1 Ho꞉len no amio꞉, Ya꞉su eyo꞉ enedo꞉ tili wida꞉sen kalu kugula꞉fo꞉wo꞉ kegenelia꞉sa꞉ga꞉, iliyo꞉ mama mogago꞉wo꞉ tambo o꞉lusanaga꞉felema꞉ki, a꞉la꞉ta꞉ga꞉ walaf ko꞉li ko꞉lilo꞉lo꞉ a꞉lab a꞉no꞉lo꞉ falele alifelema꞉ki, halaido꞉wo꞉ imo꞉ dimi. 2 Iliyo꞉ kaluka꞉isalemo꞉wo꞉ Godeya꞉lo꞉ bo꞉fo꞉mela꞉nigab a꞉no꞉ widaki, a꞉la꞉ta꞉ga꞉ walaf ko꞉li ko꞉lilo꞉ a꞉lab a꞉no꞉ falele alifelema꞉ki iliga꞉fo꞉. 3 Luk 10.4-11Ya꞉su eyo꞉ iyo꞉ iliga꞉takiyo꞉ a꞉la꞉sio꞉, “Gio꞉ ha꞉nakiyo꞉, kelego꞉ nolo꞉ dia꞉ha꞉na꞉so꞉bo. Ido꞉mo꞉, aso꞉, ma꞉no꞉wo꞉, moleyo꞉, a꞉la꞉ta꞉ga꞉ helebeso꞉g sa꞉ga꞉lema꞉no꞉ ko꞉li nowo꞉ dia꞉ha꞉na꞉so꞉bo. 4 Gio꞉ ha꞉na꞉sa꞉ga꞉, amisa꞉na fa꞉la꞉dowakiyo꞉, gio꞉ a gelo꞉ fa꞉la꞉dowab imilig a꞉naka sa꞉ga꞉, gio꞉ amisa꞉n a꞉no꞉ ta꞉ta꞉ga꞉ ha꞉naki a꞉na eda꞉bi. 5 Ge amisa꞉na fa꞉la꞉dowo꞉ amio꞉, kaluka꞉isale iliyo꞉ gio꞉ migi widalega, giliyo꞉ amisa꞉n a꞉no꞉ mogago꞉ da꞉fe alitakiyo꞉, gili gido꞉fo꞉ amilo꞉ hena꞉mu bo꞉lo꞉ a꞉no꞉ a꞉naka fifila꞉sa꞉ga꞉ ta꞉fo꞉ ha꞉na꞉bi.” 6 A꞉la꞉wida꞉sa꞉ga꞉yo꞉, iyo꞉ ha꞉na꞉siakiyo꞉, Godeya꞉ to nafa a꞉no꞉ amisa꞉n nowa wida꞉liki, nowa wida꞉liki a꞉la꞉i ha꞉nakiyo꞉, kaluka꞉isale walafdo꞉ a꞉lab a꞉no꞉ falele alifela꞉i ane.

7 Madi 16.14,Mak 8.28, Luk 9.19A꞉la꞉fo꞉ko꞉lo꞉ amisa꞉n a꞉namilo꞉ dimida꞉i ane a꞉no꞉, Ga꞉lili misa꞉ kalu Ha꞉lod e da꞉da꞉sa꞉ga꞉yo꞉ kele asulo꞉. Mo꞉wo꞉ kalu nolba꞉ sa꞉lakiyo꞉, “Yo꞉n ho꞉n amilo꞉ to꞉lolan kalu a꞉no꞉ a꞉ma꞉la꞉ dasi ko꞉lo꞉lab” a꞉la꞉sio꞉. 8 A꞉la꞉ta꞉ga꞉ kaluka꞉isale nolba꞉yo꞉ “Elaiya e a꞉ma꞉la꞉ handalowaki dimidab.” A꞉la꞉ta꞉ga꞉ nolba꞉yo꞉ “Godeya꞉ tolo꞉ dinali sa꞉lan kalu, mo꞉lulo꞉ elen a꞉no꞉ ko꞉lo꞉ a꞉ma꞉la꞉ dasilia꞉ga꞉ mio꞉lo꞉b” a꞉la꞉sa꞉la꞉li ane. 9 Luk 23.8Ko꞉sega Ha꞉lod eyo꞉ a꞉la꞉sio꞉, “Niyo꞉ Yo꞉n e ko꞉la꞉fo꞉ gedela꞉ ko꞉m ko꞉lo꞉, to nelo꞉ da꞉dab we abe dimidaba?” Eyo꞉ a꞉la꞉asulakiyo꞉, Ya꞉su e ba꞉ba꞉no꞉ asulo꞉.

10 Iliga꞉felo꞉ kaluwo꞉ a꞉ma꞉la꞉ kegeakiyo꞉, ililo꞉ dimido꞉ a꞉no꞉ tambo Ya꞉sumo꞉ malolo꞉ me. A꞉la꞉ta꞉ga꞉ Ya꞉suwa꞉ enedo꞉ tili wida꞉sen kalu a꞉no꞉ egelese doma꞉ki, iyo꞉ tililia꞉ga꞉ Besaida a꞉na ane. 11 Ko꞉sega kaluka꞉isale kegeo꞉ a꞉no꞉ Ya꞉sulo꞉ ane a꞉no꞉ da꞉da꞉sa꞉ga꞉yo꞉, iyo꞉ e kudu ha꞉na꞉sio꞉. Elo꞉wa fa꞉la꞉dowabikiyo꞉, Ya꞉su eyo꞉ imo꞉wo꞉ sagalakiyo꞉, Godeya꞉lo꞉ bo꞉fo꞉mela꞉nigab to a꞉no꞉ widaki, a꞉la꞉ta꞉ga꞉ walafdo꞉ a꞉lab kaluka꞉isale a꞉no꞉lo꞉ falele alifelo꞉.

12 Ga꞉lo dowabiki, enedo꞉ tili wida꞉sen kalu kugula꞉fo꞉ a꞉no꞉ elo꞉wa ya꞉sa꞉ga꞉ a꞉la꞉sio꞉, “Nio꞉ kalulo꞉ma hena so꞉bo꞉lo꞉biki, kaluka꞉isale kegeo꞉ we ma꞉no꞉ ma꞉no꞉wo꞉ a꞉la꞉ta꞉ga꞉ a alima꞉no꞉wo꞉ kelema꞉ki, amisa꞉n anib amilo꞉ kandayo꞉ a꞉na iliga꞉felema.” 13 A꞉la꞉sa꞉labiki Ya꞉su eyo꞉ a꞉ma꞉la꞉bo꞉ a꞉la꞉sio꞉, “Ma꞉no꞉ ilido꞉ ma꞉no꞉wo꞉, gili dimina.” Iliyo꞉ a꞉ma꞉la꞉ sa꞉lakiyo꞉, “Niliyo꞉ falawa dowo꞉fa꞉ bila꞉fo꞉ a꞉la꞉ta꞉ga꞉ ka꞉ a꞉la꞉ a꞉no꞉ko꞉ da꞉lab. Kalu modo꞉ kegeo꞉ wema꞉lo꞉ ma꞉no꞉wo꞉ nili kililima꞉ki asulaya?” 14 Ilido꞉ a꞉la꞉do꞉ sio꞉wo꞉ mo꞉wo꞉ we, kalule kegeo꞉ a꞉no꞉ daosen bila꞉fo꞉ ko꞉lo꞉ sen. Ko꞉sega Ya꞉su eyo꞉ tili wida꞉sen kalumo꞉wo꞉ a꞉la꞉sio꞉, “Giliyo꞉ kaluwo꞉ aloba꞉daki a꞉namio꞉, do꞉la꞉fo꞉ bila꞉fo꞉ a꞉la꞉ta꞉li hamana.” 15 A꞉la꞉sa꞉labiki iliyo꞉ a꞉la꞉dimida꞉sa꞉ga꞉, kaluka꞉isaleyo꞉ tambo hena sen. 16 Ya꞉su eyo꞉ falawa dowo꞉fa꞉ bila꞉fo꞉ o꞉lia꞉ ka꞉ a꞉la꞉ o꞉lia꞉yo꞉ dia꞉sa꞉ga꞉, akino꞉ alolo bo꞉fo꞉liki, mada o꞉m a꞉la꞉dulugu sa꞉la꞉sa꞉ga꞉yo꞉, ma꞉no꞉ a꞉no꞉ aloba꞉da꞉sa꞉ga꞉, kaluka꞉isalemo꞉ sagama꞉ki, enedo꞉ tiliwida꞉sen kalumo꞉ dimi. 17 Kaluka꞉isale kegeo꞉ a꞉no꞉ ma꞉no꞉wo꞉ tambo o꞉li na꞉sa꞉ga꞉ ililitabiki, ma꞉no꞉ heb ta꞉felab a꞉no꞉ enedo꞉ tili wida꞉sen kalu iliyo꞉ kegeo꞉ amio꞉ fafowo꞉ kugula꞉fo꞉ ko꞉lo꞉ wa꞉litabi difa꞉.

18 Ho꞉len no amio꞉ Ya꞉su e dulugu sa꞉la꞉labiyo꞉, enedo꞉ tili wida꞉sen kalu a꞉no꞉ko꞉ e o꞉lia꞉ ka sen ko꞉lo꞉, Ya꞉su eyo꞉ imo꞉wo꞉ a꞉la꞉dabu ba꞉ba꞉, “Kaluka꞉isale kegeo꞉ a꞉ma꞉yo꞉ ne kalu o꞉bka꞉ a꞉la꞉sa꞉laba?” 19 Luk 9.7-8Iliyo꞉ a꞉ma꞉la꞉ sa꞉lakiyo꞉, “Kalu nolba꞉yo꞉ ge Yo꞉n ho꞉n amilo꞉ to꞉lolano꞉ ge a꞉la꞉sio꞉. Nolba꞉yo꞉ ge Elaiya a꞉la꞉sio꞉. A꞉la꞉ta꞉ga꞉ nolba꞉yo꞉ ge Godeya꞉ tolo꞉ dinali sa꞉lan kalu, mo꞉lulo꞉ elen ko꞉lo꞉ a꞉ma꞉la꞉ dasilia꞉ga꞉lo꞉ mio꞉wo꞉ ge a꞉la꞉sio꞉.” 20 Yo꞉n 6.68-69A꞉la꞉sa꞉labiki, Ya꞉su eyo꞉ a꞉la꞉sio꞉, “Ko꞉sega gi wema꞉yo꞉ ne kalu o꞉b a꞉la꞉asulaya?” Ya꞉suwa꞉ a꞉la꞉dabu ba꞉dabiki, Bida eyo꞉ a꞉ma꞉la꞉bo꞉ a꞉la꞉sio꞉, “Ge Keliso, Godeya꞉lo꞉ da꞉feyo꞉ kalu.” 21 A꞉la꞉sa꞉labiki, Ya꞉su eyo꞉ to a꞉no꞉ kaluka꞉isale nolbo꞉wo꞉ mada sa꞉la꞉so꞉boka꞉ a꞉la꞉liki hagugu sio꞉.

22 Luk 9.44,18.32-33A꞉la꞉sa꞉la꞉sa꞉ga꞉yo꞉ eyo꞉ imo꞉wo꞉ a꞉la꞉wido꞉, “Kalule Dowo꞉ nemo꞉wo꞉ hida꞉yo꞉ alan dimia꞉ib. Godemo꞉ bobalo꞉ so꞉mea꞉sen misa꞉ kalu o꞉lia꞉ elelo꞉ wida꞉sen kalu o꞉lia꞉ Yu ko꞉go꞉do꞉ kalu i o꞉lia꞉ma꞉yo꞉ tambo gola ba꞉dakiyo꞉, ne sana soma꞉ib. A꞉la꞉ta꞉ga꞉ ho꞉len otaleno꞉ ta꞉ta꞉sa꞉ga꞉yo꞉, ne a꞉ma꞉la꞉ dasima꞉no꞉.”

23 Madi 10.38,Luk 14.27A꞉la꞉sa꞉la꞉sa꞉ga꞉ Ya꞉su eyo꞉ kaluka꞉isale kegeo꞉ imo꞉wo꞉ a꞉la꞉sio꞉, “Kaluka꞉isale abeyo꞉ ne kudu mia꞉no꞉ asulalega, eyo꞉ enen asulano꞉ ka ta꞉ta꞉sa꞉ga꞉, ho꞉leno꞉ tambo ene i malano꞉ dia꞉liki soma꞉no꞉wo꞉ o꞉lika꞉ a꞉laki, ne a꞉na kudu ya꞉bi. 24 Madi 10.39,Luk 17.33, Yo꞉n 12.25Mo꞉wo꞉ kaluka꞉isale abeyo꞉ ene mela꞉no꞉wo꞉ halale ta꞉li dofo꞉lalega, ene mela꞉no꞉wo꞉ sulu ha꞉na꞉ib. Ko꞉sega kaluka꞉isale abeyo꞉ ne kudu yakiyo꞉, ene mela꞉no꞉wo꞉ walalega, e mela꞉no꞉leyo꞉ dia꞉ib. 25 Gio꞉ kelego꞉ henfelo꞉ wilo꞉ da꞉lab a꞉no꞉ ko꞉lo꞉ tambo asula꞉sa꞉ga꞉ kegenela꞉len amio꞉, mela꞉no꞉ gilo꞉wo꞉ sulu ha꞉nalega, kelego꞉ a꞉ma꞉yo꞉ gio꞉ waga asuwa꞉fa꞉iba? 26 Madi 10.33,Luk 12.9Kaluka꞉isale abeyo꞉ ni wi sa꞉ma꞉no꞉ o꞉lia꞉ ni to walama꞉no꞉ a꞉no꞉lia꞉yo꞉ sendelowalega, tif amio꞉ Kalule Dowo꞉ ne yakiyo꞉, ni ho꞉len fo꞉fo꞉lesodo꞉ o꞉lia꞉, Do Godeya꞉ ene ho꞉len fo꞉fo꞉lesodo꞉ o꞉lia꞉, ma꞉mula꞉ malilo꞉ a꞉ma꞉ ene ho꞉len fo꞉fo꞉lesodo꞉ o꞉lia꞉ yakiyo꞉, niyo꞉lo꞉ e wi sa꞉ma꞉no꞉wo꞉ sendeloma꞉no꞉. 27 Niyo꞉ gimo꞉wo꞉ hendele so꞉lo꞉l. Kaluka꞉isale gi usamio꞉ nolo꞉ o꞉semo꞉sowalikiyo꞉, Godeya꞉lo꞉ bo꞉fo꞉mela꞉no꞉wo꞉ a꞉na ba꞉ba꞉ib.” Ya꞉su eyo꞉ a꞉la꞉sio꞉.

28 Ya꞉su eyo꞉ to a꞉no꞉ sa꞉la꞉sa꞉ga꞉yo꞉, ho꞉len ola꞉fo꞉wo꞉ ta꞉ta꞉ga꞉, eyo꞉ Bida, Ya꞉ma꞉s, Yo꞉n a꞉no꞉ko꞉ tililia꞉ga꞉, Godemo꞉ to sa꞉ma꞉niki, iyo꞉ hen misio꞉wa tililia꞉gane. 29 Ya꞉su eyo꞉ dulugu sa꞉la꞉lena, ene wo꞉lokano꞉ ko꞉li fa꞉la꞉dowaki, a꞉la꞉ta꞉ga꞉ ene helebeso꞉g ko꞉lo꞉ a꞉no꞉ ho꞉len halaido꞉ fo꞉fo꞉lesodo꞉ fa꞉la꞉dowakiyo꞉, wabeleg sililakilo꞉ ho꞉len o꞉ngo꞉ dowo꞉. 30-31 Luk 9.22A꞉la꞉ta꞉ga꞉ Mo꞉sa꞉s dia꞉ Elaiya o꞉lia꞉yo꞉ wigibo a꞉na fa꞉la꞉dowabikiyo꞉, a꞉la꞉ a꞉namio꞉lo꞉ ho꞉len halaido꞉ a꞉no꞉ fo꞉fo꞉lesodo꞉. A꞉la꞉yo꞉ Ya꞉su o꞉lia꞉ tolakiyo꞉, e sowa꞉sa꞉ga꞉lo꞉ ha꞉na꞉no꞉ a꞉no꞉, Ya꞉lusalem a꞉namilo꞉ ko꞉na꞉ma fa꞉la꞉doma꞉nigab a꞉no꞉ ko꞉lo꞉ nenela꞉len. 32 2Bid 1.16-18A꞉no꞉ fa꞉la꞉dowab amio꞉, Bida e o꞉lia꞉lo꞉ mio꞉ kalu a꞉no꞉ alifo꞉len ko꞉lo꞉, dasila ba꞉ba꞉ amio꞉, ho꞉len Ya꞉su amilo꞉ fo꞉fo꞉lesodo꞉ a꞉no꞉lia꞉ kalu a꞉la꞉ nowo꞉ e aniba kagafo꞉lena ba꞉ba꞉. 33 Kalu a꞉la꞉ a꞉no꞉ Ya꞉suwo꞉ ta꞉ta꞉ga꞉ ha꞉na꞉no꞉ dowabikiyo꞉, Bida eyo꞉ Ya꞉sumo꞉ a꞉la꞉sio꞉, “Kalu Alan, o꞉go꞉ nio꞉ wilo꞉ dowo꞉wo꞉ o꞉li go꞉ ko꞉lo꞉, a ha꞉lu otaleno꞉ dia꞉niki. A nowo꞉ gino꞉, nowo꞉ Mo꞉sa꞉s eno꞉, nowo꞉ Elaiya eno꞉.” Bida eyo꞉ to we ko꞉lo꞉ so꞉lo꞉l a꞉la꞉bo꞉, babale dowaki sio꞉.

34 Bida e a꞉no꞉ ko꞉lo꞉ sa꞉la꞉len amio꞉, kolo꞉ tinda꞉sa꞉ga꞉, iyo꞉ go꞉lulabikiyo꞉, tagio꞉ alan dowo꞉. 35 Luk 3.22To nowo꞉ kola꞉ us a꞉na a꞉la꞉ta꞉ga꞉ sa꞉lakiyo꞉, “Kalu we ni so꞉wa, no꞉no꞉ndo꞉ da꞉feyo꞉wo꞉ we. To elo꞉ sa꞉labo꞉ da꞉da꞉bi.” 36 To a꞉no꞉ sa꞉la꞉sa꞉ga꞉ eletabiyo꞉, iyo꞉ Ya꞉su e ina꞉li elena ba꞉ba꞉. Ko꞉sega o꞉g ho꞉len a꞉namilo꞉ ililo꞉ ba꞉ba꞉ a꞉no꞉ kaluka꞉isale nolbo꞉wo꞉ mada mo꞉malolo꞉ me.

37 Kea꞉fo iyo꞉ misio꞉ a꞉na a꞉la꞉ta꞉ga꞉ tindabikiyo꞉, kaluka꞉isaleyo꞉ modo꞉ ko꞉lo꞉ Ya꞉suwo꞉ galima꞉ni mio꞉. 38 Kegeo꞉ us a꞉namio꞉ kalu noma꞉yo꞉ Ya꞉sumo꞉wo꞉ ho꞉le susiaki a꞉la꞉sio꞉, “Widan kalu, niyo꞉ kalu so꞉wayo꞉ mada imilig we ko꞉lo꞉, giyo꞉ nofolakiyo꞉ o꞉li ba꞉ba꞉no꞉wo꞉? 39 Mama mogago꞉ nowo꞉ so꞉wa wena ti ha꞉nab amio꞉, so꞉wa we wigibole a꞉naka ganagilia꞉sen. Mama mogago꞉ eyo꞉ e da꞉ba꞉nama꞉ki ta꞉tab amio꞉, mesuba꞉s o꞉lia꞉ fa꞉la꞉dowa꞉sen. Mama mogago꞉ eyo꞉ emo꞉wo꞉ nagalo꞉wo꞉ dimia꞉liki, bo꞉ebo꞉ mo꞉ta꞉fo꞉ ha꞉na꞉sen. 40 Niyo꞉ gilo꞉ tiliwida꞉sen kalumo꞉wo꞉ mama mogago꞉ a꞉no꞉ o꞉lusanama꞉kiyo꞉ susio꞉ ko꞉sega, i o꞉lia꞉yo꞉ mo꞉ililo꞉.” 41 A꞉la꞉sa꞉labiki Ya꞉su eyo꞉ a꞉la꞉sio꞉, “Ha꞉iyo꞉, o꞉g ho꞉len wenamilo꞉ kaluka꞉isale sab gili asulo꞉wo꞉ babale dowaki, ne amilo꞉ tilidabuwo꞉ aundo꞉ma dowo꞉ ko꞉lo꞉, Ne gi o꞉lia꞉lo꞉ doma꞉no꞉wo꞉ halaido꞉. Ne gio꞉ asulo꞉wo꞉ nodoma꞉kiyo꞉ ho꞉len o꞉biba꞉s yasilima꞉no꞉wa꞉le? Gi so꞉wako꞉ nelo꞉wa tililia꞉ mena” Ya꞉su eyo꞉ a꞉la꞉sio꞉. 42 So꞉wa a꞉no꞉ Ya꞉sulo꞉wa yabikiyo꞉, mama mogago꞉ a꞉ma꞉yo꞉ e hena beseakiyo꞉, da꞉ba꞉nama꞉ki ta꞉fo꞉. Ko꞉sega Ya꞉su eyo꞉ mama mogago꞉mo꞉wo꞉ gadi sa꞉la꞉sa꞉ga꞉yo꞉, so꞉wa a꞉no꞉ falele alitaki, a꞉ma꞉la꞉ iyamo꞉ dimi. 43 A꞉la꞉dimidabikiyo꞉ kaluka꞉isale kegeo꞉ a꞉ma꞉yo꞉ Godeya꞉ halaido꞉ a꞉no꞉ ba꞉da꞉sa꞉ga꞉yo꞉, iyo꞉ molo asulo꞉.

Kaluka꞉isale kegeo꞉ a꞉no꞉ Godeya꞉ ene halaido꞉ a꞉no꞉ ba꞉da꞉sa꞉ga꞉ iligo꞉. Iyo꞉ Ya꞉su elo꞉ dimido꞉ a꞉no꞉ molo tandea꞉labikiyo꞉, Ya꞉su eyo꞉ enedo꞉ tiliwida꞉sen kalu imo꞉wo꞉ a꞉la꞉sio꞉, 44 Luk 9.22“To nilo꞉ sa꞉ma꞉nigo꞉l we, dinafa da꞉da꞉ga꞉, tifa a꞉ asula꞉bi. Kalule Dowo꞉ Ne, kalu noma꞉ teledowaki, gis kalumo꞉ gasimea꞉ib.” 45 Luk 18.34Ya꞉suwa꞉yo꞉ a꞉la꞉sio꞉ ko꞉sega, iyo꞉ to a꞉ma꞉ ha꞉go꞉ babale dowo꞉. To a꞉ma꞉ ha꞉go꞉ wo꞉no꞉le delen ko꞉lo꞉ iyo꞉ mo꞉fanda asulo꞉. A꞉la꞉ta꞉ga꞉ iyo꞉ tagilaki, Ya꞉sumo꞉wo꞉ mo꞉dabu ba꞉ba꞉.

46 Luk 22.24Ya꞉suwa꞉ enedo꞉ tiliwida꞉sen kalu i a꞉no꞉ inina꞉ma꞉la꞉ usa alo꞉ banatakiyo꞉, “ni wenamio꞉ wabulun alandeyo꞉ abe dia꞉nigaba꞉le” a꞉la꞉likiyo꞉ egelebo꞉ towa꞉yo꞉ kego꞉. 47-48 Madi 10.40Ko꞉sega Ya꞉su eyo꞉ ililo꞉ asulufo꞉lab a꞉no꞉ ba꞉da꞉sa꞉ga꞉, so꞉wala꞉su nowo꞉ tililia꞉ga꞉, e aniba kagafo꞉melea꞉ki ta꞉takiyo꞉, imo꞉wo꞉ a꞉la꞉sio꞉ “Kalu abeyo꞉ ne wiya a꞉la꞉ta꞉ga꞉yo꞉, so꞉wala꞉suwo꞉ sagala꞉liki tili dowalega, eyo꞉ ne ko꞉lo꞉ tili dowakigab. A꞉la꞉ta꞉ga꞉ kalu abeyo꞉ ne sagala꞉liki tili dowalega, eyo꞉ nelo꞉ iliga꞉fo꞉ o꞉mo꞉wo꞉lo꞉ sagalaki tili dowaki auma꞉ib. Gi usamio꞉, kalu abeyo꞉ e o꞉ngo꞉malo꞉ngo꞉ a꞉laki ha꞉ga dowalega, hendele wa꞉la꞉b alano꞉ e dowab.”

49 Ya꞉su eyo꞉ a꞉la꞉sa꞉labiki, Yo꞉n eyo꞉ a꞉ma꞉la꞉bo꞉ a꞉la꞉dabu ba꞉ba꞉, “Widan kalu, niliyo꞉ kalu noma꞉yo꞉ gi wiya a꞉la꞉ta꞉ga꞉ mama mogago꞉wo꞉ o꞉luga꞉felabi ba꞉da꞉ga꞉, nilo꞉ gasalo꞉ mo꞉dowa꞉sena꞉ gab ko꞉lo꞉, niliyo꞉ emo꞉wo꞉ dimida꞉so꞉boka꞉ a꞉la꞉liki ele alifa꞉.” 50 Madi 12.30,Luk 11.23A꞉la꞉sa꞉labiki Ya꞉suwa꞉yo꞉ a꞉ma꞉la꞉bo꞉ a꞉la꞉sio꞉, “Elo꞉ dimidab a꞉no꞉ ka꞉la꞉so꞉bo. Mo꞉wo꞉ kalu abeyo꞉ gi o꞉lia꞉lo꞉ gisdo꞉ mo꞉dowab a꞉no꞉, gilino꞉le dowab.”

51 Ya꞉suwo꞉ Hebene a꞉ma꞉la꞉ ha꞉na꞉no꞉ ho꞉leno꞉ ko꞉na꞉ma dowabikiyo꞉, e mada Ya꞉lusalem ha꞉na꞉no꞉ a꞉la꞉ asululi. 52 Ya꞉su e Samalia hen amisa꞉n nowa alima꞉niki, eyo꞉ amisa꞉n a꞉no꞉ dimidalima꞉kiyo꞉, towo꞉ saga꞉fo꞉. 53 Ko꞉sega iliyo꞉ Ya꞉su e Ya꞉lusalem ha꞉nab a꞉la꞉asulaki, iliyo꞉ e ili amisa꞉na mena꞉kiyo꞉ mo꞉ho꞉leli. 54 2Kin 1.9-16Tiliwida꞉sen kalu a꞉la꞉, Ya꞉ma꞉s o꞉lia꞉ Yo꞉n o꞉lia꞉yo꞉, ililo꞉ man dimidab a꞉no꞉ ba꞉da꞉sa꞉ga꞉, a꞉la꞉ma꞉yo꞉ Ya꞉sumo꞉wo꞉ dabu ba꞉ba꞉, “Kalu Alan, naino꞉ de Hebene a꞉la꞉ta꞉ga꞉lo꞉ tima꞉no꞉ a꞉ma꞉yo꞉ kaluka꞉isale we tambo yasala꞉ma꞉kiyo꞉, de a꞉no꞉ ho꞉lema꞉ki asulaya?” 55 A꞉la꞉dabu ba꞉ba꞉ ko꞉sega, Ya꞉su e a꞉ma꞉la꞉ nodola꞉sa꞉ga꞉, a꞉la꞉ma꞉lo꞉ hala sa꞉lab a꞉no꞉ digalaki halaido꞉ sio꞉. 56 A꞉la꞉sa꞉la꞉sa꞉ga꞉yo꞉ iyo꞉ amisa꞉n nowa ha꞉na꞉ni ane.

57 Iyo꞉ toga ha꞉na꞉ga꞉ ha꞉nakiyo꞉, kalu noma꞉yo꞉ Ya꞉sumo꞉wo꞉ a꞉la꞉sio꞉, “Gelo꞉ ha꞉nab amio꞉, ne ge kudu sia꞉mela꞉no꞉.” 58 Ko꞉sega Ya꞉su eyo꞉ a꞉ma꞉la꞉bo꞉ a꞉la꞉sio꞉, “Saila gasalo꞉ mesa꞉no꞉wo꞉ aluwo꞉ da꞉lab a꞉la꞉ta꞉ga꞉ o꞉ba꞉ya꞉yo꞉ us silia꞉fa꞉no꞉wo꞉ ayo꞉ da꞉lab. Ko꞉sega Kalule Dowo꞉ e, a enedo꞉leyo꞉ mada aundo꞉ma.” 59 A꞉la꞉ta꞉ga꞉ Ya꞉su eyo꞉ kalu nowo꞉mbo꞉wo꞉ a꞉la꞉sio꞉, “Ge ne kudu mena.” Ko꞉sega eyo꞉ a꞉ma꞉la꞉bo꞉ a꞉la꞉sio꞉, “Alan, ni amisa꞉na a꞉ma꞉la꞉ ha꞉na꞉sa꞉ga꞉, do sowo꞉ ko꞉le dali alita꞉ga꞉yo꞉, ge a꞉na kudu mia꞉no꞉wo꞉ o꞉liya꞉le?” 60 Ko꞉sega Ya꞉su eyo꞉ a꞉ma꞉la꞉bo꞉ a꞉la꞉sio꞉, “Kaluka꞉isale ne amilo꞉ mo꞉tilida꞉dab a꞉no꞉ sowo꞉ o꞉ngo꞉ sab ko꞉lo꞉ i a꞉no꞉ sowo꞉ egele dalima꞉ki ta꞉foma. Ge Godeya꞉lo꞉ bo꞉fo꞉mela꞉no꞉ man a꞉no꞉ ko꞉lo꞉ walama꞉ni hamana.”

61 1Kin 19.20A꞉la꞉ta꞉ga꞉ noma꞉yo꞉ Ya꞉sumo꞉wo꞉ a꞉la꞉sio꞉, “Ne ge kudu mia꞉no꞉ asulo꞉ ko꞉sega, ne a꞉ma꞉la꞉ ha꞉na꞉sa꞉ga꞉, so꞉lo꞉mo꞉wo꞉ ta꞉biyo꞉ a꞉la꞉ ko꞉le sa꞉la꞉sa꞉ga꞉ mia꞉no꞉.” 62 Ya꞉su eyo꞉ a꞉ma꞉la꞉bo꞉ a꞉la꞉sio꞉, “Kaluka꞉isale abeyo꞉, ne mo꞉mo꞉da kudu yakiyo꞉, man tamin amilo꞉ dimida꞉sen a꞉no꞉ a꞉ma꞉la꞉yo꞉ asuluma꞉ ha꞉nalega, e Godeya꞉lo꞉ bo꞉fo꞉mela꞉no꞉ hen us amilo꞉ nanog dimidama꞉no꞉wo꞉ mo꞉ego꞉ doma꞉ib.”