NKALÁSIYA
Nkalásiya Wee u kwo p꞉aa páádi a tóó, Antiyóka ngmê, Yikóniyêm myomo, Lisitîda pyolo, Ndêêpi podo. Póól pini dê Mbanapas yi p꞉aani páádi knî yi k꞉oo lee knopwo, Yesu p꞉uu y꞉i ye dpîmon꞉aa danêmbum. (Dpodo 13:1414:20) Yi p꞉aani páádi knî yi k꞉oo Nju pi knî ngmê Yesu ka kêlîmî mbê dniye, yélini daa Nju tpémi, yilî mye kêlîmî mbê wo. U kuwó dini ghi ngê Póól Mbanapas y꞉oo yi yéli a kuwo tumo, Sidiya wee u kwo mê diyé knopwo.
Póól p꞉aani p꞉aani dpîmon꞉aa dpodo ee, u kuwó dini ghi ngê Nkalásiya tpémi yi p꞉uu kópu ngmê nyongo. Kópuni nyongo, yi kópu ala. Nju pi knî ngmê, Yesu u yoo vy꞉o n꞉ii ghê dniye, Nkalásiya tpémi ye ala kópu dnyimon꞉aa tpapê, yipu, Nju pi ngê pyaa dmyeno, Chóó Lémi u l꞉ii nmyi p꞉uu dpî kaa we, Mósisi ngê dêêpî kópuni a d꞉êê too, yintómu dmyinê chââchââ dé. Yipu, Póól ka namê ng꞉aa, Yesu p꞉uu dêpwo a ya. Yipu, Pita, Njems mbwémi Njon ye yidmyinê ng꞉aa, Yesu p꞉uu vyîlo dé yidnya a ya. Nkalásiya tpémi woni knî y꞉oo yi yéli yi dnye dmi ny꞉ee ngópu.
Póól ngê u yi u ngwo doo kwo, Nkalásiya tpémi yi nuw꞉o dmi nî wáti té, u l꞉êê dîy꞉o ala pweepwee pee ye dy꞉ââ ngê. Chóó daa d꞉êê ngê, ngmênê kópuni doo tpapê dé, u pyipe ngmê ngê doo d꞉êêd꞉êê dé. Yi kópu dyuu ala.
1
Nê Póól, Yesu Kédisu u dyépi ngmê. Daa a chóó u dyépi ngê nî pyodo, myenté daa pi ngê u dyépi ngê yinê pyódu noo, ngmênê nmî Mî Chóó Lémi, n꞉ii ngê nmî Lémi Yesu Kédisu kpêênî mêdê pyidu ngê, yi dyépi ngê y꞉oo a pyódu noo. * Nkal 1:11-12 Yélini Yesu u yoo vy꞉o nmyinê ghê dniye, Nkalásiya Wee u kwo, ala pweepwee pee nmye nînê dyede. Nmyi tîdê mbwó yoo, yélini yi k꞉ii nmo pyede, yi mb꞉aamb꞉aa nmye da dy꞉ââ ngmê.
Nmî Mî Chóó Lémi, nmî Lémi Yesu Kédisu u k꞉ii, dny꞉oo a ngêêpî nmyo, mb꞉aamb꞉aa ngê nmye myedny꞉oo a vyuwo. Nmî Lémi ngê nmî dono knî yi l꞉êê dîy꞉o chóóchóó y꞉ângo, mu kópu u dîy꞉o u yi u ngwo doo kwo, Dono kwulo nê pw꞉ii té. Yi ngwo nmî Mî u pono a vyápê wo. * Nkal 2:19-20; Taitas 2:14 Yi kópu u l꞉êê dîy꞉o pi knî y꞉oo nmî Mî adnyi chaa kîgha, chedê ngê daawa pyódu. Ndê kópu yila.
Nmî Lémi p꞉uu kópu dyuu ngmêêpî, u danêmbum
Nkalásiya tpémi, dmyinê ngwéti nê. N꞉ii ngê Yesu Kédisu kóó k꞉oo kaa nmyoo, Chóó Lémi, lukwe dîy꞉o lîmîlîmî ngê dmyinê kuwo ngmê. Lukwe dîy꞉o kn꞉aa yéli yi kópu knî ye nmyi ng꞉aa mbê dniye. Nmî Lémi p꞉uu kópu ndêndê mu ngmidi nmye kîny꞉uu vyu, ngmênê pi ngmê knî y꞉oo nmyi némi dmi wumê dyede tumo, u yi y꞉e a kwo, Yesu Kédisu u kópu dyuu nmî ngmêê. * Dpodo 15:1,24 N꞉ii ngê kn꞉aa kópu nmye angmêmî vyi knomomê, Chóó Lémi ngê d꞉ud꞉umbiy꞉e wa dyênê. Kn꞉aa kópu nmye anm꞉uu vyi knomomê, ye Chóó Lémi ngê wa dyênê nmo, myenté enjel ngmê ngê kn꞉aa kópu nmye angmêmî vyi knomomê, ye Chóó Lémi ngê wamye dyênê. * 1 Kódin 16:22 Yi kópu wunê nmye kîny꞉uu vyu, ala ngwo mênînê tpapê, kópu dyuu ndêndê ka nmyi kêlîmî mbê dniye, n꞉ii ngê kn꞉aa kópu nmye angmêmî vyi knomomê, Chóó Lémi ngê d꞉ud꞉umbiy꞉e wa dyênê.
10 Lukwe, nmyinê nmye nê ngê u yi u ngwo a kwo, Yoo yi nuu u pi ngê nî pyódu? Kêle, u ya a nga a kwo, Chóó Lémi u nuu u pi ngê nî pyódu. U ya a nga wodoo kwo, Yoo yi nuu u pi ngê nî pyódu, ye Yesu Kédisu p꞉uu dpodo pyu ngê daapînê pyodo. * 1 Tes 2:4
Póól ngê kópu dyuu n꞉ii dpîmon꞉aa tpapê dé
Dpodo 8:3; 9:1-30
11 A tîdê mbwó yoo, ala kópu nmyi lama choo a ya. Kópu dyuu n꞉ii nmye n꞉uu vyi too, a chóó a mênê dêp꞉a ngî too, * Mát 16:17 12 mye daa pi ngê a ka yinê vyi too, pi p꞉uu myedênoon꞉aa ndiye. Kêle, Yesu Kédisu ngê a lama yinê kalê too.
13 Yesu u yoo vy꞉o ghêlî dêp꞉angê ghê wo, kópuni noo a d꞉uud꞉uu dé nmyi lama kîyedê pyede. U ya a nga doo kwo, Yesu u kwee nî châpwo, u yoo chedêchedê nî chedê. Yi kópu u l꞉êê dîy꞉o nîmon꞉aa mgîmîmgîmî dé, yi kpadakpada têdê nîmo ńeńe dé. * Dpodo 8:3 14 Nju tpémi yi vy꞉o yélini yi k꞉ii kwodonkwodo nmee a kaakaa, yi yéli yilî nî t꞉ee kwólu. Nmî kn꞉ââ yoo yi dêêpî kópu dyuu ntênê noo a chââchââ dé, yi chââchââ têdê nî t꞉ee kalê too. * Dpodo 22:3
15 Ngmênê Chóó Lémi ka nê ch꞉anê wo, niye mênê noo a kwo, u ngwo a ngmidi noo, * Is 49:1 16 mu kópu u dîy꞉o apê, Nê a Tp꞉ee p꞉uu pîchoon꞉aa danêmbum, yélini daa Nju tpémi, yi yéli ye pîchoon꞉aa danêmbum. Dini ghi n꞉ii ngê Tp꞉oo a ka a kêma ngê, yi kópu p꞉uu pi ngmê ka dîpî póó wo. * Dpodo 9:3-6 17 Njedusalem dîpî n꞉ee, yélini Yesu u dyépi ngê a kada a pyaa dniye, ye myedîpî póó wo, ngmênê Alépiya Wee u kwo pi kwéli dêpwo a ya, y꞉i noon꞉aa a nuw꞉o, u kuwó dini ghi ngê Dîmaskîs nî diyé wo. 18 M꞉ââ pyile mî loo, Njedusalem u ngwo nî loo, Pita n꞉uu módu, wiki miyó u kwo noon꞉aa ya. 19 Yesu u dyépi dîpîm꞉uu módu, ngmênê Njems ngmidi nî módu, nmî Lémi u mbwó. * Mát 13:55
20 Kópuni nmye d꞉a vyi té, ndê kópu dé, Chóó Lémi u ngîma nmye dênînê k꞉omodanê.
21 U kuwó dini ghi ngê Sidiya Wee Silisiya Wee yi kwo noon꞉aa dpodo. 22 Yi ngwo Njuda Wee u kwo yélini Yesu u yoo vy꞉o dnye kwo, yi lama dênoo ya. 23 Dpodoni nîmon꞉aa dódó dé, dnyimo nyepênyepê dé, numo ka yipu, Pini n꞉ii ngê dpîmo a kpakakpaka nmo, ala ngwo nmî Lémi u kópu dyuu pi knî ye mêmînê tpapê té. 24 A l꞉êê dîy꞉o nmî Mî dnyimo chaa kîgha.

*1:1: Nkal 1:11-12

*1:4: Nkal 2:19-20; Taitas 2:14

*1:7: Dpodo 15:1,24

*1:8: 1 Kódin 16:22

*1:10: 1 Tes 2:4

*1:11: Mát 16:17

*1:13: Dpodo 8:3

*1:14: Dpodo 22:3

*1:15: Is 49:1

*1:16: Dpodo 9:3-6

*1:19: Mát 13:55