4
Pita Ka Ioni Ai Vitana Matana
1-2 Ka apaina, Pita ka Ioni ivonavona yoko wayahia, ka tau vi‑nomu mata‑genai, ka Manua Vito‑pota a tau nau‑havia a tau veimea ananina, ka kadu Sadusi yoko yai maga‑bawei nui iomo ainuai wayahia, ipoyꞌ‑avini. Taui imaga‑bawe iuna Pita ka Ioni yokoia iviwavenei Iesu anigea mini‑havine, kadu aituhu memeanina Yaubada Iesu si‑vi‑mini‑havine, akanai memeanina Yaubada kadu mani tomotau na‑si‑vi‑mini‑havine deina.aTuta tanoi wayahina tau vi‑nomu ananina, kadu tau vi‑nomu mata‑genai habuhabui Sadusi yai yoko wayahia. Ka Sadusi yai yoko Manua Vito‑pota a tau nau‑havia iveimeyei. Wayahina, taui imaga‑bawe, iuna Sadusi habuhabui eha mini‑havine itꞌ‑awaehe, kate ivitumahana tutana tomotau ianiga, akanai, eha kadu aitam aviani apaina vinꞌ‑omo ivaniahe. Ka kadu imaga‑bawe, iuna Pita ka Ioni yai nau‑wahe wayahina taui yai vitumahana ivi‑goyoi deina. 3-4 Ka habuhabui yokoia nihenina ainuai yai nau‑wahe inononi, ka nau‑wahena ivitumahanei. Ka taui ivi‑tau ekalesia, ka tau ekalesia ononotoi ai yau ivanevane 5000 deina. Kate tau veimea inuanua viwavene‑nana goyona. Wayahina, yai nuanua Pita ka Ioni ainuai ineiei vitana matana wayahina, kate babau avaha ionu. Wayahina, manua yohona nihenina itotohi ipotapota mana na‑navi wayahina.✡Dew 2:41.
5-6 Ka mana navia, tau veimea habuhabui inau‑hohona Ierusalem wayahina vitana matanana wayahina.aTau veimea yoko taina inau‑hohona ai yau 70. (Edu Sanederini Vona nihenina.) Taui vivane tau vi‑nomu mata‑genai, ka ononotoi anani, ka Yaubada ya veimea a tau viwavenena. Ka tau vi‑nomu ananina ana wava Anasi, ka Anasi yana yoko habuhabui nui inau‑hohona, ka kadu yana yoko wayahia vivane Kaiapasi, ka Ioni, kadue Alekisanidera.
7 Ka tau nau‑hohonaia Pita ka Ioni ihonei, ivi‑au‑mini mataia, e ivi‑tanatanaiei, ivona, “Itomi aitam dewa udewei. Kate koiaka awaehemi udewei? Medeina ana wava? Avi bagibagi wayahina udewei?”
Pita Ya Nau‑wahe Tau Veimea Wayahia
8 Ka Nuana Ahihinata Pita nau‑vi‑anai, e Pita ya vona‑nau‑pata vi‑putu, ivona,
“Ama tau veimea ka ononotomi ananimi, 9 kaiwadi, ama vitana matana ataina vinꞌ‑omo iuna itoai dewa ahiahina aitam adewei tau penapena taina wayahina, a? Kaiwadi ama vitana matana ataina vinꞌ‑omo iuna itomi yami nuanua unꞌ‑anamanei medeina tauna ya vidoha vinꞌ‑omo, a? 10 Aituhu deina, akanai itomi tau veimea nau‑wawanimi unꞌ‑anamanei, kadu me Isiraeli habuhabui nau‑wawani inꞌ‑anamanei, onoto taina matamia mimini, iuna ya vidoha vinꞌ‑omo Iesu Tau Ito‑yavuha, onoto Nasareta, a wavea. Itomi Iesu‑nana ai nahenahea ututu‑pwatei, unau‑vi‑anigi, kate Yaubada si‑vi‑mini‑havinei. Ka avona‑havinemi, onoto taina ya vo‑vi‑aiai omo Iesu‑nana ya bagibagi wayahina.✡Dew 3:6, 13-16. 11 Iesu‑nana ohona ahihi‑vainena Yaubada ya manua nihenina deina, kate itomi tau yona ohonana uvihahaiei, uhaponei. Ka ataina Iesu‑nana avaha vi‑ohona naona, ka tauna ohona habuhabui veimeyei.✡Sam 118:22. 12 Ka eha kadu aitam koiaka ana pata na‑ito‑yavuhika. Iesu ana heta. Ka eha kadu aitam wava tanopia mamae wayahina kavi‑hone, e ito‑yavuha kavaniahe. Yaubada awaeheka Iesu ana wava a heta‑ohota kavi‑honei, e ito‑yavuha kavaniahei deinake.”✡Mat 1:21.
13 Ka tutana tau veimea‑naia Pita ka Ioni yai ate‑vatu idudueyei, taui nuai vi‑tupatupa ananina wayahina. Ka tau veimea‑naia ianamanei Pita ka Ioni tau maꞌ meagai, kadu ianamanei taui eha pai viwavenena ananina wayahia ita‑nuinu, ka eha nua‑uyana ananina itꞌ‑epe. Ka tau veimea‑naia inuani, nonova ainuai Iesu nui imamaei. 14 Ka kadu tau penapenana avaha vidoha idudueyei nepeia mimini. Wayahina, tau veimea‑naia inuanua‑wayohe medeina Pita yana vona inau‑pate.
15 Wayahina, tau veimea‑naia Pita ka Ioni ka onotona nonova penapenana aitonu ivi‑tunei ine vitana matana a papani upuna wayahina, e tau veimea‑naia ai pata matataui ipuipupu, ivi‑nua‑dadani medeina iveimeyei. 16 Ka ai heta ivi‑tanatanaiei, ivona, “Medeina kadewei onoto ainuai taina wayahi? Iuna Ierusalem a tau maꞌ habuhabui avaha ianamanei, taui iaiaya ananina idewei. Wayahina, aituhu kapa‑goyogoyoei, munia tau maꞌ habuhabui inau‑nikonikoieka. 17 Itoka nau‑wawanika tuta tepakaia yai nau‑wahe kavito‑potei, e mani tomotau eha yai vitumahana ivo‑vinevine, ka eha yaka tapanono ini‑tawane deina. Wayahina, nau‑wawanika vona panina wayahina kanau‑vi‑avini, ‘Eha kadu aitam tuta itomi unau‑wahe tauna a wavea.’ ”
18 Akaka tau veimea‑naia ihonei ina‑nu‑havine wayahia, e iveimeyei deina, ivona, “Eha kadu aitam tuta una‑vona Iesu a wavea, kadue eha kadu aitam tuta uviwavenena a wavea tomotau wayahia.”✡Dew 5:28.
19 Kate Pita ka Ioni veimeana inau‑patei, ivona, “Avi dewa nau‑wawaniai Yaubada matana? Itomi ami pata uvi‑nua‑dadani. Kaiwadi, tunutunuhiai aituhu itomi movimi avi‑ateteyei, o kadi tunutunuhiai aituhu Yaubada movina avi‑ateteyei?✡Dew 5:29. 20 Kate avonemi, itoai ama veimea mamaei, vivane aviani avaha mataia adueyei, ka aviani avaha tanihaia anononi, akanai nau‑wawaniai dewaia wayahi anaunau‑wahe.”
21-22 Ka tau veimea‑naia ivona‑dabadaba‑havine aituhu kadu aitam tuta inau‑wahe Iesu a wavea, apaina idewa‑yaiyaiei. Ipupuna iakwa, e iyavuhi. Ka tau veimea‑naia eha yai nuanua iyavuhi, kate eha ai pata aitam etawana ita‑vaniahe idewa‑yaiyaie auyewana wayahina. Iuna tau maꞌ Ierusalem habuhabui Yaubada iawa‑davedavei dewa‑bagibagi‑vainena wayahina. Iuna tau penapenana a ponimana ai yau 40 avaha ni‑tawanei. Wayahina, tau veimea‑naia imatamatauta tau maꞌ Ierusalem habuhabui wayahia, e iyavuhi.
Tau Ekalesia Iviama Ate‑vatu Kadu Bagibagi Wayahi
23 Ka avaha Pita ka Ioni iyavuhi, ainuai imavina yaiai wayahia. Ka aviani tau vi‑nomu mata‑genai, ka ononotoi anani ivonei, Pita ka Ioni yaiai imataedai deina. 24 Ka avaha yaiai inononi, taui habuhabui nui iviama Yaubada wayahina, tomotau aitamoata ya viama deina, ivona,
“Kauvea, wamke wahuma, ka tanopi, ka hawana, ka dewa habuhabui nihenia imamaei evevewanei.✡NiT 20:11; Neh 9:6; Sam 146:6. 25 Kadu wamke eawaehei wai Davida apa‑taputapu. Vona ahiahina, tauna yam tau paisewa aitam, ka Nuam Ahihinata ya bagibagi wayahina apa‑taputapu, ivona,
‘Aviani wayahina tomotaui
eha Yaubada itꞌ‑anamane ahiahina inua‑goyo?
Kadu aviani wayahina me Isiraeli
inuanua‑kavokavovo?✡Sam 2:1-2.
26 Tau maꞌ tanopi yai kiniV
kadue ai tau veimea inau‑hohona, ivo‑vi‑aiai,
e Yaubada inau‑haviei, ka kadu Natu‑hoina,
vivane Tau Ito‑yavuha, inau‑haviei.’
27 Vona ahiahina, Erodi ka Ponitiusi Pilate meagai taina nihenina avaha inau‑hohona Davida yanꞌ apa‑taputapu mai‑vonei deina. Ka taui eha Yaubada itꞌ‑anamane ahiahina,aTaui eha Yaubada itꞌ‑anamane ahiahina vivane me Rom. kadu me Isiraeli nui inau‑hohona deina, e Iesu yam tau paisewa ahihinata inau‑haviei.aErodi ka Ponitiusi Pilate avaha iawaehei Iesu itutu‑pwatei ai nahenahea. Tauna evi‑nua‑dadanei vivane yama Tau Ito‑yavuha.✡Mat 27:1-2; Luk 23:7-11; Dew 3:13. 28 Ka taui yai dewana goyona vinꞌ‑omo wamke yam nuanua deina, kadu wamke yam awaeha deina.✡Dew 2:23. 29 O Kauvea, itoai yam tau paisewa, ka tuta ataina tau veimea‑naia iyapoyapoai, kadu yai nuanua idewa‑yaiyaieai. Wayahina, ahidahidam ama havia yai ipupu manimaninina enuani, ka ahidahidam evo‑vi‑bagibagiai kadu evo‑vi‑vatuai, e ama pata yam vona ahaehaeyei tunuhina.✡Epe 6:19. 30 Ka yam bagibagi wayahina tau kwanakwanaha evo‑vi‑aiaiei, ividoha. Ka kadu pai dune bagibagina kadu iaiaya ananina eawaeheai asi‑vinꞌ‑omanei yam tau paisewa ahihinata Iesu a wavea.”
31 Ka yai viamana inau‑yehai, ka tanopi si‑putu, vi‑yoyoyo, e manua‑nana nihenina imamaei nau‑yueyue. Ka Nuana Ahihinata omo, e habuhabui nau‑vi‑anai, e taui yai ate‑vatu nui Yaubada yana vona ihaehaeyei tunuhina, eha ita‑matamatauta.
Tau Vitumahana Yai Gugua Ivo‑pata
32 Ka tau vitumahana ivi‑habu, ka yai nuanua aitamoata, kadu ai ayaunena aitamoata. Eha ita‑vi‑vonavona ka eha ita‑vonavona, “Yau kina taina, ka itomi eha.” Taui yai gugua habuhabui iawaehei yoko habuhabui yai dewa wayahi.✡Dew 2:44. 33 Ka Kauvea Iesu a tau hae anani ibagibagi ananina, ka tauna ya mini‑havine ihaehaeyei. Ka Yaubada yanꞌ ate‑nuanuai ananina taui habuhabui wayahia mamaei. 34-35 Ka eha aitam payapayaya nui, ka habuhabui na kabwagi kadu na kwamai. Iuna aituhu yaiai ivi‑kutakuta, munia tau kaikaiwabo wayahia yai tano kadu yai manua iaimwaneyei, e patana habuhabuna iomanei, e Iesu a tau hae ivenevenei. Ka tau hae‑naia taui ivi‑kutakuta kinaia ivo‑patapatai. Ka tuta tuta ekalesia nihenina tau kaikaiwabo yai dewa deina.✡Dew 2:45.
36 Ka aitam tau kaikaiwabo wayahia ana wava Iosepa. Ka tau hae ivi‑wahani Banabasi, iuna Banabasi anꞌ anamana “tau vo‑vi‑vatu”. Tauna aitam Levi yana dede, ka ya meagai aitam bonabona ana wava Sipirusi. 37 Ka aitam tuta Banabasi tauna yana tano imwaneyei, e kinaia omanei, e Iesu a tau hae venei, iveimeyei.
a4:1-2: Tuta tanoi wayahina tau vi‑nomu ananina, kadu tau vi‑nomu mata‑genai habuhabui Sadusi yai yoko wayahia. Ka Sadusi yai yoko Manua Vito‑pota a tau nau‑havia iveimeyei. Wayahina, taui imaga‑bawe, iuna Sadusi habuhabui eha mini‑havine itꞌ‑awaehe, kate ivitumahana tutana tomotau ianiga, akanai, eha kadu aitam aviani apaina vinꞌ‑omo ivaniahe. Ka kadu imaga‑bawe, iuna Pita ka Ioni yai nau‑wahe wayahina taui yai vitumahana ivi‑goyoi deina.
a4:5-6: Tau veimea yoko taina inau‑hohona ai yau 70. (Edu Sanederini Vona nihenina.)
✡4:11: Sam 118:22.
✡4:24: NiT 20:11; Neh 9:6; Sam 146:6.
✡4:25: Sam 2:1-2.
a4:27: Taui eha Yaubada itꞌ‑anamane ahiahina vivane me Rom.
a4:27: Erodi ka Ponitiusi Pilate avaha iawaehei Iesu itutu‑pwatei ai nahenahea.
✡4:27: Mat 27:1-2; Luk 23:7-11; Dew 3:13.