mɨdeinab u nɨp hagnab, ‘Nɨŋ aij yabɨƚ gɨmön mɨdaimön,’ a göm, arnab. 35 Kale u rö nöp, magö mai bɨ ram nap nɨbö u aunab u nɨŋagpim rö, nɨŋ aij gɨmim mɨdaimim. Dugo magö u aunab aka, sɨbön aŋ kub yaŋ aunab aka, kɨƚakɨƚ wɨñ alnab magö u aunab aka, hilɨm halö aunab, a gɨmim, nɨŋagpim. * Luk 12:38 36 Kale hanbe nɨŋöl gɨ, yɨŋɨd aunɨm rö löp u me, nɨŋ aij gɨmim mɨdaimim. 37 Pen kalöp nöp hagagabin; nɨbi bɨ gau magöŋhalö u rö nöp hagabin, nɨŋ aij gɨmim mɨdaimim!” a ga.

*13:2: Luk 19:44

*13:9: Mad 10:17-20

*13:11: Luk 12:11-12

*13:12: Mad 10:21

*13:13: Mad 10:22; Jon 15:21

*13:14: Dan 9:27; 11:31; 12:11

*13:15: Luk 17:31

*13:17: Luk 23:29

*13:19: Dan 12:1 Rep 7:14

*13:22: Rep 13:13

*13:25: Ais 13:10; Joe 2:10,31; 3:15; Rep 6:12-13

*13:26: Rep 1:7

*13:27: Mad 13:41; Mak 13:32

*13:35: Luk 12:38