1 Ka pai nau‑yehata wayahina, yau ipupu a nau‑itava ananina taina. Aituhu aviyaivia wayahikaia avaha Tau Ito‑yavuha Iesu nui kavi‑niana, tauka vivane Iesu hutana, ka tauna nihenina kamamaei. Wayahina, tuta ataina eha aitam aka dewa‑yaiyai potapotaka yaka goyona wayahi. 2 Iuna ataina Yaubada Nuana veimeyeka, kadu tauna avaha ito‑yavuhika veimeana tutuaina wayahina. Nonova goyona omo wayahikaia veimeana tutuaina wayahina, e goyo‑nana veimeyeka goyona kadedewei, e dewa goyo‑naia ai nau‑pata vivane aniga kavaniahei. Kate Yaubada Nuana Ahihinata omo wayahikaia, e tauna yawai‑vavaha veneka, iuna itoka vivane Tau Ito‑yavuha Iesu hutana. 3-4 Mosese ya veimea eha ana pata yawai‑vavaha na‑veneka, iuna itoka tomotau ininika ihanuana. Wayahina, aviani veimeana veimeyeka, itoka eha aka pata, ka kavihahaiei, ka kadu katana‑bwegebwegei.

Udu! Itoka eha aka pata, kate Yaubada ana pata. Ka kadu tauna avaha yawai‑vavaha veneka. Ika! Yaubada etawana tunina vo‑vi‑aiaia itoka tau ihanua wayahika. Iuna tauna ya veimea tunutunuhina nihenina ivona, yaka goyona a nau‑pata vivane yaka aniga. Ka Yaubada tauna Natu‑hoina vi‑tunei omo tanopia, ka tauna ya tupua itoka yaka tupua aitamoata deina, kadu ininina itoka ininika aitamoata deina. Ka Iesu tauna ininina awaehei vi‑pai vi‑nomu itoka wayahika, e tauna vi‑nau‑pata itoka yaka goyona wayahi deina. Ka yanꞌ aniga wayahina tauna goyona a bagibagi vita‑vovoni. Ka Yaubada Nuana bagibagina. Wayahina, ataina tuta aituhu Yaubada Nuana kavi‑ateteyei, akanai goyona eha ana pata na‑veimeyeka.✡Gal 5:16, 25.

5-6 Aituhu aviyaivia iawaehei goyona taui yai nuanua veimeyei, akanai taui inini nihenina dewa goyona idedewei, ka tuta pai nau‑yehata wayahina taui ai nau‑pata dewa goyo‑naia ivaniahei vivane aniga ainua. Aitam aniga inini nihenina ivaniahei, ka kadu aitam aniga nuai nihenina ivaniahei. Kate aituhu aviyaivia iawaehei Yaubada Nuana taui yai nuanua veimeyei, ka aituhu taui Nuana ivi‑ateteyei, akanai taui yawai‑vavaha ivaniahei, kadu nua gomagomanina Yaubada wayahina ivaniahei.

7 Aituhu aviyaivia iawaehei goyona taui yai nuanua veimeyei, vona ahiahina, taui vivane Yaubada a havia. Iuna taui Yaubada ya veimea itana‑bwegebwegei, ka kadu taui eha ai pata tauna ya veimea ivi‑ateteye. 8 Wayahina, aituhu aviyaivia iawaehei goyona taui yai nuanua veimeyei, taui eha ai pata Yaubada ivo‑vi‑dewa‑haiawi.

9 Yaiau, itomi eha tomotaui deina. Aituhu Yaubada Nuana nihenimia mamaei, goyona eha veimeyemi, kate Yaubada Nuana veimeyemi. Aituhu aviyaivia eha Iesu Nuana nui imamae, taui eha Iesu hutana aitam.✡1Ko 3:16; 12:3. 10 Vona ahiahina, tuta ataina aniga uayaunei ininimia, ka apaina ininimi ianiga, iuna goyona ininika veimeyei deina. Kate aituhu Iesu nihenimia mamaei, akanai nuami avaha yawai‑vavaha vaniahei. Iuna tauna yana dewa tunutunuhina wayahina.✡Gal 2:20. 11 Unuani! Yaubada Iesu anigea si‑vi‑mini‑havinei. Wayahina, aituhu Yaubada Nuana bagibagina nihenimia mamaei, tauna ana pata ininimi anigea na‑si‑vi‑mini‑havinei aitamoata deina.

12 Wayahina, vavaneiu, itoka nau‑wawanika yawaika vidoha Yaubada natunatuna aitamoata deina. Eha nau‑wawanika dewa goyona ininikaia kawaehe kadedewe. 13 Aituhu dewa goyona unua‑tania, ka aituhu ininimi nihenina udedewei, yawai‑vavaha ututu‑haini deina, ka apaina unꞌ‑aniga. Kate aituhu itomi Yaubada Nuana ya bagibagi nui yami dewa goyona uvita‑vovoni, akanai yawai‑vavaha uvaniahei, upoyꞌ‑avini.✡Gal 6:8; Kol 3:5.

14-15 Nonova itomi umatamatauta aniga wayahina, iuna aniga bagibagina. Kate aituhu Yaubada Nuana uawaehei na‑nu nihenimia kadu veimeyemi, akaka Yaubada nꞌ‑awaehemi itomi vivane natunatuna. Yaubada Nuana eha ta‑yohonimi uvi‑tau paisewa‑kavokavovo matauta wayahina, nonova deina. Kate Yaubada Nuana nuami vo‑vinei, ka ataina itomi Yaubada natunatuna. Ka aituhu aviyaivia iawaehei Yaubada Nuana yawai veimeyei, vona ahiahina, taui Yaubada natunatuna. E Yaubada Nuana eta‑naoeka, e Yaubada kavi‑wahani, “AbaV, Amau!”✡Gal 4:5-7; SiV 21:7. ✡2Ti 1:7; Mar 14:36. 16 Ka Yaubada Nuana kadu itoka nuaka ainua iawaehei aitamoata deina vivane itoka Yaubada natunatuna.✡2Ko 1:22. 17 Wayahina, ataina, aituhu Tau Ito‑yavuha ana inahe kavaniahei, ka kadu aituhu inahe‑naia nihenina katoha‑vi‑anai nonova Iesu toha‑vi‑anai deina, akanai itoka nau‑wawanika Yaubada yana gabu kavaniahei, Tau Ito‑yavuha avaha yana gabu vaniahei aitamoata deina. Ka aituhu tuta ataina kadedewei deina, apaina Iesu tauna didigana na‑vo‑pataka vivane itoka didigaka.

18 Ataina itoka inahe kavaniahei tanopia, ka apaina didigaka kavaniahei wahuma. Ka avonemi aituhu aka inahe ataina ka didigaka apaina ainua kabou‑viwavei, didigaka apaina aka inahe ataina vane‑tawane‑vainei. 19 Vona ahiahina, Yaubada ya vevewanaaYaubada ya vevewana tanopi, ka babau, ka wahava, ka wadima, ka wahuma, ka ai deina. Paulo yana ipupu taina vona tana‑minikuna deina. Tauna ipuipupu Yaubada ya vevewana habuhabuna vivane tomotau deina, e vevewanaia ai pata nuanuai kadu yai nuanua mamaei tomotau deina. habuhabui ipotapota (tomotau ipotapota deina) kadu nuanuai ananina Yaubada tauna natunatuna habuhabui na‑si‑vinꞌ‑omanei idudueyei. 20 Nonova, tutana Yaubada Adam ka Eve bwanatai taui yai goyona wayahina, tauna kadu ya vevewana habuhabui bwanatai aitamoata deina. Ya vevewana eha aitam yai dewa goyona, kate Yaubada kadu taui bwanatai deina. Tauna tanopi vo‑vinei, e memeanina mata‑duduna vinꞌ‑omo, kate vitana uana vinꞌ‑omo. Yaubada tauna ya nua‑vaniaha nui ya vevewana habuhabuna bou‑opuei deina, kate ya nuanua✡Nao 3:17-19. 21 apaina, aitam auyewa wayahina, ya bwanatana na‑haponei ividoha. Ka auyewana wayahina Yaubada tauna ya vevewana na‑ito‑yavuhi bwanata aitamoata aitamoata wayahina, itoka natunatuna na‑ito‑yavuhika aitamoata deina. Ka apaina Yaubada tauna didigana ya vevewana vo‑patai, tauna didigana na‑vo‑pataka deina.

22 Tuta naona a itoava tuta ataina wayahina, Yaubada ya vevewanaia ibebebewa, itoutou, vaivine yai viha ivi‑natuna wayahina deina. 23 Ka tuta ataina wayahina, itoka avaha Nuana kavaniahei ininika aninigai nihenina. Wayahina, itoka kadu kabebebewa, katoutou ataina a itoava auyewana ininika vovouna kavaniahei wayahina. Yaubada avaha vi‑putu payayeka, ka apaina, auyewana ininika vovouna kavaniahei wayahina, akanai Yaubada ya paisewana payayeka nau‑yehai.✡2Ko 5:2-4. 24-25 Nonova, tutana Yaubada ya vona‑dabadaba tanoi ininika vovouna wayahina kanononi, vona ahiahina, kavitumahanei, e kavi‑putu yaka nua‑vaniaha nui kapotepotei a itoava ininika vovouna kavaniahei wayahina. Aituhu tomotau avaha aitam aviani ivaniahei, ka aituhu taui avaha idudueyei mataia, eha aitam iuna taui nau‑wawani yai nua‑vaniaha nui ipotepote. Ka itoka eha ininika vovouna kata‑vaniahe. Apaina. Wayahina, ataina itoka nau‑wawanika katoha‑vi‑anai kadu nau‑wawanika yaka nua‑vaniaha nui kapotapota a itoava auyewana ininika vovouna kavaniahei wayahina.

26 Ka kadu Yaubada Nuana Ahihinata vo‑taitaieka yaka ihanua wayahia deina. Iuna eha katꞌ‑anamane medeina kaviama tunuhina. Ka tuta tuta Yaubada Nuana bebebewa na‑ivaiteka, ka tauna toutou kadu viama bagibagina wayahika Yaubada matana. 27 Ka Yaubada avaha nuaka anamanei kadu yaka nuanua anamane‑yehai, iuna tauna naunau‑nene nuaka nihenina. Ka kadu aviani Nuana nuanua, tauna anamane‑yehai. Iuna Yaubada Nuana viama itoka Yaubada natunatuna wayahika, ka Nuana ya nuanua ka Yaubada ya nuanua vivane aitamoata.✡Sam 139:1.

28 Avaha kanamanei Yaubada ya nuanua ahiahina wayahika mamaei, ka kadu tauna honeka iuna ya nuanua nau‑iaiavana kavaniahei. Wayahina, ataina itoka Yaubada kadune‑nuanuaiei, ka tauna dewa aitamoata aitamoata ivinꞌ‑omo‑nananena wayahikaia paipaisewei itoka yaka vidoha wayahina.✡Epe 1:11. 29 Iuna Yaubada tupwaka tomotau habuhabui wayahia mai‑anamaneka, ka vi‑nua‑dadaneka, e yawaika na‑vo‑vinei apaina yawaika tauna Natu‑hoina yawaina aitamoata deina. Ika, apaina yaka nuanua tauna Natu‑hoina ya nuanua aitamoata deina, ka kadu yaka dewa tauna Natu‑hoina yana dewa aitamoata deina. Ka Yaubada ya nuanua itoka tau ekalesia wayahika habuhabuka kavi‑yoko aitamoata, Natu‑hoina mai‑tupuina, kadue tauka habuhabuka taitaina.✡Kol 1:18; Ebe 1:6. 30 Nonova Yaubada vi‑nua‑dadaneka ka ataina tauna honeka, kadu vo‑vi‑tunutunuhika matana, kadu tauna didigana vo‑pataka vivane didigaka.

31 Vona ahiahina, memeanina kadueyei Yaubada ya dune‑nuanuai aitamoata aitamoata wayahikaia vivane ani‑vainena. Wayahina, itoka nau‑wawanika kanau‑kaiwa Yaubada wayahina ya dewaia wayahina. Yaubada yaka tau vo‑taitai kadu tauna yaka tau ito‑yavuha kadu aka niam. Wayahina, aituhu tomotau imana‑giboeka, o aituhu inau‑havieka, taui Yaubada ai havia deina.✡Sam 118:6. 32 Iuna Yaubada tauna Natu‑hoina eha ta‑nua‑tania, kate awaehei kadu vi‑nomui itoka wayahika. Yaubada dewei deina, iuna ya nuanua na‑vo‑vi‑tunutunuhika matana. Nau‑wawanika tauna ya dewana ananina kanuanuani. Wayahina, memeanina tauna wayahina aituhu aviani habuhabuna kikituna nau‑wawanika, akanai tauna ya dewa‑haiawa nui veneveneka. 33 Yaubada avaha vi‑nua‑dadaneka, kadu tauna avaha vo‑vi‑tunutunuhika matana. Wayahina, aituhu mani tomotau iapa‑goyogoyoeka, dewana eha aitam aviani, iuna Yaubada avaha apa‑vidovidoheka.✡Isa 50:8-9. 34 Tomotaui iapa‑goyogoyoeka aviyaivia? Taui ai wava eha aitam aviani, iuna Tau Ito‑yavuha Iesu avaha aniga wayahika, kadu wayahika anigea mini‑havine. Tauna yaka Tau Ito‑yavuha kadu tauna tomotau aitamoata aitamoata bagibagi‑tawanei. Ka Yaubada avaha Iesu awaehei ya vevewana habuhabuna veimeyei. Udu! Tuta tuta Iesu viama wayahika Yaubada matana.

35 Ka Tau Ito‑yavuha ya dune‑nuanuai wayahika ani‑vainena kadu bagibagi‑vainena. Tauna ya dune‑nuanuai wayahika tomotau aitamoata aitamoata yai bagibagi bagibagi‑tawanei. Ka kadu ya dune‑nuanuai wayahika dewa habuhabuna bagibagi‑tawanei. Eha aitam vita, o inahe, o am navovo, o nagonegonena, o matauta aniga wayahina ana pata Yaubada ya dune‑nuanuai wayahika na‑bagibagi‑tawane. 36 Iginuma voneka deina. Nonova me Isiraeli ivona,

37 Ka avonemi, dewa habuhabuna pai dune aka inahe ivinꞌ‑omo‑nananena wayahikaia. Ka Yaubada dune‑nuanuaieka, kadu tauna yana ivaita ani‑vainena wayahikaia. Wayahina, itoka aka pata inahe aitamoata aitamoata kavane‑tawanei.

38-39 Udueyei. Yaubada avaha ya dune‑nuanuai ani‑vainena wayahikaia viwaveneka taina deina. Tauna Natu‑hoina Tau Ito‑yavuha Iesu yaka Kauvea vi‑tunei omo wayahikaia. Ka Yaubada ya dune‑nuanuai wayahika aitam manawa kainumu bagibagi‑vainena deina, ka eha aitam aviani o eha aitam dewa ana pata manawana na‑upwe.