1 Madi 13.55Ne Yud, Ya꞉su Kelisowa꞉ ene nanogdo꞉ dian kaluwo꞉ nowo꞉ ne. A꞉la꞉ta꞉ga꞉ Ya꞉ma꞉sa꞉ aowo꞉ ne. Niyo꞉ mo꞉fo꞉s we Godeya꞉lo꞉ ho꞉ida꞉sa꞉ga꞉lo꞉ da꞉feyo꞉ kaluka꞉isale gimo꞉ sa꞉sa꞉liga꞉to꞉l. Do Gode eyo꞉ gio꞉ mada alan asulaki, Ya꞉su Keliso eyo꞉ gio꞉ bo꞉fo꞉lowa꞉sen. 2 Godeya꞉lo꞉ nofola꞉sen mano꞉, ha꞉fa꞉nolo dowan mano꞉, a꞉la꞉ta꞉ga꞉ ha꞉fo꞉ disa꞉la꞉sen man a꞉no꞉lia꞉yo꞉ gi amio꞉ ililita꞉ga꞉ anama꞉ki, Godemo꞉ dulugu so꞉lo꞉l.

3 Ne milile, Gode eyo꞉ nio꞉ tambo a꞉ma꞉la꞉ gasilima꞉kilo꞉ dimido꞉ a꞉no꞉ gimo꞉wo꞉ mo꞉fo꞉so꞉ tamina sa꞉sa꞉lima꞉no꞉ asulo꞉. Ko꞉sega o꞉go꞉ niyo꞉ to nowo꞉ halale a꞉sa꞉sa꞉lima꞉no꞉ asulo꞉. To gililo꞉ tilidabu a꞉no꞉ Gode eyo꞉ tilidabu kaluka꞉isalemo꞉ dimi ko꞉lo꞉, to a꞉no꞉ ko꞉liyo꞉ mo꞉dowaki, ko꞉ngo꞉ mela꞉ib. Ko꞉sega kalu nolba꞉yo꞉ to a꞉no꞉ nodoma꞉no꞉ dowo꞉ ko꞉lo꞉ gili asulo꞉wo꞉ halale alitaki, to a꞉no꞉ dinafa bo꞉fo꞉melea꞉ki, to we a꞉na sa꞉sa꞉lo꞉l. 4 Gala 2.4,2Bid 2.1Mo꞉wo꞉ Godeya꞉lo꞉ asulab aundo꞉ mo꞉kudu ha꞉na꞉sen kalu nolo꞉, gi o꞉lia꞉ gasama꞉niki wo꞉no꞉le mio꞉. Ili sa꞉lakiyo꞉, “Gode eyo꞉ nio꞉ alan asulakiyo꞉ ha꞉fo꞉wo꞉ disa꞉la꞉sen ko꞉lo꞉, niliyo꞉ uwo꞉ dian man ko꞉li ko꞉lilo꞉ a꞉no꞉ o꞉li dimida꞉mela꞉niki” a꞉la꞉wido꞉. Kalu i wema꞉yo꞉ nili Alan Misa꞉ kalu, Ya꞉su Kelisowo꞉ gola ba꞉daki, fa꞉s dimia꞉sen. Ililo꞉ hala dimida꞉sen a꞉no꞉ falasila꞉ma꞉no꞉ a꞉la꞉likiyo꞉ Godeya꞉ bugo꞉ amio꞉ mo꞉lu sa꞉sa꞉li alifa꞉.

5 Kis 12.51,Nam 14.29-30Kelego꞉ gilo꞉ tamin amilo꞉ asululi a꞉no꞉ niyo꞉ gimo꞉wo꞉ a꞉asuluma꞉ki sa꞉ma꞉nigo꞉l. Alan eyo꞉ Isolael kaluka꞉isale enedo꞉ a꞉no꞉ asuwa꞉takiyo꞉, Isib hen amilo꞉ seno꞉ tililia꞉ga꞉, ha꞉la꞉ya handalota꞉ga꞉ ane. Ko꞉sega tif amio꞉ kaluka꞉isale e amilo꞉ mo꞉tilidabu a꞉no꞉ yasala꞉. 6 2Bid 2.4A꞉la꞉ta꞉ga꞉ to we asuluma. Gode eyo꞉ ma꞉mula꞉ kalu imo꞉wo꞉ nanog inido꞉leyo꞉ dimi ko꞉sega, nolo꞉ yo꞉le dowaki, nanog imo꞉lo꞉ dimi a꞉no꞉ ta꞉ta꞉ga꞉ ane. A꞉la꞉go꞉ko꞉lo꞉ Gode eyo꞉ iyo꞉ sa꞉niya꞉ mela꞉sa꞉ga꞉, sololi hen a꞉na mela꞉no꞉ melea꞉ki disa꞉ ko꞉lo꞉, iyo꞉ ho꞉len alan Godeya꞉ enedo꞉ mo꞉walilima꞉nigab a꞉no꞉ ko꞉lo꞉ yasila꞉lab. 7 Mo꞉mo꞉ 19.1-25,2Bid 2.6,10A꞉la꞉do꞉ go꞉ o꞉leaumbo꞉, Sodom, Gomola amisa꞉n o꞉lia꞉yo꞉ a꞉la꞉ta꞉ga꞉ amisa꞉n nol anib amilo꞉ kandayo꞉ a꞉no꞉ asuluma. Kaluka꞉isale i a꞉no꞉ uwo꞉ diaki, a꞉la꞉ta꞉ga꞉ uwo꞉wo꞉ mo꞉dimidan aumbo꞉lo꞉ dimida꞉len. Kaluka꞉isale nolo꞉ Godeya꞉lo꞉ falasila꞉ma꞉no꞉ a꞉no꞉ asulufo꞉melea꞉kiyo꞉, Gode eyo꞉ amisa꞉n kaluka꞉isale i a꞉no꞉ falasilaki, de hen mela꞉no꞉ mela꞉no꞉lo꞉ a꞉lab a꞉na ta꞉fo꞉.

8 A꞉la꞉do꞉ go꞉ o꞉leaumbo꞉, kalu gilo꞉ sab usamilo꞉ wo꞉no꞉ledo꞉ mio꞉ i a꞉no꞉lo꞉, inido꞉ ofolab a꞉na ilikiyo꞉, ini do꞉mo꞉wa꞉yo꞉ man mogago꞉le dimida꞉sen. Iyo꞉ a꞉la꞉iyaki, yo꞉le dowa꞉sen. A꞉la꞉ta꞉ga꞉ iliyo꞉ ma꞉mula꞉ kalu halaido꞉lo꞉ a꞉lab o꞉mo꞉wo꞉ dio꞉ge sa꞉la꞉sen. 9 Dan 10.13,21,12.1, Sek 3.2, 2Bid 2.11, Kala 12.7Ko꞉sega tamin amio꞉ ma꞉mula꞉ kaluwa꞉ misa꞉ Maiko꞉l eyo꞉ Mo꞉sa꞉sa꞉ do꞉mo꞉wo꞉ tadowo꞉laki, Sa꞉da꞉na꞉ o꞉lia꞉ towa꞉yo꞉ kegab amio꞉, Maiko꞉l eyo꞉ Sa꞉da꞉na꞉ emo꞉wo꞉, “Ge mogago꞉ dimidab” a꞉la꞉bo꞉ mo꞉gadi sio꞉. Ko꞉sega Maiko꞉l eyo꞉ a꞉la꞉sio꞉, “Alan, eyo꞉ gemo꞉wo꞉ towo꞉ halaido꞉ sa꞉ma꞉ib” a꞉la꞉ka sio꞉.

10 2Bid 2.12Ko꞉sega kalu i wema꞉yo꞉ kelego꞉ ilo꞉ mo꞉fanda asululiab a꞉no꞉ dio꞉ge sa꞉la꞉sen. Kalu i wema꞉yo꞉ asulo꞉wo꞉ no꞉ hena꞉ usamilo꞉ sab o꞉leo꞉ngo꞉ dowaki, inin do꞉mo꞉wa꞉lo꞉ kudu ha꞉na꞉no꞉ko꞉ fanda asulab. A꞉la꞉ta꞉ga꞉ man a꞉ma꞉yo꞉ inino꞉ mada hendele mogagila꞉. 11 Mo꞉mo꞉ 4.7-8,Nam 16.1-35, 2Bid 2.15, 1Yo꞉n 3.12Wai! Kalu i wenamio꞉ hida꞉yo꞉wo꞉ alan fa꞉la꞉doma꞉ib. Mo꞉wo꞉ iyo꞉ Ka꞉ina꞉ mano꞉ kudu ha꞉nabo꞉lo꞉ka꞉. A꞉la꞉ta꞉ga꞉ Balam elo꞉ hala dimido꞉ o꞉leaumbo꞉, iliyo꞉lo꞉ moleyo꞉ alan dia꞉no꞉ mesela꞉sen. A꞉la꞉ta꞉ga꞉ Kola eyo꞉ Mo꞉sa꞉s o꞉lia꞉yo꞉ a꞉la꞉iya꞉sa꞉ga꞉, e a꞉na sowo꞉ ko꞉lo꞉, kalu i wema꞉yo꞉lo꞉ Gode o꞉lia꞉yo꞉ a꞉la꞉iyab ko꞉lo꞉ iyo꞉ soma꞉ib.

12 2Bid 2.13,17Gio꞉ Ya꞉suwa꞉lo꞉ ha꞉fo꞉ disa꞉la꞉sen man a꞉no꞉ asulaki, ma꞉no꞉wo꞉ ma꞉ni kegea꞉likiyo꞉, kalu i we na꞉bo amilo꞉ do꞉mo o꞉ngo꞉ dowaki, iliyo꞉ man gililo꞉ dimidab a꞉no꞉ mo꞉molo asulaki, gio꞉ o꞉li mogagila꞉ma꞉ib. Iliyo꞉ ini ko꞉ asula꞉sen. Kol ko꞉lo꞉ ho꞉no꞉ mo꞉tindakilo꞉ fufaya꞉lo꞉ tabelia꞉gane o꞉leaumbo꞉, iyo꞉lo꞉ inin nanog hendeleyo꞉ mo꞉dimido꞉ ko꞉lo꞉, o꞉ngo꞉malo꞉ngo꞉ dowab. A꞉la꞉ta꞉ga꞉ iyo꞉ i ko꞉lo꞉ folo꞉ helema꞉no꞉ ho꞉len amilo꞉ mo꞉hedan o꞉ngo꞉ dowo꞉. Iyo꞉ mada sowo꞉le ko꞉lo꞉lab ko꞉lo꞉, i a꞉no꞉ biso꞉wa꞉yo꞉ duda꞉sa꞉ga꞉ sandifo꞉ ko꞉lo꞉, mada olaliaki, sowo꞉le ko꞉lo꞉lab. 13 Kalu iyo꞉ so꞉lu ho꞉n ko꞉lo꞉ ene asulo꞉ sa꞉sa꞉yakilo꞉ gululia꞉yab o꞉ngo꞉ dowaki, sendeloma꞉no꞉ man ililo꞉wo꞉ ho꞉n tuba꞉s ko꞉lo꞉ dibida꞉sen o꞉ngo꞉ dowo꞉. Iyo꞉ akin amilo꞉ tamin mo꞉gelakilo꞉ babale sia꞉sen o꞉ngo꞉ dowo꞉. Gode eyo꞉ hen sololi nowo꞉ iyo꞉ a꞉na mela꞉no꞉ melea꞉ki dimidaefa꞉.

14-15 Mo꞉mo꞉ 5.18,21-24Inog eyo꞉ kalu i we ko꞉lo꞉ sa꞉lakiyo꞉, tamina dinali sio꞉. Inog e, Adama꞉ e so꞉lo꞉wa a꞉la꞉ta꞉ga꞉lo꞉ agelo꞉wo꞉ domo꞉ e ko꞉lo꞉ fa꞉la꞉dowo꞉. Inog eyo꞉ dinali sa꞉lakiyo꞉ a꞉la꞉sio꞉, “Bo꞉ba! Alan e ene ma꞉mula꞉ kalu modo꞉ daosen a꞉la꞉fo꞉ o꞉lia꞉ yakiyo꞉, kaluka꞉isaleyo꞉ tambo mo꞉walilima꞉ni yab. Godeya꞉lo꞉ asulab aundo꞉ mo꞉kudu ha꞉na꞉sen kaluka꞉isale ililo꞉ mogago꞉ ko꞉li ko꞉lilo꞉ dimida꞉len a꞉no꞉ tambo aloba꞉daki falasila꞉ma꞉ib. A꞉la꞉ta꞉ga꞉ to mogago꞉ ko꞉li ko꞉lilo꞉ ililo꞉ emo꞉lo꞉ sa꞉la꞉len a꞉no꞉lo꞉ tambo Alan eyo꞉ aloba꞉daki, wa꞉dema꞉ni yab” Inog eyo꞉ a꞉la꞉dinali sio꞉. 16 Kalu i wema꞉yo꞉ nolbo꞉wo꞉ mo꞉beaki, diga꞉lila꞉sen. Inin do꞉mo꞉wa꞉lo꞉ sagalema꞉no꞉ man a꞉no꞉ ko꞉lo꞉ kudu ha꞉na꞉sen. Iyo꞉ kailaki, inin wiyo꞉ duluda꞉sen. A꞉la꞉ta꞉ga꞉ iyo꞉ enedo꞉ asulab a꞉no꞉ ko꞉lo꞉ dia꞉no꞉ a꞉lakiyo꞉, kalu nolbo꞉wo꞉ safa꞉ to sa꞉lakiyo꞉, ha꞉nolo sa꞉la꞉sen.

17 Tamin amio꞉ nili Alan Ya꞉su Keliso elo꞉ iliga꞉felo꞉ kalu iliyo꞉, kelego꞉ tif amilo꞉ o꞉fa꞉la꞉doma꞉no꞉ a꞉no꞉ towo꞉ dinali saefa꞉ ko꞉lo꞉, ni milile gio꞉ to a꞉no꞉ wa꞉ka asula꞉bi. 18 2Bid 3.3Iliyo꞉ gimo꞉ sa꞉lakiyo꞉, “Elema꞉no꞉ ho꞉leno꞉ fa꞉la꞉dowalikiyo꞉, dio꞉ge sa꞉ma꞉no꞉ kaluwo꞉ a꞉na fa꞉la꞉doma꞉ib ko꞉lo꞉, iliyo꞉ Godeya꞉lo꞉ asulab aundo꞉ mo꞉kudu ha꞉naki, asulo꞉ mogago꞉ inido꞉ a꞉no꞉ ko꞉lo꞉ kudu ha꞉na꞉ib.” Iliga꞉felo꞉ kalu iliyo꞉ towo꞉ a꞉la꞉saefa꞉ ko꞉lo꞉ giliyo꞉ asula꞉bi. 19 Gio꞉ gegelebo꞉ mo꞉ege doma꞉kiyo꞉, kalu i wema꞉yo꞉ gio꞉ digene meab amio꞉ aloba꞉da꞉sen. A꞉la꞉ta꞉ga꞉ iyo꞉ henfelo꞉ mande a꞉no꞉ kudu ha꞉na꞉sen ko꞉lo꞉, Godeya꞉ Mama Malilo꞉wo꞉ i o꞉lia꞉yo꞉ mo꞉dowa꞉sen.

20 Kolo 2.7Ko꞉sega ni milile, a halaido꞉ dian o꞉leaumbo꞉, tilidabu malilo꞉ gililo꞉wo꞉ halaido꞉ doma꞉ki, dia꞉li ha꞉na꞉lubi. Giliyo꞉ Godeya꞉ Mamaya꞉lo꞉ asulab au kudu ha꞉naki dulugu sa꞉la꞉lubi. 21 Godeya꞉lo꞉ ha꞉fo꞉ disa꞉lan man us a꞉na dowa꞉bi. Alan Ya꞉su Keliso eyo꞉ gio꞉ nofolaki, mela꞉no꞉ mela꞉no꞉wo꞉ dimia꞉ib ko꞉lo꞉, a꞉no꞉ asulakiyo꞉ yasila꞉lubi. 22 Giliyo꞉ kaluka꞉isale tilidabuwo꞉ halaido꞉lo꞉ma dowab a꞉no꞉ nofolaki, ha꞉sa tililia꞉bi. 23 Sek 3.2,Kala 3.4A꞉la꞉ta꞉ga꞉ kaluka꞉isale nolo꞉ o꞉ma de hena ane o꞉ngo꞉ dowab ko꞉lo꞉, giliyo꞉ i a꞉no꞉ bo꞉bo꞉ge a꞉ma꞉la꞉ gasilima. A꞉la꞉ta꞉ga꞉ helebeso꞉g heyab amilo꞉ kaluwa꞉lo꞉ mo꞉beab o꞉leaumbo꞉, giliyo꞉ kaluka꞉isale nolo꞉ tagilaki, man mogago꞉ ilido꞉ dimida꞉sen a꞉no꞉ mo꞉beakiyo꞉ ko꞉na꞉ dowa꞉bi. Ko꞉sega giliyo꞉ kaluka꞉isale i ko꞉ nofolaki asuwa꞉ta꞉lubi.