2
God nɨp sabe gep
Manö hagnɨg gabin u anɨg göl mɨdöp: hon nɨbi bɨ gau magöŋhalö gasɨ nɨŋun, kalɨp God nɨp sabe gun; nɨbi bɨ gau kalɨp nan nɨhön mɨdagainɨm, God nɨp hag nɨŋun; nɨbi bɨ gau God kalɨp gɨ ñöm abad mɨd aij gɨnɨm, a gun, sabe gun; nɨbi bɨ gau magöŋhalö God nɨpe gɨ aij göp u gasɨ nɨŋun, God nɨp aij a gun. God nɨp hag nɨŋno, kiŋ gau abe, gapman bɨ kub gau abe, kalɨp magöŋhalö abad mɨd aij gɨnɨm. Anɨg gö me, hon agamɨj mɨd aij gun, God nɨp gasɨ nɨŋöl gɨ, gɨ aij göl gɨ mɨdeinabun. Anɨb unbö rö gɨnabun aij. God, Ud Kamɨŋ Yuep Bɨ hon u, nɨp u rö nöp aij gɨnab. “Yad nɨbi bɨ gau magöŋhalö ud kamɨŋ yunɨg gabin u, kale magöŋhalö manö aij yad u nɨŋ udöm, manö aij manö iƚ u nɨŋ aij göl,” a gɨ gasɨ u nɨŋöb.
Nɨhön gɨnɨg:
God añɨ ap nöp mɨdöp.
Pen Bɨ aŋ nɨbö u, u rö nöp añɨ ap nöp mɨdöp.
God böŋ lap mɨdöp;
hon nɨbi bɨ böŋ lap mɨdpun.
Pen Bɨ añɨ ap nöp nɨbi bɨ ud God aip jɨm ñɨnɨm rö löp.
Bɨ anɨbu Krais Jisas, nɨpe ke bɨ yabɨƚ ap.
Nan si nan naij nɨbi bɨ gau magöŋhalö gɨpal gau,
Krais Jisas nɨpe mab ba laŋ hañ romaŋ nɨpe ke udöm,
ilön kub udöm, umöm, pen kub hon anɨbu böŋ nöp raua.
Anɨb u, God hag la ñɨn u,
Krais Jisas ga anɨbu nɨbi bɨ nɨŋöm nɨŋ udnaböl gau,
nɨpe kalɨp magöŋhalö ud kamɨŋ yunab. * Ro 3:29-30; Gal 1:4
Adö anɨbu nöp, Krais Jisas yɨp hag lö, yad Jisas manö aij ud arep bɨ ap mɨdem, manö aij anɨbu nɨbi bɨ gau magöŋhalö hag ñɨ aij gem, Juda nɨbi bɨ wasö gau kalɨp Krais Jisas manö nɨŋö u hag ñɨ ajpin. Yɨp wög hag la anɨbu, nɨŋö yabɨƚ hagabin. * Ap 9:15; Gal 2:7-8; 2Di 1:11
Bɨ gau, ram mɨnöŋ magöŋhalö gau, bɨ rɨmnap kalɨp mulu lugagö, pen pen hagagöm, agamɨj jɨm ñöl nöp mɨdöm, pör nöp God hagöp rö nöp göm, nɨp ñɨmagö gɨlaŋ göl gɨ sabe gaiöl u, yɨp aij gɨnab.
Pen nɨbi gau u rö nöp agamɨj mɨd aij göl. Umagö kale malɨkagnaböl. Nan gol udöm kƚiñ aij gɨpal gau, aka bis kɨbap rö mani kub rauep gau, aka waƚɨj mani kub rauep gau yɨmagnaböl. Nɨbi nan aij aij hañ romaŋ yɨmbal gau, nɨbi bɨ rɨmnap hanɨp nɨŋlö aij gaŋ, a göm, gɨpal u, God nɨp aij gagöp. * 1Pi 3:3-5 10 Pen nɨbi God nɨp nɨŋ udun sabe gɨpun, a gɨpal gau, kale nɨbi bɨ rɨmnap gau kalɨp ud aij göm, wög rɨmnap gɨ ñöm, kalɨp gɨ aij göm, göl. Anɨg gɨnaböl u, God nɨp aij gɨnab. * 1Di 5:10
11 Bɨ gau God Manö hag ñaiöl u, nɨbi gau agamɨj mɨdöm, nɨŋ aij göl. 12 Yad nɨbi gau kalɨp hagɨn, kale God Manö bɨ gau kalɨp hag ñagnaböl; kale bɨ gau kalɨp abad mɨdageinaböl. Bɨ gau God Manö hag ñaiöl u, nɨbi gau kale manö rɨmnap hagagöl. * 1Ko 14:34 13 God Adam nɨp nöd gɨ löm, hainö nɨbi nɨpe Ip nɨp gɨ la. * Jen 2:7,21-22; 1Ko 11:8-9 14 God mab magö wasö ga u, kɨjaki manö piral hageia Adam nɨŋaga. Nɨbin Ip kɨjaki manö piral u nɨŋöm gɨ naij ga. * 2Ko 11:3; Gal 3:1-6 15 Pen nɨbi gau ñɨ pai yag dapöm, ana udöm, Krais Jisas nɨp nɨŋ udöl gɨ, nɨbi bɨ gau kalɨp mɨdmagö löl gɨ, Krais Jisas manö aij nɨpe hagöp rö nöp göl gɨ, gɨ mɨdeinaböl u, God kalɨp ud kamɨŋ yunab.

*2:6: Ro 3:29-30; Gal 1:4

*2:7: Ap 9:15; Gal 2:7-8; 2Di 1:11

*2:9: 1Pi 3:3-5

*2:10: 1Di 5:10

*2:12: 1Ko 14:34

*2:13: Jen 2:7,21-22; 1Ko 11:8-9

*2:14: 2Ko 11:3; Gal 3:1-6