35
'Auvea me Isileli yadi fwayafwaya i na luve'ivauya
1 Fwayafwaya lalana wata nage'avana 'awaie i na uga,
wata sali'avu'avuye welavi na ididi,
'wa da vo i da sososoana.
2 E'e, sali'avu'avu i na uga 'wa da vo sosoana faifaina i da vevegolegole.
'Awaie 'ana 'isa i na ve'atumaiotoga, bani'odi Lebanoni 'oyanidi.
I na vewala'aituai, bani'odi 'Oya Kamela wata Seloni laube'una.
Naninidi 'waidiega tomotoga fuedi 'Auvea yada Yaubada yana vebwaika wata yana toketokena i na 'iseni.
3 Ibu 12:12Valananina 'atumaina 'wainega egavo nimadi mweadi, 'wa na kiavetoketokedi.
Egavo tugatugadi i tatatava, 'wa na kiavefa'alidi.
4 Tomotoganidi i kolologa, 'u na vonedi 'u na vo,
Kebu 'wa na kolologa 'wa na vetoketoke.
'Wa na 'iseni, yami Yaubada i mimai 'ana gaviavo i na vematavulogidi,
we'e 'omi i na 'ita'ita'iemi.”
5 Mad 11:5; Luk 7:22Tutuyanina i na maiga, tomatasako i na 'isa-'atumai
wata tanigadi 'uludi 'adi fata i na nogaya.
6 Tubu-sakosako i na tubuoga,
i na sousou wata i na tavotavola,
we'e 'awadi 'ebo'ebodi ma yadi sosoana bonadi bwaikinega i na leilei.
Ufa i na luvuala fwayafwaya lalana 'wainega,
sali'avu'avuyeamo i na seu i na nago.
7 Nidula yauyaugina i na vesivilai i na velavu,
wata fwayafwaya lalana i na veufa-luluvuala.
Fwayafwaya lalana i na vetuli,
basenadi 'aisaya walawala'ai yadi 'eba mia,
'awaie mosomoso 'ala'alawidi 'atumaidi bei i na ve'alatabotabo.
8 'Awalawanina 'waineamo tamu 'eda bwaikina i na nunago 'ana wagava i na goleni 'Eda Magemagetana.
Tosakona kebu 'adi fata 'waineamo i na nago,
'edanina 'asa'aiana Yaubada yana tomotogavo faifaidi,
tove'wava'wava kebu 'adi fata 'waineamo i na yabayaba.
9-10 'Edanina 'waineamo laioni wata 'aisaya kasikasisidi kebu i na nunago.
Egavo 'Auvea i 'ita'ita'iediga 'aisedi beidimo i na nunagoi.
I na viladi Ielusalema ma yadi sosoana i na leilei bonadi bwaikinega. Yadi sosoana i na 'eno-vagata fai nuavita wata 'we'wela 'akonadi i 'a'ava-otoga.