17
Polo Sailasalame Tesalonaigani howa binigo ogo
1 Polo Sailasala libu ibaga bialu howa Ambibolisibi Aboloniabi anda pialu Tesalonaiga anda pene. Tano ogoriani Yu wali agalinaga ngoai hagane anda mbira hene.✡1 Te 1.1-2, 2.1-2 2-3 Ala Polo dindi maruni howa ngoai hagane andaha piagadagua ibu ngoai hagane anda ogoniha anda pene. Ngoai hagane anda ogoniha Polo ibugua Sabada horo halu tebirani wali agali ngoai ho hearu heba Anduane Homogonaga mbugani bi gilibu winigo dagalalu lo manda bialu hene. Ani lo manda bialu howa ibugua Mbirali Dabo Helenego ibu tandaga nalu homowa mo heya holene winigo lamialu hene. Lamialu lalu, Yasu ogoni ibugua biyago te áyu langerogo ibu Mbirali Dabo Helenegoore ka lalu langero, Polohanda lene.✡Lg 24.26, Ab 3.18, 9.22, 18.28, Ga 3.1 4 Ani lamiyagola wali agali maru hearume, Ibu bi heneneore laya, manda buwa ti Polo Sailasala heba ho gimbu bini. Wali mini lene dewa berearubi Girigi wali agali Ngode Datagaliwabe mitangi bialu lotu laga dewa hearubi ti bibahendeme ogonidagua dege bini.✡Ab 13.50, 15.22, 15.27, 15.40, 28.24
5 Ani biyagola howa Yu agali hearume henge lowa agali ko bame hama hama ibaga bu haga hearu dewa mo ngoai hene. Mo ngoai howa Yu agali biarubi agali ko biarubi keba halu bi dalimu layagome wali agali dindi ogoriani bibahende hearume gungu bibehe hene. Ani buwa tigua Polo Sailasala wali agali hearia haru pole libu hai bialu howa agali mbira mini Yaisana ibunaga andagaha minalu anda pene.✡Lm 16.21 6 Anda puwa libu handa walia nahe howa tigua Yaisanabi Yasu mana yu tiga biaga maru hearubi gililo yalu gabumane haru haga hearia puwa bi dalimu lalu, Agali urume dindi dewani ko timbuni biame halu hayago ai inanaga dindini anda ibiyada.✡Ab 16.20 7 Ibiyagola Yaisana ibugua ibunaga andagaha ti haru puwa palelene. Tigua handame haga kini mende mini Yasu ka lowa Lomonaga Kini kagome bulene mana lowinigo ngaru pugualu kagoni, lene.✡Lg 23.2, Yo 19.12, 1 Pi 2.13 8 Tigua bi ogoni layagola wali agali bibahende hearubi gabumane haru haga hearubi mo keba howa gungu bibehe hene. 9 Ani biyagola gabumane haru haga biarume Yaisanabi agali maru ibu heba dariba hayarubi tihondo lalu, Iname tí golope holoma̱yanaga muni ngulene lo ngadagua ngidaba, lene. Ani lowa muni miyagola gabumane haru haga biarume ti golope hene.
Polo Sailasalame Beriani howa binigo ogo
10 Horo ogoningi mbiraga hayagola Yasu mana yu tiga bu hearume Polo Sailasala Beria pelo, Pudaba, lene. Ani laya handala libu pialu Beriani anda puwa Yu wali agalinaga ngoai hagane andaha anda pene. 11 Wali agali Beriani hearu ti Tesalonaigani wali agali mini giambe hearubi ndo ti mini hade hene. Tigua Ngode Datagaliwabe bi mana turu halu hale hoa howa hale hene. Hale howa tigua Polohanda mana lamiyago henemanedabe hondole horo bibahendengi Anduane Homogonaga mbugani bi gilibu winigo dagalalu lo manda bialu hene.✡Ais 34.16, Lg 16.29, Yo 5.39 12 Ani buwa ti dewalime Yasu mana yu tiga bini. Girigi wali mini lene berearubi Girigi agalibi ti dewaoreme Yasu mana yu tiga bini. 13 Ani biyagola howa Polohanda Berianibi Ngode Datagaliwabe bi mana lamialu ka layago hale howa Yu agali Tesalonaigani hearume Beriani ibuwa tigua wali agali hearu mo didola halu keba helo mo ha hene.✡Ab 13.50, 14.19 14 Ani biyagola Yasu mana yu tiga bu hearume Polohondo lalu, Iba solowara bedagohayagi abale polene nga, lene. Ani lowa agali marume ibu ngua ho pelo, Pudaba, lene. Ani buwa Sailasa Timodila libu nape Beriani hondo hene. 15 Polo haru piyarume ibu Adene tanoni ngua hayagola Polohanda bi lawia halu lalu, Sailasa Timodila i̱ koria abale ibilo lamilimu, lene. Ani laya handala ti Beriani dai bini.
Polo Sailasalame Adeneni howa binigo ogo
16 Polo ibu Sailasa Timodila ibilo Adeneni hondo hearia tano ogoriani mbirale dewa bi pupu wule gime wabini wiaru hondowa ibu miniha genda timbuni hene. 17 Genda howa ibugua ngoai hagane andaha puwa Yu wali agali hearubi wali agali tara tara Ngode Datagaliwabe mitangi bialu lotu laga hearubi ti heba bi mana lo manda bialu hene. Magedi hama wiagoriani horo bibahendengi wali agali ibugu bialu hale haga biyaruhondo ibugua Ngode Datagaliwabe bi mana lamialu hene.✡Ab 18.19 18 Agali maru ti Ebigurialirubi Sidoigialirubi mana tara ogoninaga lawai haga hearu tigua Polo baba ladai bigibigi bialu hene. Ti marume lalu, Miniwi tingi halu mine howa bi larago agi larabe, lene.
Ti marume lalu, Dindi tarani mbirale tara dahuliyali alenaga mana lamira bada, lene. Tigua ogonidagua layago irane ogo. Polo ibugua Yasu mana lamialu Yasu ibuni mo heya hayago te layagonaga ani lene. 19 Ani lowa tigua Polo haru puwa tano ogoninaga ganisolo agali Ariobagasa hama ngoai howa bi lalu hearia haru pene. Haru puwa tigua lalu, Í̠na mana gahenge tara lawai hariligo ina hale hoa kamagoni. 20 Bi maru larigo taraoreyago bi ogoninaga tene manda buluma̱ya langibelo, lene. 21 Adeneali hearubi dindi tarali íbu hearubi tigua mana gahenge tara tara hale halu lo manda bialu horo bibahendengi ani biaabo haga hene.
22 Ani layagola Polo ibu tanonaga ganisolo agali biaru heba howa heyalu ibugua lalu, Adenealiru-o tígua mbirale mbirale beramiligo hondowa tí bi pupu wulene mana hame timbuni lo kamigo manda bido. 23 Tínaga tanoni ibaga bialu howa bi pupu wiagane anda dewa heane de handaru. De handalu hewaria mbirale lomabu miaga dabu mbira wabu wiagoriani bi mbira gilibu wiago ogo, Mbirali iname manda nabi kamago ibunaga, gilibu ngago ogoni i̱na de handaru. Tígua mbirali ogoni tí manda nabi howa ibuhondo mitangi beramiligo ibuninaga bi manaore i̱na áyu tí langerogoni. 24 Ngode Datagaliwabe ibu hari daligabi dindi bibahendebi dindi bibahendeni ngarubi karubi wabiai henego ibu hari daligahanagabi dindihanagabi Anduane Homogo ka. Ibu anda agalinaga gime wabiniruha nahaga ka.✡Md 11.25, Ab 7.48, 14.15✡1 Kin 8.27, Ais 42.5 25 Ibu nakarulape ndo karulapeore kago iname ibu biamogo bialu mbirale mbira mulene henge nawi. Irane ogo. Ibunime inanaga holenebi buhe̱ lolenebi bayale bibahende wali agali bibahendehondo mulene ngadagua ngiagane ibuni ka.✡Yob 12.10, Iba 50.12, Seg 12.1, Ab 7.48 26 Ibugua agali mbira pigane wabiyagoha howa wali agali tara tara bibahende dindi tara taraha ho dame bima pelo purogo lai helene. Ani nabi howa alaore ibugua manda manda biai howa wali agali ti ogongi ogoha helo lowa manda manda buwa pongo bo wini. 27 Ibugua ti wabiyago irane ogo. Tigua hai bialu ibu harualo manda bialu handa walia helonaga ibugua ti wabini. Ngode Datagaliwabe ibu ina kamagoria kaundia ndo kaware haga ka.✡Man 32.8, Iba 145.18, Ais 55.6, Yar 23.23, Ab 14.17, Lm 1.20 28 Anigo mbiralime lalu,✡Kl 1.17, Ta 1.12, Hi 1.3
Tene ibuha howa ibunaga hongome ina dindini halubi ema bialubi bu kamagoni,
lene. Ogonidagua tínaga ga̱wa̱ laga ale maru hearume tínaga la halu lalu,
Inabi ibunaga waneigini kamagoni,
laga. 29 Anigo ina ibunaga waneigini howa iname Ngode Datagaliwabe ibu ngolomebi silibamebi ege to̱le̱ taramebi agalime wabu wini ngaru ibu uruni ale ka lowa ani mitangi bulene nawi.✡Ais 40.18-20, 44.10-17, Ab 19.26 30 Ala wali agalime Ngode Datagaliwabe manda nabi howa biyagoni hondowa Ngode Datagaliwabehanda la nabi ka. Ai áyu ogoni ibugua, Wali agali dindi bibahendeni karu tigua ko biyagonaga mini beregedai halimu, lalu ka.✡Ab 14.16, Lm 3.25, Ta 2.11-12, 1 Pi 1.14 31 Ibugua agali mbirali dabayago ibu togoni howa wali agali dindi bibahendeni karu baba tigatiga daba ki bulenenaga horo mbira pongo bo winigo nga. Ibugua agali dabayago ogoni homayagola mo heya hayagome wali agali bibahendeore karu baba ogonidagua bulebiraore lalu walia hene, lalu Polohanda lene.✡Iba 9.8, 96.13, Ab 2.24, 10.42, Lm 2.16, 14.10 32 Polohanda mbirali homenego mo heya haya layago hale howa agali maru hearume oba halu Polo mege bini. Marume lalu, Bi áyu langirigo hale hoa kamago mani lone langibelo, lene. 33 Ani layagola Polo ibu ti helalu pene. 34 Piyagola wali agali maru hearu tigua Polo heba ha tago halu Yasuhondo mini mbiraore wini. Mini mbiraorewi agali mbira Daionisiasa ibu Ariobagasa ganisolo agali henego ibubi wali mbira Damarisi ibubi wali agali marumebi ani dege bini.
✡17:2-3: Lg 24.26, Ab 3.18, 9.22, 18.28, Ga 3.1
✡17:4: Ab 13.50, 15.22, 15.27, 15.40, 28.24
✡17:7: Lg 23.2, Yo 19.12, 1 Pi 2.13
✡17:11: Ais 34.16, Lg 16.29, Yo 5.39
✡17:24: Md 11.25, Ab 7.48, 14.15
✡17:25: Yob 12.10, Iba 50.12, Seg 12.1, Ab 7.48
✡17:27: Man 32.8, Iba 145.18, Ais 55.6, Yar 23.23, Ab 14.17, Lm 1.20
✡17:28: Kl 1.17, Ta 1.12, Hi 1.3
✡17:29: Ais 40.18-20, 44.10-17, Ab 19.26
✡17:30: Ab 14.16, Lm 3.25, Ta 2.11-12, 1 Pi 1.14
✡17:31: Iba 9.8, 96.13, Ab 2.24, 10.42, Lm 2.16, 14.10