10
Iesu Yana Vona Parisi Wayahia Eha Ta‑iakwa
Ka Iesu kadu Parisi‑naia vonei, ivona,
“Memeanina nuami vi‑tupatupa, kate avonemi taina deina. Aituhu aviyaivia yai nuanua sipiV ai yoko inuinu, ka aituhu eha gani awana wayahina ina‑nu, kate aituhu mani papanina wayahina ivane‑gwavi, akanai taui vivane tau vainau! Ka aituhu aviyaivia sipiV yai gani awana wayahina inuinu, taui vivane yai sipiV ai tau dune‑vi‑avina ahiahina. Wayahina, gani awana a tau dune‑vi‑avina awana waewaei taui wayahi, kadu sipiV ai tau dune‑vi‑avina inuinu, kadu taui yai sipiV ai wavea ihonehonei ivinꞌ‑omo. Kadu yai sipiV tau dune‑vi‑avina movi inononi, kadu tau dune‑vi‑avina‑naia ai pata etawana inaonaoi kadu yai sipiV ivinꞌ‑omo vuvunaha. Ka avaha sipi‑naiaV ivinꞌ‑omo, akanai sipi‑naiaV ai tau dune‑vi‑avina etawana inaonaoi, ka taui ineine, kadu yai sipiV ivi‑muniei. Iuna sipi‑naiaV avaha taui movi ianamane‑yehai. Ka tau dune‑vi‑avina yai sipiV eha nau‑wawani mani tomotau ivi‑munie. Ka vona ahiahina, avi tuta sipi‑naiaV mani tomotau movina inononi, akanai sipi‑naiaV ina‑novo, iuna tomotau tunina movina tunina, e sipi‑naiaV movina tunina eha itꞌ‑anamane.”
Iesu vona tana‑minikuna tanoi Parisi‑naia vonei, kate taui eha ita‑nua‑hau.
Wayahina, Iesu vona‑havinei, ivona,
“Memeanina nuami vi‑tupatupa, kate avonemi, yauke vivane awa sipiV wayahi. Nonova a itoava tuta ataina wayahina, tomotau habuhabui iomomo, kate taui vivane tau dune‑vi‑avina vitupu, kadu taui tau vainau. Wayahina, yau sipiV eha movi ita‑nononi. Ier 23:1-2; Ese 34:2-3. Awa aitamoata mamaei yau sipiV wayahi, ka yauke taua awa‑nana. Aituhu aviyaivia wayahiua inu‑me, akanai taui ito‑yavuha ivaniahei. Kadu tuta tuta sipi‑naiaV habuhabui inunu‑me kadu iopupu‑me, ka aniani ahiahina ivaniahei. 10 Kate Tau Vainau‑nana yana dewa taina. Tauna ya nuanua na‑omo, na‑vainau, ka na‑nau‑vi‑aniga, ka kadu vi‑goyo. Kate yauke aomo tanopia, iuna yau nuanua tomotau yawai‑hoina ivaniahei, kadu yau nuanua idewa‑haiawa‑iaua.
11 Yauke sipiV ai tau dune‑vi‑avina ahiahina. Iuna sipiV ai tau dune‑vi‑avina ahiahina yawaina awaehei nꞌ‑aniga yana sipiV wayahi. Sam 23:1; SiV 7:17. 12 Aituhu aviyaivia iomomo, ka aituhu eha yai sipiV, akanai taui tau paisewa ana heta. Ka taui ai nau‑pata ana heta wayahina ivi‑tau dune‑vi‑avina. Wayahina, avi tuta kedewa manimaninina na‑omo, ka avaha tau paisewa‑naia kedewana idueyei, akanai taui sipi‑naiaV ivenau‑tawanei, kadu inovonovo. Wayahina, kedewa manimaninina sipiV nau‑yavuyavu‑neiei, kadu tupwai na‑poyꞌ‑avini, na‑nau‑vi‑anigi. Dew 20:29. 13 Tau paisewa‑naia inovonovo ineine, iuna taui ai nau‑pata ana heta wayahina ipaipaisewa. SipiV‑naia vivane mani onoto yana sipiV, ka tau paisewa‑naia eha sipi‑naiaV ta‑dune‑nuanuaie.
14-15 Yauke sipiV ai tau dune‑vi‑avina ahiahina. Amau anamaneu, ka yauke kadu tauna anamanei. Ka yauke yau sipiV anamanei, ka taui kadu ianamaneu deina. Ka yawaiu awaehei, yau sipiV wayahi anꞌ‑aniga. Mat 11:27; 1Io 3:16. 16 Yau sipiV habuhabui imamaei. Ka tupwai eha sipiV taina ai yoko nihenina ita‑mamae. Taui ai yoko tunina, ka mani papania imamaei. Apaina kadu taui aomanei, e moviu inononi, kadu wayahiua inꞌ‑omo. Ka yoko‑nana yoko taina nui ivi‑yoko aitamoata, ka ai tau dune‑vi‑avina vivane aitamoata. Isa 56:8; Ese 34:23. 17 Amau dune‑nuanuaieu ahiahina, iuna yawaiu awaehei vivane anꞌ‑aniga. Kate apaina kadu yawaiu anꞌ‑epa‑havinei. Pili 2:8-9. 18 Eha aitam tomotau ana pata bagibagi‑tawaneu, e yawaiu nꞌ‑epe deina. Eha. Kate yauke taua au heta yau nuanua anꞌ‑aniga deina. Amau taua awaeheu, e yauke au heta yau aniga aveimeyei. Wayahina, nau‑wawaniu yawaiu abou‑ohoi, kadu nau‑wawaniu anꞌ‑epa‑havinei. Amau ya nuanua deina, kadu tauna ya vona‑dabadaba wayahiua boui deina.”
19 Ka avaha me Iudea Iesu ya vonana inononi, akanai matataui ivi‑vonavona‑havine ananina. Ka tana‑vewana wayahia vinꞌ‑omo‑havine. 20 Ka habuhabui yaiai wayahia ivonavona, “Nua gawagawamina aitam tauna veimeyei! Wayahina, tauna vi‑kwavakwava. Eha nau‑wawanika yana vona kanononi.”
21 Kate tupwai yaiai wayahia ivonavona, “Ya vonana tanoi eha nua gawagawamina yana vona deina. Medeina uvonavona nua gawagawamina ana pata tau mata‑goyo matana vo‑vi‑aiaia? Nua gawagawamina yai dewa eha deina.”
Me Iudea Iesu Ivihahaiei
22 Ka kwadudu ana tuta vinꞌ‑omo, e me Iudea yai dewa, e meagai Ierusalem nihenina aitam tonei idedewei. Tonei‑nana ana wava Manua Vito‑pota a Nau‑iaiava.a Tuta ataina wayahina me Iudea toneina ivi‑wahani movia Hanuka. 23 Ka Manua Vito‑pota a pai vi‑wauna aitam mamaei, e tomotau ivi‑wahani KiniV Solomoni Ya Pai Vi‑wauna. Ka pai vi‑wauna tanoi nihenina Iesu ni‑awana. 24 Ka me Iudea yai tau eta‑naonao ivinꞌ‑omo, e Iesu imini‑vivinei, e ivonei, ivona, “Tuta habuhabuna wamke evo‑vi‑tupatupai. Avi tuta wayahina wayahiaia ena‑vona tunutunuhina wayahim? Kaiwadi, taum vivane Tau Ito‑yavuha‑nana, o eha?”
25 Ka Iesu vonei, ivona,
“Avaha avonemi, kate eha uta‑vitumahaneu. Kadu yauke dewa‑bagibagi Amau a wavea apaipaisewei, ka dewaia kadu iviwavenemi yauke taua koiaka. 26 Kate eha uta‑vitumahaneu, iuna itomi eha yau sipiV. 27 Yau sipiV moviu inononi, ka yauke kadu taui anamanei, ka kadu taui ivi‑muni‑waiwaieu. 28 Yauke yawai‑vavaha avenevenei, ka eha ai pata inꞌ‑aniga. Ka eha aitam koiaka na‑bagibagi‑tawaneu, wayahina eha aitam koiaka ana pata yau sipiV nimaua na‑nemau. Ioni 3:16; 6:39. 29 Amau sipi‑naiaV veneu. Kadu Amau tomotau habuhabui bagibagi‑tawanei. Wayahina, eha aitam koiaka ana pata yau sipiV Amau nimana na‑nemei. 30 Yauke Amau ama inua aitamoata.”
31 Wayahina, me Iudea yai tau eta‑naonao hanu iepa‑havinei vivane yai nuanua Iesu inau‑vi‑anigi. 32 Kate Iesu wayahia ivona, “Amau awaeheu dewa‑bagibagi habuhabui kadu ahiahi adedewei, ka yauke avaha dewaia adedewei matamia. Wayahina, avi dewa, dewaia habuhabui wayahia, unuanua dewa goyona, e nau‑wawanimi ututu‑hanuhanu?”
33 Wayahina, me Iudea Iesu ya vonana inau‑patei, ivona, “Eha yam dewa ahiahi wayahi avunum, kate yam awa‑viaoha Yaubada wayahina avunum! Iuna wamke onoto‑hoim, kate evonavona vivane wamke Yaubada!” Lev 24:16.
34 Ka Iesu nau‑patei, ivona,
“Ami veimea nihenina ivona deina,
 
‘Avaha avona, itomi yaubada.’ Sam 82:6.
 
35 Habuhabuka avaha kanamanei Iginuma ya viwavenena habuhabuna tunutunuhina, eha vitupu. Ka Yaubada ivona aituhu aviyaivia yana vona ivitumahanei, akanai taui ‘ivi‑yaubada,’ iuna yawai‑vavaha ivaniahei. 36 Yauke taua medeina? Yaubada vi‑nua‑dadaneu, kadu vi‑tuneu aomo tanopia. Ka yauke avonemi, avona, ‘Yauke Yaubada Natu‑hoina.’ Kate aviani iuna unuanua yauke yau vona wayahina awa‑viaoha Yaubada wayahina? 37 Aituhu yauke eha Amau ya paisewa apaipaisewa, akanai nau‑wawanimi eha uvitumahaneu. 38 Kate aituhu yauke Amau ya paisewa apaipaisewa, akaka nau‑wawanimi paisewa‑naia ahiahi uvitumahanei. E ami pata unꞌ‑anamane‑vidohei, Amau yauke niheniua mamaei, kadu yauke Amau nihenina amamaei.” Ioni 14:10-11.
39 Wayahina, me Iudea‑naia idewa‑dadani‑havine ipoyꞌ‑avini, kate itutu‑haini, e tauna novo‑tawanei.
40 Wayahina, Iesu inei Daudau Ioridani, e one‑tamanei. Nonova papani‑nana Ioni Tau Bapitaiso ya pai bapitaiso. Ka tanoi wayahina Iesu mamaei. Ioni 1:28. 41 Papani‑nana wayahina tomotau yoko Iesu wayahina iomomo, ka matataui ivonavona, “Ioni Tau Bapitaiso eha aitam dewa‑bagibagina ta‑paisewe, kate Ioni yana vona habuhabuna onoto‑nana wayahina vona tunutunuhina.” 42 Ka papani‑nana wayahina tomotau yoko Iesu ivitumahanei.

10:8: Ier 23:1-2; Ese 34:2-3.

10:11: Sam 23:1; SiV 7:17.

10:12: Dew 20:29.

10:14-15: Mat 11:27; 1Io 3:16.

10:16: Isa 56:8; Ese 34:23.

10:17: Pili 2:8-9.

a10:22: Tuta ataina wayahina me Iudea toneina ivi‑wahani movia Hanuka.

10:28: Ioni 3:16; 6:39.

10:33: Lev 24:16.

10:34: Sam 82:6.

10:38: Ioni 14:10-11.

10:40: Ioni 1:28.