6
Ena no yokamai Yai Gumam ye ama kokonan ipunga no ka ne yokama di erowapunga fi goi iyo! Yai Gumam ne yokamai bei nokapu de erere akire di erongua ne yokamai mapunom nokapu benaro beinga fi goi iyo! Ena Yai Gumam ka epe dume:
Na ne bei nokapu de erowaika kakom ne kanum di narenga fiye. Te na ne akire di erowaika kakom akire di ereiye.
epe dungoro ena fiyo! Epena kakom tei Yai Gumam bei nokapu de erowangua kakom dume. Te epenai Yai Gumam ne yokamai akire di erowangua kakom dungua ena akire di erowangoro kakom kakom moi kuwom suwainga inaimie.* Lk 4:19-21; Ais 49:8
Yai Gumam gama nuwi kokonan gan yokamai moiro tai ipun dongua tarom i ori wom imie
Ena no yokamai gunom kam di mari dopunga kokonan bepunga ari suwo koropane kanere niki de fire kokonan bepunga kam ka sikenaro beinga faikengua mapunom bei erekepunba* 2 Ko 4:2 tai ipun dongua fuka di norongua iran no yokamai bei moiro “Ari yokamai ‘No yokamai Yai Gumam nuwi kokonan gan moimie,’ di firaime,” diro tai mapunom mapunom nokapu bepune. Bepunba bei niki de norere te tai ipun dongua ama norere te kipi kokonan noreimba yo moipune. Te kupa noire te kan iki tei fai norere te kuku boire niki de fi noreime. Bei noreimba no yokamai kokonan yoporam boiro iro te giruwangua wi nokapu faikepunie. Te meran goiro ama moipunie.* 2 Ko 11:23-27 Te no yokamai denom minom yo tongua kokonan bepunie. Te no yokamai inokore nokapu eiro kokonan bepunie. Te no yokamai kura kam kene kene eiro dikepunie. Te no yokamai ari yai opai akire di eropunie. Te Yai Gumam Murom Sumuna akire di norongoro moipune. Te no yokamai denom minomdi ari fi mun ei eropunie.* 1 Ti 4:12 Te no yokamai kakom kakom ka kawom dupunie. Te Yai Gumam yoporam boi norongoro kokonan bepunie. Te yaromi yo tongua mapunom norongoro ena “Satan yaromi kura boi towapune,” diro ena kura boinga tarom i okonom womdi akopungoro te Satan noinangua Yai Gumam kuman norongoro okonom korari akoro kura boi topunie.* 1 Ko 2:4 Te ari suwo koropane yokamai no yokamai kanom i akire di iwa de noreimba ari suwo koropane yokamai no yokamai kanom di ime de noreime. Te ari suwo koropane yokamai no yokamai kanom i akire di iwa de noreimba ari suwo koropane no yokama kanom ka sime. Te ari suwo koropane yokamai no kaningai “No yokamai Yai Gumam nuwi kokonan gan moimie,” di fi noreimba ari suwo koropane “No yokamai kasu ari moimie,” di fi noreimba tamanumie. Te ari suwo koropane no kanom wayom mora fi noreimba ari suwo koropane no kanom wayom fi norekeime. Te ari suwo koropane “No yokamai goraro beime,” di fimba i tamanume. No yokamai yokori moipunie. Yokamai uro no yokama kupa noimba noi goikeime.* 2 Ko 4:10 10 Te no yokamai denom minom ipun ori wom domba te ma deiyo! Kakom kakom no yokama mun ori wom fipune. Te no yokamai kuwanom ari epemere moipunba bei moipungoro ari munmane yokamai Yai Gumam guwai gaiyom munmane ako neimie. Te no yokamai tai muruwo ako nekepunba tai kan muruwo kapakom moipunie. Ena tai ipun dongua fuka di norongua no mapunom mapunom nokapu bepungoro yokamai “No yokamai Yai Gumam nuwi kokonan gan moimie,” dime.* Fir 2:17; Kor 1:24
11 Ena, Korin yokamao, no yokamai ka muruwo imari de eropune. Te no yokamai denom minomdi mun ori wom fi eropune. 12 No yokama mun gawo gera fi eropuno? Tamanumba ne yokama no mun gawo gere fi noreime. 13 Na “Nanan ne yokamai kui nere nenom moiye,” di fika iran na denam minam mun ori wom fi ereikamere ne yokamai denom minom epe mun ori wom fi nareiyo!
Yai Gumam gama yokamai yo tere ari moimie
14 Ena iran ne yokamai Yai Gumam fi ki si teinga u ari yai opai fi ki si tekeinga yokamai ure si dau erekeiyo! Tora bengoro si dau erekenaime? No yo tere moipunga u ari yo tekeinga yokama si dau erowapunga i faikename. Te no nomanenom bau boingua ari moipunga u ari nomanenom si boingua yokamai moingi tei ure si dau erowapunga i ama faikename.* Ef 5:7, 11 15 Te Kirisito u Satan yaromi moingui tei ure si dau towamo? Tamanume. Te no fi ki si topunga ari te fi ki si tekeinga ari inokore enaingai si dau erowapuno? Tamanume. 16 Yai Gumam kakom kakom yokori moingua yaromi ikom dunguamere no epe moipunga ena no yokamai furo yai gumam kasu yokamai “Akire di noreiyo!” di erere te ama furo Yai Gumam “Akire di noro,” di towapunga i faikename. Te koma Yai Gumam nenen ka epe dume:
Na ari yokamai gere tei moiro suna tei wan moraiye. Moiro na yokamai Yai Gumanom bei erowaikoro ena yokamai na arinama yai opai moraime.
epe dume.* 1 Ko 3:16; Lew 26:12 17 Ena Ari Wanopanom ka i yoporam boiro epe di erome:
Ena ne yokamai suna tei arere ari niki deinga yokamai ma de erere fure bam ta moiyo! Ena ne yokamai tai nomanenom bei niki de towangua taromi ma dowainga ena iran na ne yokamai kiapanom moraiye.* Ais 52:11; Esi 20:34; Rew 18:4 18 Ena na ne yokamai nenom moraiye. Te ne yokamai na wanam apunam moraimie.
Ari Wanopanom yaromi tai ta ta yoporam boiro bengua yaromi ka i epe dume.* 2 Sam 7:14

*6:2: Lk 4:19-21; Ais 49:8

*6:3: 2 Ko 4:2

*6:5: 2 Ko 11:23-27

*6:6: 1 Ti 4:12

*6:7: 1 Ko 2:4

*6:9: 2 Ko 4:10

*6:10: Fir 2:17; Kor 1:24

*6:14: Ef 5:7, 11

*6:16: 1 Ko 3:16; Lew 26:12

*6:17: Ais 52:11; Esi 20:34; Rew 18:4

*6:18: 2 Sam 7:14