1 Lom 13.1-7,1Bid 2.13-14Taitus giyo꞉ Kilit Keliso kaluka꞉isalemo꞉ a꞉widakiyo꞉, iliyo꞉ gamani misa꞉ kalu o꞉lia꞉ amisa꞉na꞉ misa꞉ kalu o꞉lia꞉ma꞉ ha꞉ga dowaki, ililo꞉ to sa꞉lab a꞉no꞉ kudu hamana꞉ki wida꞉bi. Kaluka꞉isaleyo꞉ ho꞉leno꞉ tambo man nafa dimidaki kudu hamana꞉ki wida꞉bi. 2 Kaluka꞉isale iliyo꞉ nolo꞉ mo꞉sada꞉daki, ha꞉sa doma꞉ki wida꞉bi. Wi enedo꞉wo꞉ mo꞉wabudaki, kaluka꞉isale tambomo꞉wo꞉ ege doma꞉ki wida꞉bi.

3 1Kol 6.9-11,A꞉fe 2.1-2, 5.8Nio꞉lo꞉ tamin amio꞉ babale dowaki a꞉la꞉iyakiyo꞉ mo꞉kudu ha꞉na꞉sen. A꞉la꞉ta꞉ga꞉ man ko꞉li ko꞉lilo꞉, nili do꞉mo꞉wa꞉lo꞉ asulan o꞉lia꞉ nili sagalakilo꞉ dimida꞉sen a꞉no꞉lia꞉ma꞉yo꞉, nio꞉ dikidabikiyo꞉, meya꞉lo꞉ melo꞉ o꞉ngo꞉ a꞉ma꞉ susululia꞉ga꞉ ha꞉na꞉len. Nio꞉ ho꞉leno꞉ tambo man mogago꞉ dimida꞉likiyo꞉, nol o꞉lia꞉yo꞉ etea꞉liki mo꞉bea꞉sen. A꞉la꞉ta꞉ga꞉ kaluka꞉isale nolba꞉yo꞉ nimo꞉wo꞉ kulufa꞉yab amio꞉, niliyo꞉lo꞉ imo꞉wo꞉ kulufa꞉ya꞉sen. 4-5 2Tim 1.9,Hibu 10.22Ko꞉sega nilo꞉ gasili Gode eyo꞉ nimo꞉wo꞉ ha꞉fo꞉ disa꞉laki, sagale alita꞉sen ko꞉lo꞉ nio꞉ a꞉ma꞉la꞉ gasili. Nio꞉ man digalo꞉le dimida꞉lena gasilima. Ko꞉sega Gode eyo꞉ nio꞉ nofolo alitaki, gasili ko꞉lo꞉, ene Mama a꞉ma꞉ halaido꞉wa꞉ ilikiyo꞉, nio꞉ to꞉go꞉de alifa꞉ ko꞉lo꞉, nio꞉ ho꞉gi a꞉sa꞉la꞉liaki, mela꞉no꞉ ho꞉giyo꞉ dimi. 6 Ilig 2.17-18Nilo꞉ gasili, Ya꞉su Keliso eya ilikiyo꞉, Gode eyo꞉ Ene Mama Malilo꞉ a꞉no꞉ boba dimiaki, niya ko꞉go꞉lu alifelo꞉. 7 Elo꞉ dimido꞉wo꞉ mo꞉wo꞉ we. Godeya꞉ ene kanulo꞉ a꞉ma꞉yo꞉ nio꞉ ene siwa꞉l amio꞉ digalo꞉le ta꞉fo꞉ ko꞉lo꞉, a꞉na ilikiyo꞉, nio꞉ ene so꞉wale ta꞉taki, mela꞉no꞉ mela꞉no꞉wo꞉ mada dia꞉no꞉ a꞉la꞉asulaki yasiso꞉l. 8 To a꞉no꞉ hendele so꞉lo꞉l. Kaluka꞉isale Gode amilo꞉ tilidabu i a꞉ma꞉yo꞉ man nafa halale dimidama꞉no꞉wo꞉, tamindeyo꞉ welo꞉b a꞉la꞉asuluma꞉ki, giyo꞉ to a꞉no꞉ halale wida꞉bi. Nilo꞉ to wido꞉l we nafale ko꞉lo꞉, to wema꞉yo꞉ tambo asuwa꞉fa꞉ib. 9 2Tim 2.14,16Ko꞉sega giyo꞉ mo꞉lo꞉ma kabilo꞉ towa꞉lo꞉ kegab a꞉no꞉lia꞉, ge ma꞉mu i mio꞉ agela꞉sen a꞉no꞉lia꞉, Mo꞉sa꞉sa꞉ ele saefa꞉ amilo꞉ to kegab a꞉no꞉lia꞉, towa꞉lo꞉ kegab a꞉no꞉ tambo ta꞉ta꞉ga꞉, a꞉le dowa꞉bi. Mo꞉wo꞉ towa꞉lo꞉ kegab a꞉ma꞉yo꞉ fo nafayo꞉ mo꞉helema꞉ib. 10 Madi 18.15-17Sa꞉s us amio꞉, kaluka꞉isale imilig noma꞉yo꞉ towa꞉ kegakiyo꞉ aloba꞉ma꞉no꞉ to sa꞉lalega, giyo꞉ hagugo꞉wo꞉ sa꞉la꞉bi. A꞉la꞉ta꞉ga꞉ emo꞉wo꞉ hagugo꞉ towo꞉ wa꞉ka sio꞉ amio꞉ mo꞉da꞉dalega, gio꞉ kalu a꞉no꞉ fa꞉s dimia꞉bi. 11 Kalu o꞉ngo꞉wo꞉ e asulo꞉ nafaleyo꞉ ta꞉taki, man mogago꞉le dimida꞉lab ko꞉lo꞉, ene mogago꞉ dimido꞉ a꞉ma꞉yo꞉ e mo꞉walila꞉la꞉ga꞉ ta꞉li ko꞉lo꞉lab, a꞉la꞉bo꞉ ge asulo꞉.

12 A꞉fe 6.21-22,Kolo 4.7-8Niyo꞉ kalu imilig nowo꞉, Atemas eya꞉le, Tikikus eya꞉le gelo꞉wa iliga꞉fa꞉no꞉. Ta꞉n ho꞉len amio꞉ ne Nikobolis amisa꞉n a꞉na mesa꞉no꞉ asulo꞉ ko꞉lo꞉, kalu a꞉no꞉ gelo꞉wa fa꞉la꞉dowa꞉sa꞉ga꞉yo꞉, ge ne a꞉na galima꞉ni bo꞉bo꞉ge ya꞉bi. 13 Ilig 18.24,1Kol 3.5-6Abolos o꞉lia꞉ gamani elelo꞉ asulo꞉ kalu, Senas o꞉lia꞉yo꞉ ha꞉na꞉nigalikiyo꞉, a꞉la꞉yo꞉ kelego꞉lo꞉ma dowabena꞉ki, giyo꞉ mada asuwa꞉ta꞉bi. 14 A꞉fe 4.28A꞉la꞉ta꞉ga꞉ Kilit Keliso kaluka꞉isaleya꞉yo꞉ kelego꞉lo꞉ma kaluka꞉isaleyo꞉ halale asuwa꞉ta꞉ melea꞉ki asulo꞉l. Iliyo꞉ a꞉la꞉dimidalikiyo꞉, fowo꞉ nafa hedaki, ho꞉leno꞉ tambo amio꞉ kelego꞉wo꞉ o꞉li doma꞉ib.

15 Kaluka꞉isale tambo ne o꞉lia꞉lo꞉ sab wema꞉yo꞉ gimo꞉wo꞉ sagalo꞉ towo꞉ iliga꞉tab. A꞉la꞉ta꞉ga꞉ tilidabu kaluka꞉isale, ne mili ko꞉lo꞉ gi o꞉lia꞉lo꞉ sab nol o꞉mo꞉wo꞉lo꞉ sagalo꞉ towo꞉ sa꞉la꞉biyo꞉.

Godeya꞉ ha꞉fo꞉ disalano꞉ gi o꞉lia꞉ dowa꞉biyo꞉.