44
Hina Gode Hi fawane da Godedafa
1 Hina Gode da amane sia:sa,
“Isala:ili fi! Na hawa: hamosu dunu!
Na ilegei fi, Ya:igobe egaga fi! Nabima!
2 Na da Hina Gode. Na da dili hahamoi.
Dilia lalelegei eso amola fa:no Na da dili fidisu.
Mae beda:ma! Dilia da Na hawa: hamosu dunu
amola Na dogolegei, ilegei dunu fi.
3 Na da hano hanai soge amoga hano imunu.
Amola hafoga:i soge amo da:iya hano masa:ne hamomu.
Na da Na gasa amo dilia mano ilima sogadigimu,
amola diligaga fi ilima Na hahawane dogolegele iasu imunu.
4 Ilia da gisi amoga ilia da hano bagade iaha, agoaiwane alemu.
Amola yodima ifa amo da hano gadenene lelebe agoaiwane alemu.
5 Dunu afae afae da amane sia:mu, “Na da Hina Gode Ea dunu.”
Ilia da Isala:ili fi dunu ilima gilisima:ne misunu.
Ilia huluane da afae afae Hina Gode Ea dio ilia loboga dedemu,
amola ilia da afae afae “Na da Gode Ea fi ganodini esala” sia:mu.
6 * Aisaia 48:12; Wamolegei Sia: Olelesu 1:17, 22:13Hina Gode da Isala:ili ouligisa amola gaga:sa.
E da Hina Gode Bagadedafa, amola E da amane sia:sa,
“Na da Hemosu amola Na da Dagosu.
Eno ‘gode’ da hame, Ni fawane da Godedafa.
7 Eno dunu da Na hamobe defele hamomu ganabela:?
Nowa da hou degabo hamoi asili, Fifi Ahoanusu amoga doaga:le,
nowa da amo hou ba:ma:ne defele esalabala? Hamedei!
8 Na fi dunu! Mae beda:ma!
Dilia dawa:! Musa: hemoneganini,
amo eso huluane ganodini hou Na da ba:la:lalu sia:i dagoi.
Amola dilia da Na ba:su dunu.
Eno ‘gode’ esalabala?
Gasa bagade ‘gode’ amo Na da hame nabi, agoaiwane esalabala? Hame mabu!
Loboga Hamoi ‘gode’ Liligi da Hamedei
9 Nowa dunu da ‘gode’ liligi loboga hamosa da hamedei. Amola, ‘gode’ liligi amoga ilia nodosa, amo amola da hamedei. Nowa da amo ‘gode’ liligi ilima nodone sia:ne gadosea da si dofoi agoane amola hame dawa:su dunu. Ilia da gogosiasu ba:mu.
10 Dilia da ouli amoga loboga hamoi ‘gode’ ilima sia:ne gadoma:ne hamomu da defea hame galebe. 11 Nowa da agoaiwane liligi amoma nodone sia:ne gadosea da gogosiasu ba:mu. Dunu amo da loboga hamoi ‘gode’ hamosa da osobo bagade dunu fawane. Ilia da misini, fofada:mu da defea. Amasea, ilia beda:mu amola gogosiamu.
12 Ouli hahamosu dunu da ouli afae lale, laluga gobele hahamosa. E da ea gasa lobo amoga ouli ha:maga fane, hahamosa. E da hawa: hamobeba:le, ha:i naba amola hano hanasa hele naba.
13 Diasu gagusu dunu da ifa ea defei ba:sa. E da dunu ea da:i hodo defele amo ifaga dedesa. E da gobihei amoga ifa sagane, e da amo ifa hamone, dunu noga:i ea da:i hodo agoane hamone, ea diasu ganodini ligisisa. 14 E da dolo ifa abasea, hamosa. O e da “saibalase” o “ouge” ifa amoga hamosa. O e da “lolele” ifa bugili, gibu dasea amo ifa alema:ne ouesala. 15 Ifa abasea, e da la:idi lale, lalu didisa. Eno la:idi amoga e da ‘gode’ agoaila hamosa. La:idi afae e da ea da:i dogoloma:ne amola ea ha:i manu gobema:ne, e da lalu didisa. Eno la:idi amoga e da ‘gode’ liligi hamone, amoma nodone sia:ne gadosa. 16 Amo ifa mogili e da lalu didili, ohe hu gobele nanu, sadi ba:sa. E da ea da:i dogolole, amane sia:sa, “Defea! Na da hahawane noga:le dogoloi dagoi.” 17 Be ifa la:idi eno amoga e da ogogosu ‘gode’ liligi hamone, amoma beguduli nodone sia:ne gadosa. E da amo liligi amoga sia:ne gadole, amane sia:sa, “Di da na ‘gode’. Dia na gaga:ma!”
18 Agoai dunu da gagaouiba:le, ilila: hamobe hame dawa:. Ilisu da dafawane hou mae dawa:ma:ne, ilila: si wadela:sa. 19 Loboga hamoi ‘gode’ hamosu dunu da asigi dawa:su hame gala. E da dawa: lai ganiaba, e da amane sia:na:noba, “Ifa la:idi amoga na da lalu didi. Na da lalu nasubu amoga agi ga:gi gobei amola ohe hu gobele mai. Amo mogili diala amoga na da ‘gode’ liligi hamoi. Amola, wali na da ifa amoma fawane begudulala.”
20 Amo hou da gagaoui dunu nasubu nana agoai ba:sa, hamedei. E da ea gagaoui asigi dawa:su amoga fa:no bobogebeba:le, e fidimu hamedei agoai ba:sa. E da amo ‘gode’ (amo da ‘gode’ hame), hima sia:mu gogolesa.
Hina Gode, Osobo Bagade Hahamosu Dunu amola Gaga:su dunu
21 Hina Gode da amane sia:sa,
“Isala:ili fi! Amo noga:le dawa:ma!
Dilia da Na hawa: hamosu dunu, amo dawa:ma!
Dilia da Na hawa: hamosu dunu esaloma:ne, Na dili hahamoi.
Amola, Na da dili hamedafa gogolemu.
22 Na da dilia wadela:i hou, mu mobi agoane doga:i dagoi.
Nama buhagima! Na fawane da dilia Gaga:su dunu.”
23 Dilia mu! Hahawaneba:le, ha:giwane wele sia:ma!
Osobo bagade hagudu soge! Di amola wele sia:ma!
Goumi amola iwila ifa huluane! Dilia amola hahawaneba:le wele sia:ma!
Hina Gode da Ea fi dunu Isala:ili gaga:i dagoiba:le,
Ea gasa bagade hou olelei dagoi.
24 Na da Hina Gode, dilia Gaga:su dunu.
Na da dili hahamoi dagoi.
Na da Hina Gode, liligi huluane Hahamosu dunu esala.
Ni fawane da mu hahamoi.
Na da osobo bagade hahamobeba:le, dunu eno da Na hame fidi.
25 † 1 Golidia 1:20Na hamobeba:le, ogogosu ba:la:lusu dunu da gagaoui ba:sa.
Dunu eno da gasumuni ba:sea, hobea misunu hou olelesa,
amo ilia ba:i liligi Na da afadenesa.
Na da bagade dawa:su dunu ilia sia: hedofasa,
amola ilia bagade dawa:su hou da gagaoui fawane, amo eno dunuma olelesa.
26 Be Na hawa: hamosu dunu da hobea misunu hou olelesea,
amola Na da sia:ne iasu dunu amo Na ilegesu olelema:ne asunasisia,
Na da amo hobea misunu hou ba:la:lu
amola amo ilegesu dafawane ba:ma:ne hamosa.
Na da Yelusaleme amo ganodini dunu da bu esalumu,
Na da Yelusaleme fi ilima sia:sa.
Amola Yuda moilai huluane wali mugului diala,
da wa:legadole bu buga:le gagui dagoi ba:mu, Na da amo sia:sa.
27 Na da sia: afae fawane sia:sea, hano wayabo bagade da hafoga:i dagoi ba:sa.
28 ‡ 2 Hou Olelesu 36:23; Esela 1:2Na da Sailasema amane sia:sa,
“Di da Na ouligisu dunu esalumu. Di da Na hanai hamomu.
Dia sia:beba:le, Yelusaleme da bu gagui dagoi ba:mu.
Amola dia sia:beba:le, Debolo Diasu ea bai da bu legei dagoi ba:mu.”