4
Seitani Iesu i silubuya
(Malika 1:12-13; Luke 4:1-13)
1-2 Ibu 2:18,4:15 Ufa Iolidani 'waineye i bafitaiso i 'a'ava, Yaubada 'Anu'anununa Iesu i vagavaia i naweni sali'avu'avuye bega yaiaina 'adi to'edakumeta Seitani Iesu i na silubuya nuanuana i na sakona. Sali'avu'avuye Iesu i miamia 'aiata 40 nika i lase fai kebu tamu sai'afo 'ani'ani i da 'ania. 3 Tutuyanina Iesu i lase nika bei Seitani i souyeni 'waineye, i voneni i vo, 'Ai'edi 'omu mogitana Yaubada Natuna, 'u na vona de'e kileunidi i na ve'ani'ani.” 4 VeL 8:3Iesu Seitani yana vona i tutuli i vo, Kebu. Basenadi i kilumi Yaubada yana Buki nageneye i vo,
Tomotoga yadi mia 'ana 'atumaina kebu 'ani'ani'ava 'wainega i da veveluagadi.
We'e mogitana Yaubada yana Vona i voneyediga, 'waidiega tomotoga yadi mia 'ana 'atumaina wata yawaidi i na veluagadi.’ “
5 I 'a'avana wata Seitani Iesu i vagavaia i naweni Ielusalema, Vanuga 'Eba Velu'ui tabwaotogineye i lakaveni. 6 Sam 91:11-12Bei wata i voneni i vo, 'Ai'edi mogitana 'omu Yaubada Natuna de'e bega 'u na souga, veviga kebu 'u na veluagai fai Yaubada yana Buki nageneye i vo,
Yaubada yana anelose i na vonedi i na 'i'ita'ita'iemu,
nimadiega i na silakaimu bega kebu tamu sai'afo 'agemu 'u na nikeyedi kileu 'waidie.’ “
7 VeL 6:16Iesu Seitani yana vona i tutuli i vo, We'e Yaubada yana Buki 'waineye i vo, 'Ai'edi taunimi 'wa na tauyemi 'eba ilagi 'waidie, kebu i da lubwainemi 'Auvea yami Yaubada 'wa na sitonovi 'ami 'ita'ita'i faifaina.’ “
8 I 'a'avana Seitani Iesu i vagavaia i lakaveni 'oya manamanaweotogina tabwaneye, fwayafwaya yana 'eba veimea wata yana 'ai'aiwabu matatabuna i veni. 9 I veni i 'a'avana i voneni i vo, 'Ai'edi ma yamu ve'ililibu 'u na lumata'afufu 'u na 'odu 'waikuye, de'e 'eba veimeanidi wata 'ai'aiwabunidi matatabuna a na velemu.” 10 VeL 6:13Seitani i vonavonaga nika Iesu i vo, Seitani 'asa'aiana 'u 'ailove 'u nago. Fai Yaubada yana Buki nageneye i vonaga i vo,
'Auvea yami Yaubada 'waineye 'wa na 'odu'odu,
wata 'aiseotogina faifaina 'wa na folofolova.’ ”
11 Seitani i tauya i nunago nika anelose i souyeni Iesu i 'i'isave'avini.
Iesu yana folova i velamu Galili 'waineye
(Malika 1:14-15; Luke 4:14-15)
12 Mad 14:3; Mak 6:17; Luk 3:19-20Tutuyanina Iesu vala i nogai Ioni 'akonadi vanuga yogona nageneye i yatoi Kini Elodi i lumataniga faifaina, bega Iesu i tovoi i nago 'awalawa Galili. 13 Ion 2:12Nagami i nago Nasaledi mulieta 'atamananina i 'iaweni i nago Kafaneomi yana 'atamana 'ivauna i vili bei i miana. 'Atamananina Lavu Galili lilivaneye, 'awalawa Sebuloni wata Nafitalai nagedie. 14 Naninina faifaina Yaubada yana tolu'ivona Aisea basenadiotoga i vona-samulaga 'ana mogitana i souyeni i vo,
15 Ais 9:1-2Sebuloni wata Nafitalai yadi fwayafwaya 'eda bwaikina lilivaneye,
'edanina balabala wata Ufa Iolidani kamwadiamo,
i nagoga 'ana tugusa Galili 'waineye,
'awalawanina bei mali tomotoga kumanidiavo kebu Diu i miamiani.
16 Tomotoganidi i nunagoi dudubala nageneamo,
mageta mataududulina i 'iseni.
We'e egavo dudubala 'wau'waugaotogina nageneye i miamianiga,
magetanina i magesedi.”
17 Mad 3:2Tutuyanina Iesu i vilai i mai Galili i miamia bei yana lau'age i velamu i vo, 'Wa na nuavilami yami sakona 'wa na vedumwe'ubu'ubusedi fai sai'afoga Yaubada yana veimea i na souyeni 'waimie.”
Iesu toyaubani 'adi 4 i venua'ivinedi
(Malika 1:16-20; Luke 5:1-11)
18 Tamu 'aiata Iesu i balabala Lavu Galili balebaleamo tomotoga 'adi 'ailuga i 'isedi, Saimoni tamu 'ana wagava Fita wata taina Anidulu, vuatayega igana i 'ona'onadi fai taunidi toyaubani. 19 Iesu i vonedi i vo, We'e yaubaninina 'wa baileni, 'wa na maia 'wa na vetovetutuyama 'waikuye, yau tamu yaubani a na vemi bega tomotoga 'wa na 'ona'onadi 'wa na mimaiedi Yaubada 'waineye.” 20 Nika Saimoni wata Anidulu vualalalakana i bailedi Iesu taiadi i nagoi i na vetovetutuyama 'waineye.
21-22 Sai'afo i vaganago nika Sebedi ma natunavo i 'isedi, Iemesa wata Ioni yadi wakeye yadi vuata i agiagilidi. Ma taina Iesu i vonedi i vo, 'Wa maia,” nika tamadi ma wakana i bailedi Iesu taiadi i nagoi i na vetutuyama 'waineye.
Iesu i ve, i lau'age wata i 'ive'atumai
23 Mad 9:35; Mak 1:39Iesu toyaubani i venua'ivinedi i 'a'avana i nago 'awalawa Galili 'waineamo, yadi 'eba miava'auta 'waidie i veve. Vala 'Atumaina Yaubada yana veimea faifaina i lalau'age, wata tomotoga fuedi 'adi viga tulina tulina i 'ive'atumaidi. 24 We'e tomotoga fuedi 'awalawa Silia nageneye Iesu valana i nogai bega yadi toviga 'adi viga tulina tulina i miedi 'waineye. 'Ifwaidi tomotoga i veveviga bwaikina, 'ifwaidi yaiaina sakoidi i agedi, 'ifwaidi viga tamu 'wainega i alala wata 'ifwaidi bwalobwalokodi, matatabudi Iesu i 'ive'atumaidi. 25 Tomotoga fueotogidi Iesu i yogo'waili, kumanidiavo i maia Galiliega, 'awalawa Dekafolisi 'wainega, Ielusalemayega, Iudiayega wata Ufa Iolidani vi'ainega i damanama.