4
Satan Yesu ari moikeinga akaiyom tei moingua ka kea ei tome
Mt 4:1-11; Mk 1:12-13
1 Ena Yoane Yesu nuwi mora bui tongoro Yai Gumam Muromom fure Yesu si di tongoro ena Yoran nuwi ma dere fungoro ena Murom Sumuna kon opom di tongoro ari moikeinga akaiyom tei furo 2 ena yo tei moingoro Satan yaromi ka kea ei te moingoro ena aro kakom 40 fume. Te kakom tei Yesu kua kopuna ta nekere ena okome kakom i mora goungoro Yesu meran goingoro 3 ena Satan yaromi “Ne Yai Gumam wam moranga kongo dunguai ne di erengere kopuna epemere darame,” epe di tongoro 4 ena Yesu ka mokom bairo Satan epe di tome: “Epe benaika faikeme. Ka mapunom epe dume: ‘Ari yokamai kua towane nowainga faikeme,’ dume,” di tome.*Diu 8:3 5 Di tongoro ena Satan yaromi Yesu akiro fu iwa furo ena kene kene wom eiro mangi ikom akaiyom muruwo opom di tero 6 “Na mangi ikinam akainam i muruwo nan kiapam yai moiye. Ena iran kiapam beikai yai ta ‘Towaiye,’ diro towaiye. Ena kiapam beikai te akainam tai ta ta dunguai muruwo erowaye.*Mt 28:18; Yo 14:30 7 Koma ne na kanam akire dowanga ena tai i muruwo ne tainum duwame,” di tongoro 8 ena Yesu ka mokom bairo Satan epe di tome: “Yai Gumam kam mapunom ama epe dume: ‘Ne Ari Wanopanum Yai Gumanum kam towane akire duwanie. Te ne yokamai yaromi towane kokonanom inanie.’ epe dungua iran i na ne nenen kanum akire di erekenaiye,” epe di tome.*Diu 6:13 9-11 Di tongoro ena Satan Yesu akiro Yerusarem tei furo Yura ari fi mun ei teinga iki ori biromdi kopu iwa de tero ena “Ka mapunom epe dume: ‘Yai Gumam nuwi kokonan gan yokamai ewi dowangoro ure ne kiapanum moraimie,’ epe dume. Te ka mapunom ama epe dume: ‘Yokamai okonomdi akore akire di erowaingoro ena kongo ta ne kaunum boikenanie,’ dungoro ne Yai Gumam wam moranga ena ne tawa arere moire ure sire ako mangi fo! Ne bei niki de erekenamie,” epe di tongoro*Sam 91:11-12 12 ena Yesu ka mokom bairo “Nemane. Kam mapunom ama epe dume: ‘Ne Ari Wanopanum Yai Gumanum ka kea ei tekeyo!’ dume,” epe di tongoro*Diu 6:16; 1 Ko 10:9 13 ena Satan ka kea ei tongua mapunom i muruwo mora goungoro ma dero “Okome na uro Yesu tokoi ka kea ei towaiye,” di firo fume.*Ip 2:18; 4:15
Ari iki birom ori Nasareti tei moinga yokamai Yesu mounom wako teime
Mt 13:53-58; Mk 6:1-6
14 Fungoro ena Murom Sumuna yoporam boingua Yesu tongoro inako dero Gariri man tei ikom akaiyomdi fungoro ena yaromi kam wayom Gariri man man tei muruwo fume. 15 Ena yaromi fu Yura ari yokamai ka nuwi si ereinga ikinom ikai fure ka nuwi si ere moingoro ena ari yai opai muruwo yaromi kam akire dime.
16 Ena Yesu kon koro koro furo okome fu iki birom ori Nasareti ume. Te koma yaromi gan gawo moingua Nasareti tei moi furo erowai tome. Ena yaromi iron kakom kakom ari ka nuwi si ereinga iki ikai funguamere ena epena ama epe furo arero “Yai Gumam kam mapunom kerowaiye,” di moingoro 17 ena yokamai ka mapunom yai Aisaiya boingua kam i di teingoro a fura dero epe boingua kanume:*Ais 61:1-2
18-19 Ari Wanopanom Murom Sumuna na moiki tei umie. Yaromi na gunom boi narongoro na fu ari guwai gai ako nekenainga kuwanom yokamai moraingi tei furo gunom kam di mari de erowaiye. Ena na fure ‘Kan iki fainga ari ne yokama kan iki fainga i ma dere mena fiyo! Te ari okonom murom gi dinga ne yokama tokoi kon kaniyo! Te ne yokamai kianom ari bei niki de ereinga akire di erowaika bire de erowaime. Te Ari Wanopanom ari akire di erowangua kakom umie,’ duwaro beika yaromi na nawi dome.
epe kanere kerere 20 ena a kumo siro tokoi pepa kiapam yai tero ame dongoro te ari yai opai ka nuwi si ereinga iki ikai tei moinga toren ikaneingoro 21 ena yaromi mapunom boiro “Epena na Yai Gumam kam i kereika ne yokamai fingai i mukom faimie,” di erongoro 22 ena yokamai muruwo “Yaromi kawom dumie,” diro te ka nokapu dungua inokore munmane eire “Aiya! Yaromi Yosefe wam moimba ka nokapu dumie,” epe dime.*Lk 3:23; Yo 6:42
23 Ena Yesu “Na mora fikai ne yokamai ka epe di narowaimie: ‘Nupi kiapam yaiyo, ne ganum nenen bei nokapu do! Te ne Kapanem tei ari bei erengamere epe ne nenen akainumdi tawa ama epe beyo! Ne benanga i no yokamai mora firapunie,’ epe di narowaimba 24 na kawom epe di ereiye: ‘Ka mapunom yai u ikomdi ure ka dungua ariyoma fi kun dai tekeimie,’ epe di ereiye. 25-26 Te na ka ta kawom epe di erowaiye: ‘Komariki yai Iraiya moingua kakom tei kamun kuwokawo fere dero nimi sikengua ena noniki suraiye furo te kapa okonom koro muruwo te okonom koro gam towane fungoro ena meran ori wom fuka diro man man fume. Te kakom i opai werai munmane Yuria ikinom akainom tei moimba Yai Gumam Iraiya yaromi awi dongoro fu Yura opai werai yokamai moingi tei kime. Ma deiyo! Yaromi awi dongoro fu opai werai ta moingui tei fume. Oparomi Yura opai moikemba Sairon ikinom akainom tei moiro te iki birom ori Sarefa tei kei faime.*1 Kin 17:1–18:1 27 Te okome ka mapunom yai Eraisa moingua kakom Yura ari mantai gainga yokamai munmane moimba Yai Gumam yokamai nenta bei nokapu de erekengoro nokapu moikeime. Ma deiyo! Yai Gumam Siria yai Neiman towane bei nokapu de tome,’ na epe di ereiye,” di erongoro*2 Kin 5:1-14 28 ena ari muruwo ka nuwi si ereingai ikom ikai tei moinga ka i firo nomanenom niki ori wom de fire 29 ena arere “No yokamai yaromi fiasi guwom dowaro bepunie,” diro Yesu akire gure mena dere akire fu kopu iki birom ori ta dungui tei fimba 30 Yesu yokamai moingi suna tei furo mora fu dome.
Yai ta murom niki dongua moi tongua Yesu bei de tome
Mk 1:21-28
31 Ena Yesu dere fu iki birom ori Kapanem tei fume. Kapaniyam ikinom i Gariri ikinom akainom suna tei dumie. Ena Yura ari iron kakom tei yaromi furo ari ka nuwi si erongoro 32 ena yaromi ka wau fike diro nuwi si erongua iran ari yokamai kam i fire ganom nouro dime.*Mt 7:28-29; Yo 7:46 33 Te yai ta Yura ari ka nuwi si ereinga ikinom ikai tei moime. Yaromi dem miriyom ikai koi Satan muromom niki dongua moi tongoro ena u ori wom boiro *Mt 8:29; Lk 8:28 34 “Aiya! Nasareti yai Yesuyo, ne no yokama tora bei norowaro une? Ne ure no yokama bei niki de norowanga i faikeme. Na ne moinga mapunom ekaniye. Ne Yai Gumam yo tongua yai moinie,” epe dungoro*Yo 6:69 35 te Yesu kura kam di tero “Ne ka dikeyo! Ne yaromi dem miriyomdi ma dero u mena fo!” di tongoro ena Satan murom bei moiro yaromi fiasi ari moingi suna tei de tomba bei niki de tekero u mena ume. 36 Ungoro ari muruwo ganom nouro dire nenen ka di ipo ka dero “Aiya! Yaromi ka yoporam boire te kiapam bengua kam diro murom niki deinga yokamai ka di erongoro u mena wime. Ena yaromi tora beire ka epe dume?” epe dime. 37 Ena iran Yesu kam wayom fu akai koro koro fume.
Yesu bei moiro ari munmane nupi fainga yokamai bei koi de erome
Mt 8:14-17; Mk 1:29-34
38 Ena Yesu ka nuwi si ereinga ikom tei ma dero fu Saimon ikom ikai fume. Ena Saimon imam biyai nowai ori gai iro gam murom sungoro yokamai Yesu “Oparomi akire di towane,” diro yana di teingoro 39 ena Yesu fu opai moingui teina tei furo arero moiro “Ne ganum murom sungua i mora gounamie,” epe di tongoro murom sungua mora goume. Ena kene kene wom eire oparomi arere kua kopuna kenom beire ari erome.
40 Ena okome aro u oropo taro naro bengoro ari bei moiro arinoma nupi mapunom mapunom fainga yokamai endire Yesu moingui tei wingoro yaromi okom ari yai opai moingi towane towane eiro tokoi bei nokapu de erome. 41 Te Satan murom niki deinga yokamai furo ari yai opai munmane denom minom ikai koi moinga ena dere u mena furo ka ori diro “Ne Yai Gumam wam moinie,” dingoro yaromi kura kam di erome. Yokamai mora fingai yaromi Yai Gumam “Ari akire di erowame,” diro awi dongua yaromi moingua iran Yesu bei moiro “Ka dikeiyo!” di erome.*Mt 8:29; Mk 3:11-12
Yesu Yura akai koro koro furo gunom kam di mari dome
Mk 1:35-39
42 Ena koimoi kamun takongoro Yesu akai tei ma dero akai ta ari moikeinga akaiyom tei fungoro ena ari yai opai yaromi wandou fure kanere moingui tei fure “Yaromi ema dero kiname,” diro “Tawa yo moro!” di teimba yaromi bei moiro 43 “E e, na furo Yai Gumam ari kiapanom bei erongua gunom kam ari koro koro muruwo moingi tei ama di mari de erowaiye. Yai Gumam na nawi dongua ka i di erowaro wiye,” dume. 44 Ena iran yaromi furo Yura ari man man muruwo moingi tei wan furo fu ka nuwi si ereinga iki iki ikai koi fure gunom kam di mari de erome.*Mt 4:23