1  Mat 7:15; 1Tes 5:21; 1Jon 2:18; 2Jon 7Haul nöbö mölöu nöbö nɨ wä bla. Nöbö mö God Mönö yad nölmɨdölɨŋö, rɨmɨdöia, jɨ inakmönö hörön yad nöl yönmɨdöi nöbö mö bla mɨga mɨdöi aku mɨ, nöbö mö bli God Inöma pɨsaŋ nɨgiö nɨgön mɨdölɨŋö, rɨmɨjöñ aku, ñɨŋ nugw ri abön, mönö ñɨŋ aku pöña. God Inöma aimönö ap hör i ñɨgö rɨba nölmɨn yadmɨdöiŋö, rön, nugwöña. 2  1Kor 12:3God Inöma inöm ñɨŋa pɨsaŋ nɨgiö nɨgön mɨdönö mɨdöl aku, ñɨŋ pödpödiö nugwön nugumaböñ? Jisas Krais nuŋ nöbial mɨxɨña nɨgön, mögörɨb il kɨ hö, cöñ aku, God Inöma ñɨŋ pɨsaŋ nɨgiö nɨgön mɨd aku, me rön, nugwöña. 3  1Jon 2:18Jɨ Jisas Krais nuŋ nöbial mɨxɨña nɨgön, mögörɨb il kɨ hölöŋ, me cöñ aku, God Inöma ñɨŋ pɨsaŋ nɨgiö nɨgön mɨdölö, rön, nugwöña. Krais Nugwo Höxmɨd Nöbö aku inöm nuŋwa yuö ñɨŋ kwo mɨdaŋ nugwön mönö aliö akuyöbö yajöña. Inöma Gwogwo aku hönɨŋö, rɨmɨn, nugwöia. Jɨ weik wop mɨdö kɨ mögörɨb il kɨ mödö ha.

4  Mat 12:29; 1Jon 5:4-5Halöu ha madmag yöbö nɨ bla. God nuŋ yuö ñɨŋ kwo mɨda; nuŋ Nöbö ölɨsö ödöriö. Kɨjaki nuŋ nöbö mö mögörɨb il kɨ mɨdöi piaku yuö ñɨgö kwo mɨda; nuŋ nöbö ölɨsö yöi. God Nöbö ölɨsö ödöriö aku, nuŋ yuö ñɨgö kwo mɨd makwam, nöbö mö inakmönö hörön yadmɨdöi piaku rɨb ñɨgö pɨxɨp dub maga nɨgöl. 5  Jon 8:47; 15:19Nöbö mö inakmönö hörön yadmɨdöi bla, ñɨŋ mögörɨb il kɨyöbö aku mɨ, mönö yadmɨdöi aku algör ör mögörɨb il kɨyöbö. Mönö yadmɨdöi aku mögörɨb il kɨyöbö makwam, nöbö mö mögörɨb il kɨyöbö piaku inakmönö ñɨŋa nugw pɨmɨdöia. 6 Jɨ an God halöu ha nuŋwa mɨdöla. Nöbö mö God nugw pöi bla, mönö ana nugw pɨmɨdöia. Jɨ nöbö mö God nugw pölöi bla, mönö ana nugw pölöi. Aku nugwön nugwöla, Inöm ma akwör ñɨgö rɨbyöx nölmɨn yadmɨdöiŋönö inakmönö inöm i rɨba nölmɨn yadmɨdöia.

7 Nöbö mö madmag yöbö nɨ bla. Haul nöbö mölöu nöbö piaku nuö nuö madmag nɨgnɨm. God nuŋ rɨmɨn mɨ, nöbö mö madmag nɨgmɨdöia. Nöbö mö kai, nöbö mö piaku ñɨgö madmag nɨgmɨdöi bla, ñɨŋ God halöu ha nuŋwa mɨdön nugwo nugumɨdöi aku mɨ, nöbö mö bla madmag nɨgmɨdöia. 8 God nuŋ nöbö mö ñɨgö madmag nɨgmɨd aku mɨ, nöbö mö kai, nöbö mö akuyöbö ñɨgö madmag nɨgmɨdölöi bla, ñɨŋ God nugwo nugumɨdölöi. 9  Jon 3:16God Ha mɨ paŋyöbö nuŋ aku yad abmɨn hön wöröxmɨn, an nöbö mö mögörɨb il kɨ mɨdöl bla kömö öim mɨdɨb maga ra. Aku nugwön an wöxnö nugwöla, God anɨŋ mɨ ödöriö madmag nɨgmɨda. 10  Rom 5:8-10; 1Jon 2:2An God nugwo höd madmag nɨgölmɨŋ; God nuŋ höd anɨŋ madmag nɨgöŋa. God nuŋ ap kib mag gwogwo rɨmɨdöl bla nugwön, anɨŋ pad hör piaku aböxa. Jɨ nuŋ anɨŋ madmag nɨgön, Ha mɨ paŋyöbö nuŋwa Jisas Krais yad abmɨn hön, ap kib mag gwogwo rɨmɨdöl bla, bɨ katlö watlö um sö mɨxɨñ nuŋwa keir pön wöröxön, ap kib mag gwogwo rɨmɨdöl pɨx kepkep aku magalɨg örɨx aböŋa.

11 Haul hödpɨg nöbö nɨ wä bla. God nuŋ alön, anɨŋ madmag nɨgmɨd aku nugwön, an kwo algör ör haul nöbö mölöu nöbö bla nuö nuö madmag nɨgnɨŋa. 12  Jon 1:18Nöbö mö paŋyöbö i God mämäga nugwöl; jɨ an haul nöbö mölöu nöbö bla nuö nuö madmag nɨgmɨjɨnɨŋ aku, God nuŋ yuö an kwo mɨjöna. Nuŋ yuö an kwo mɨjön aku mɨ, nuŋ nöbö mö bla madmag nɨgmɨd aku, an kwo algör ör nöbö mö bla madmag nɨgnɨŋa. 13  2Kor 1:22; 1Jon 3:24God nuŋ Inöm nuŋwa keir yad abmɨn hön yuö an kwo mɨd aku mɨ, an God yuö kwo mɨdöla, nuŋ yuö an kwo mɨd aku, nugw ri aböla. 14 Acö God nuŋ Ha nuŋwa ñɨgö nöbö mö kömö pönɨŋö, rön, aböŋ aku, an mämäg ana keir nugwön, nöbö mö piaku yad nölmɨdöla. 15 Nöbö mö, Jisas nuŋ God Ha nuŋwa ödöriö mɨdö, rön, wöxnö yadmɨdöi bla, God yuö ñɨŋ kwo mɨda; ñɨŋ God yuö kwo mɨdöia. 16 Makwam, God nuŋ anɨŋ madmag nɨgmɨd aku nugw pön, rɨb aku yöx nugu gör mɨdöla.

God nuŋ nöbö mö madmag nɨgɨb Nöbö. Nöbö mö madmag nɨgmɨdöi bla, God yuö kwo mɨdöia; God yuö ñɨŋ kwo mɨda. 17 An God pɨsaŋ nɨgiö nɨgön mɨjnɨŋ aku, nuŋ nöbö mö madmag nɨgmɨd mag akuyöbö, an kwo algör ör nöbö mö madmag nɨgnɨŋa. Makwam, God mönö diba yajön wop aku, ölölö raŋ ipöxöinɨŋ; rɨbyöx gɨba alɨg mɨjnɨŋa. 18 God anɨŋ madmag nɨgmɨd aku mɨ, an ipöxɨb maga nɨgöl. Anɨŋ ölɨŋ höb pɨ nöiöñɨŋö, cɨnɨŋ aku mɨ, ölölö raŋ ipöxnɨŋa. Makwam, nöbö mö ipöxmɨdöi piaku, God anɨŋ madmag nɨgö, rön, nugwölöi.

19 God nuŋ keir höd anɨŋ madmag nɨgöŋ aku mɨ, mai an nugwo madmag nɨgöla. 20 Nöbö mö God madmag nɨgölɨŋö, rɨmɨdöi aku, jɨ haul nöbö mölöu nöbö bla höx mɨdöi aku, inakmönö hörön yadmɨdöia. Nöbö mö wöxnö nugumɨdöi piaku madmag nɨgeñ aku, ñɨŋ pödpödiö, God wöxnö nugwölöi Nöbö aku nugwo madmag nɨgöñ? 21  Mak 12:29-31God mönö ölɨsö yadön yadöŋa, “Nöbö mö nɨ madmag nɨgmɨdöi akuyöbö, haul nöbö mölöu nöbö akuyöbö ñɨgö kwo algör madmag nɨgɨŋ,” me röŋa.