Pauro Munom Ganom Korin Ari Okome Boi Erome
Ena Pauro munom ganom Korin ari koma boi erere ena Efesasi tei ma dere fure Maseronia akai tei moime. Ena noniki towane mora goungoro Pauro “Korin ari yokamai epena Yesu nokapu fi ki si teimbo?” di firo yai ta Taitasi awi Korin ari moingi tei dome. Ena Taitasi furo inako dero Pauro moingui tei uro “Korin ari yokamai munmane ne kanum dinga firo nomanenom si awa tero dourom boimba suwo koropane ne kanum mounom wako tere ne yoporam boingamere epe dourom boikeime,” epe Pauro di tome. Ena iran Pauro bei moiro munom ganom ta Korin ari boi erere ka suwo iro suwo iro di erome. Koma Pauro “Ne yokamai nomane si awa teinga na mun fiye,” di erome. Ena Pauro bei moiro Yesu Kirisito gunom kam tokoi ama di erome. Ena yaromi ama bei moiro “Ne yokamai kongo kuku boire Yerusarem ari yokamai akire di erere yo ereiyo!” epe ama di erome. Ena okome wom yaromi bei moiro “Yesu na nawi dongua fuka yai kawom moiye,” ama epe di erome. Pauro ka epe munom ganom i boi eromia kaniyo!
1
Na Pauro. Na Mesia Yesu nawi dongua fuka yai moraro beika Yai Gumam na gunom boi narongua moiye. Ena na ne yokamai yai opai Yesu fi ki si tere moinga Korin tei moinga yokamai munom boi ereiye. Te na ari yai opai Yesu fi ki si tere moinga Akeiya ikinom akainom tei moinga yokamai munom i ama boi ereiye. Ena te nonon Yesu gama arinom Timoti na moiki tei ama moimie.* 1 Ko 1:1 Ena nenom Yai Gumam yaromi te Ari Wanopanom Yesu Mesia surai bei nokapu de erero te gore amine ei erowaipire.* 1 Ko 1:3
Ari yokamai bei moiro Yai Gumam kam bawom duwaime
Yai Gumam Yesu Mesia nonon Ari Wanopanom nem moingua te yaromi no kanom fingua ena kakom kakom akire di norongua iran kam bawom duwapune.* Ef 1:3; 1 Pi 1:3; Ro 15:5 Te Yai Gumam nonon yokamai akire di noronguamere no ari tai ipun muruwo fuka di erongua yokamai epe akire di erowaro bepunga ena yaromi no yokamai ipun muruwo fuka di norongua akire di norome. Ena Mesia kipi ori wom kaingua finguamere no yokama kipi kaingua ama epe fipunga ena Mesia akire di norongua moko iwa fume.* Sam 34:19; 94:19 Ena tai ipun dongua no gunom kam di mari dopunga yokamai fuka di norongua ena Yai Gumam ne yokamai akire di erongore kakom kakom moi kuwom suwainga inaimie. Te Yai Gumam akire di norongua ena yaromi ne yokamai ama akire di erowame. Ena iran no yokamai tai ipun dongua firapungamere ne yokama ama tai ipun dongua epe firaimba Yai Gumam ne yokamai bei erowai te erongoro ena ne yokamai kai meikere wira dire moraimie.* 2 Ko 4:15 Ena no yokamai kipi kaingua firapunga kakom ne yokamai kipi kaingua ama firaimba mora fipunga Yai Gumam no yokamai akire di noronguamere ama epe akire di erowame.
Ena, arinama yokamao, koma no yokamai Eisia ikinom akainom tei moipungi tai ipun donguai fuka di noronguai firaro beinga imari de erowapune. Tai ipun donguairai ori wom i ime de norero erowai topunga ime de norongoro epe bengoro ena no yokamai “Gorapune,” di fipune.* Ap 19:23; 1 Ko 15:32 No yokamai epe moipungai ena “No gorapune,” di fi moipunba goikepune. Dumba ena no yokamai “No nonon erowai topunga nokapu morapune,” di fikenaro bepunba “Yai Gumam ari goinga akire di erongua tokoi aringa yaromi towane akire di norowame,” di firaro bepunga gorapunga mapunom fuka di norome. 10 Ena tai ipun dongua u mari fu norongua te “No yokamai epena gorapune,” di fipunga yaromi akire di norere te epena te okome ama akire di nore morame. Ena no yokamai mora fi ki si topunga okome yaromi tokoi akire di norowame.* 2 Ti 4:18 11 Ena ne yokamai ka make ei towainga Yai Gumam akire di norowame. Ena iran ari munmane ka make ei teinga te Yai Gumam yo morom bei nokapu de norongua ari munmane ikanere mun firo Yai Gumam kam bawom duwaime.
Pauro “Unaiye,” dumba kungua mapunom boi eromie
12 Ena no yokamai bei kanupunga tora bengoro no nonon kanom akire dupune? I epe: No mangi tawa wan moipunga te no ne yokamai gere tai ta ta bepunga no yokamai tai mapunom mapunom muruwo di mari de erere kasu wanere di erekepune. Kawom, Yai Gumam sumuna akire di norongoro no yokamai epe wom bepunie. Te ari mangi tei moinga inokore eingamere no yokama epe inokore eire wankepunba Yai Gumam yo morom bei nokapu de norongua no epe kasu wankepune. Ena no nomanenom “Mapunom bepunga i faime,” ka di mari dome. Ena no nonon kanom akire dupunga i faime.* Ip 13:18; 1 Ko 1:17; 2 Ko 2:17 13 Te ka munom ne yokamai boi eropunga ne yokamai kerere mapunom nokapu firaro beinga epe boi eropune. Ena ne yokama epena no mapunonom bepunga suwo fimba 14 muruwo mora firainga faname. Ne yokamai no mapunonom muruwo bepunga mora firainga ena okome Ari Wanopanom Yesu tokoi ako mangi unangua kakom no yokamai ne yokamai kanom akire duwapungamere ne yokamai no kanom epe ama akire duwaime.* 2 Ko 5:12; Fir 2:16
15 Ena “Ne yokamai epe bei moraimie.” di fika ena “Ne yokamai eken surai mun firaro beinga na koma u nen moingi tei ure dere bam ta fure ena inako dere u moingi tei tokoi unaiye,” ama di fiye. 16 Ena “Na Maseronia ikinom akainom kon naro beika kakom i na fu ne yokamai moingi tei unaiye. Te okome Maseronia ikinom akainom dere na ikinam inako dero unaro beika kakom i tokoi fu nen moingi tei unaiye. Boromdi na Yuria ikinom akainom naro beika ne yokamai akire di narere nawi dowaimie,” epe di fiye.* 1 Ko 16:5-6 17 Ena na epe di fika “Na ka yo dume,” di fimio? Oro? Bore na epe di fika “ ‘Na uname,’ dumba kungua ena kasu dume,” ama di fimo? Epe di fikeiyo! Ari yokamai mangi tawa moinga inokore yo eingamere na epe inokore yo eire dikeiye. 18 Ma deiyo! Yai Gumam kawom moinguamere epe na ka di ereika na yo dikeipa na kawom diye. 19 Ta bengoro na epe diye? Yai Gumam wam Yesu Mesia kam mapunom dungua na te Saira te Timoti no suraiye ka di mari dere ne yokamai i mari de eropungoro yaromi inokore surai eikemie. Eikemba yaromi kakom kakom kawom dume.* Ap 18:5 20 Ena Yai Gumam ka di koi eiro “Na epe benaiye,” diro dungua no ari yokamai kanupungai Yesu bengua Yai Gumam kam mukom faime. Kawom, no ari Yesu Mesia kokonan bengua kanere mora fipungai Yai Gumam kam dunguai kawom dungoro ena iran “I kawom,” diro yaromi kam akire dupune.* Rew 3:14 21 Te Yai Gumam yaromi ne te no yokamai yoporam boi norongua ena nonon Mesia gere moiro si daupune. Te Yai Gumam nenen nonon gunom boi norere 22 te ari yokamai firaro beinga nonon yaromi gama moipunga te nonon “Okome Yai Gumam yaromi bei moiro tai ta ta muruwo nonon norowamie,” di firaro bepunga ena Yai Gumam Murom Sumuna denom minomdi ei norome.* 1 Yo 2:27; Ef 1:13-14; Ro 8:16-17
23 Ena kasu duwaika ne yokamai firaro beinga Yai Gumam imari de erowamie. Yaromi na inokore eika mora fimie. Te tamanowangua na kawom duwaiye. Ena na kura kam di erekenaro beika na u ne yokamai Korin moingi tei inako dero kuiye.* Ro 1:9; 2 Ko 11:31 24 Te ne yokamai Yai Gumam fi ki si teinga kiapanom ari ka yoporam boiro dingamere epe no yokamai ka yoporam boiro di erekepune. Ta bengoro? No yokamai mora fipungai ne yokama Yesu fi ki si tere erowai teinga ena ka epe di erekepune. Ne yokamai mun ori wom firaro beinga no ne yokamai gere tai beiro kokonan towane bepune.* 1 Pi 5:3

*1:1: 1 Ko 1:1

*1:2: 1 Ko 1:3

*1:3: Ef 1:3; 1 Pi 1:3; Ro 15:5

*1:5: Sam 34:19; 94:19

*1:6: 2 Ko 4:15

*1:8: Ap 19:23; 1 Ko 15:32

*1:10: 2 Ti 4:18

*1:12: Ip 13:18; 1 Ko 1:17; 2 Ko 2:17

*1:14: 2 Ko 5:12; Fir 2:16

*1:16: 1 Ko 16:5-6

*1:19: Ap 18:5

*1:20: Rew 3:14

*1:22: 1 Yo 2:27; Ef 1:13-14; Ro 8:16-17

*1:23: Ro 1:9; 2 Ko 11:31

*1:24: 1 Pi 5:3