2
1-2 Sou 20:11Ibu 4:4,10Side bani'odi abama, fwayafwaya wata naninidi nagedie taiadi i 'idewa'a'avadi, bega 'aiata 'ana ve-7 'waineye Yaubada bei i veawai. 3 Yana 'idewadewa wata yana folova i ve'a'avaiga, i veawai, begaidi Yaubada 'aiatanina i vesauluva-'atumaieni wata i vetabuya taunina faifaina.
Yaubada tomogo wata vavine i 'idewadewadi
4 Side bani'odiga 'Auvea Yaubada abama wata fwayafwaya i 'idewadiga 'ana veifufu.
7 1 Kol 15:45'Auvea Yaubada tomogo i 'idewai fwayafwaya 'aufofoualina 'wainega, yawaina i yuvedamani i luku kabunineye nika tomogo i tovoi ma yawaina. 8 I 'a'avana, 'Auvea Yaubada bakula 'ana 'isa 'atumaiotogina i bakuli inala lakavinega 'ana wagava Ideni, nika tomogonina i 'idewaiga i naweni bei i na mia. 9 Ve 2:7; 22:2,14'Auvea Yaubada yana veimea 'wainega, welavi tulina tulina i ve'alatabotabo fwayafwayayega, welavinidi 'adi 'isa 'eba nua'ewa we'e vuagidi 'atumaiotogidi 'eba 'ani. Bakulanina kamwaneye welavi 'ailuga i tovotovoi, tamu 'ana wagava Mia-vagata 'ana Welavi we'e 'ana veluga 'ana wagava 'Aseta 'ana Welavi, 'Atumaina wata Sakoina faifaidi.
15 'Auvea Yaubada tomogo i naweni bakula Ideni 'waineye i valovei bega i na veto'isave'avina wata bei i na folofolova. 16-17 We'e 'Auvea Yaubada tomogo i voneni i vo, Bakula nageneye welavi fuedi i tovotovoi 'omu yavuyavumu 'waidiega 'u na 'ani'ani siwe 'Aseta 'ana Welavi, 'Atumaina wata Sakoina faifaidi vuagina kebu 'u na 'aniaga. 'Ai'edi 'u na 'aniaga, 'u na wafaotoga.”
18 Mulieta 'Auvea Yaubada i vo, Kebu 'ana 'isa 'atumaina tomogo 'aisena i na miamia, 'ana 'au a na 'idewai 'ana to'aivaita.” 19 'Aisaya wata manuga 'Auvea Yaubada i 'idewadi fwayafwaya 'wainega, matatabudi i miedi Adama 'waineye. Nuanuana i na 'asetai ava'ai wagavaga Adama i na goledi. 'Aisayanidi 'adi wagava Adama i velediga, 'asa'aiana 'adi wagavanidi. 20 Bega tomogo 'aisaya tauvanuga, walawala'ai wata manuga 'awasasa'aveye, 'aitamogana 'aitamogana 'adi wagava i goledi. We'e Adama 'aisena kebu 'ana 'auga i na 'i'ivaiseni. 21 Begaidi 'Auvea Yaubada tomogo i luve'enovi nika i 'enowafa. Tutuyanina i 'eno'eno lumalumana i siyo'ei wata 'awasasana vigonega i yatobodai. 22 Lumalumananina 'Auvea Yaubada tomogo 'wainega i 'ewaiga bega vavine i 'idewai. I 'a'avana vavine i mieni tomogo 'waineye. 23 Nika tomogo i vona i vo,
De'e kumanina be'ama yau luluku 'wainega i souyeni,
Wata vigoku 'wainega bani'odi.
'Awaie i na goleni 'ana wagava Vavine,
fai tomogo 'wainega i souyeni.”
24 Mad 19:5; Mak 10:7,8; 1 Kol 6:16; Efe 5:31Side lamunanina bega iaveta tamadiavo wata inadiavo 'waidiega i na 'a'awa'ididi, ma'itufa yadi vevinevo taiadi i na luluvetubama nika i na veve'aitamoga.
25 Tomogo ma yana vavine 'adi 'ailuga konekonedi siwe kebu i da bunumayaga.