5
Iesu tomogo yaiaina i ageiga i 'ive'atumaia
(Madiu 8:28-34; Luke 8:26-39)
1 Iesu ma enavo i maia lavu vi'ainega me Gelasine yadi 'awalaweye. 2 Tutuyanina i le'wai, wakayega Iesu i obu tamu tomogo yaiaina i ageiga i veluagai, i mimai taumata 'waidiega. 3-4 Tomogonina yana 'eba mia taumata 'awasasadie, tutuya fuedi tomotoga 'agena wata nimana i yogoyogonidi bulava kainumu 'waidiega siwe i sisidabadabadi. Kebu tamu aitoi i na vetoketoke bega i na 'ive'avini wata i na yogoni. 5 'Aiata lovana 'aitamogana 'aitamogana taumata 'awasasadie wata 'oyeye i vevebwaubwau taunina i nikenikei kileuyega.
6 Tomogonina 'ani'ieyega Iesu i 'isanaweni, i lilide i nago i lumata'afufu mataneye. 7-8 Iesu yaiaina i voneni i vo, 'U 'awa'a'imu 'omu yaiaina sakoimu.” Yaiaina i vebwaubwau bonana bwaikinega i vo, Iesu, 'omu Yaubada Tabwaotogineye Natuna, ava'ai nuanuamu 'u na 'idewai 'waikuye? Yaubada 'ana wagavayega a velu'ui 'waimuye kebu 'u na 'ivekokoviku.” 9 Wata Iesu i velutolieni i vo, 'Omu aitoi 'amu wagava?” I vo, 'Aku wagava 'Aila'a, fai 'aku labilabina fuedi.” 10 Wata i toke i vevelu'ui 'waineye i vo, Kebu nuanuama 'u na veugeugema de'e 'awalawanina 'wainega.”
11 Bawe fatala bwaikina 'oya lilivaneye i luluduaduala. 12 Yaiaina i taidaida Iesu 'waineye i vo, 'U da vetunema wata 'u da tauyema bawenidi 'a na agedi.” 13 Iesu i tauyedi nika yaiaina i 'awa'a'idi i nagoi bawe i agedi. Bawenidi 2,000 fatala bwaikina, i ve'ilililide 'oyeamo i obu nika i sou bwagale i ve'alamonumonu lavuye.
14 Bawe 'adi to'isave'avinavo i 'iseni i lilide i nagoi i veifufuyeni 'atamana wata kweda 'waidie, bega tomotoga fuedi i nagoi i na 'iseni ava'ai i vonevoneyeni. 15 Tomotoganidi i maia Iesu 'waineye, tomogonina basenadi yaiaina fuedi i ageiga i 'iseni, 'akonadi yana nuanua i ve'atumai i ve'wesena ma 'ana talauma i miamia, nika tomotoga matatabudi i ve'alakolokololo. 16 Tomotoganidi matadie tomogo i ve'atumaiga wata bawe yadi monu, faifaidi tomotoga i le'wai 'waidie i veifufu. 17 Begaidi 'atamananina 'ana tomotogavo Iesu i lukakadeni nuanuadi i na tauya yadi 'awalawa i na 'iaweni.
18 Mulieta Iesu i dododoga nika tomogonina yaiaina i ageiga i velu'ui-nuakalikali i vo, Iesu yau nuanuaku taiadi ta da nago.” 19 Siwe Iesu i talabodeni i vo, 'Auvea i 'isanuakalikaliemu i 'ive'atumaimu, bega 'u na nago yamu 'aila'a 'waidie 'u na lu'ivona.” 20 Bega tomogo i nago naninidi matatabuna Iesu i 'idewadiga faifaidi i lu'ivona 'awalawa Dekafolisi matatabuna 'waineye. Tomotoga fuedi i nogai nuadi i voganidi.
Yailo natuna yana ve'atumai wata vavine tamu Iesu 'ana talauma i 'abitonovi
(Madiu 9:18-26; Luke 8:40-56)
21 Iesu ma enavo i vila-vaituganidi i damanama de'e bega lavu lilivaneye 'aila'a bwaikina i maia i sififineni. 22-23 Me Diu yadi 'eba miava'auta 'ana to'edakumeta tamu, 'ana wagava Yailo Iesu i 'iseni i nago 'waineye ma yana ve'ililibu i lumata'afufu Iesu 'ageneye i velu'ui-nuakalikali i vo, Natuku vevinena sai'afoga yawaina i na 'a'ava. 'U da mai ta da nago nimamu 'u da yatoi 'waineye bega i na ve'atumai.” 24 Iesu Yailo taiadi i nunago wata 'aila'a bwaikina i vevetunufelagieni, nuanuadi Iesu i na yogo'waili.
25 'Aila'anina nagedie tamu vavine, vevine 'adi viga i 'ewadi, malamala 12 nagedie kebu i da 'a'ailove viganina i 'eno'eno. 26 Tutuya fuedi i nunago toawakweli fuedi 'waidie igodi i na ve'atumai siwe viganina i vebwaika kebu i da veve'atumai, we'e yadi kukua i ve'a'avadi fu'eyega. 27-28 Iesu valana i nogai bega 'aila'a taiadi i nunagoi, yadi nuanua i vo, 'Ai'edi Iesu 'a na 'abitonoviga 'a na ve'atumai siwe wata 'ai'edi 'ana talauma'ava 'a na 'abitonovimo 'a 'asetai 'a na ve'atumai.” 29 Tutuyanina i 'abitonovi 'adi viga i 'a'ava i vebaedi 'akonadi i ve'atumai.
30 Nika Iesu i 'asetai yana toketokena i damana vavine 'waidie bega i sivilai i velutoli i vo, Aitoi 'aku talauma i 'abitonovi?” 31 Yana tovetutuyamavo i vo, 'U 'iseni, 'aila'a bwaikina i vetunufelagieni, awale 'u vo, Aitoi i 'abitonoviku?’ ” 32 Siwe Iesu i 'i'isadaba nuanuana i na 'asetai aitoi i 'abitonovi. 33 Vavine i 'asetai i lulualedi begaidi i kololo, ma yadi tatava wata ma yadi ve'ililibu i lumata'afufu Iesu 'ageneye i lu'ivona mogitana taunidi faifaidi. 34 Iesu i vonedi i vo, Natuku, yami vetumagana 'waikuye i 'ive'atumaimi. Ma yami sosoana 'wa na nago, 'ami viga i 'a'ava-vagata.”
35 Tutuyanina Iesu vavine 'waidie i vonavona 'ifwaidi tomotoga i le'wai Yailo yana vanugayega i voneni i vo, Natumu 'akonadi yawaina i 'a'ava. Kebu wata Tove 'u na vevekadia.” 36 Iesu i nogai Yailo i voneni i vo, Kebu bonadi 'u na nogaiga wata kebu nuafoumu i na veviga 'u na vetumaganamo.” 37 Fuedi i talabodedi tomotoga 'adi 'aitonu taiadi i nagoi, Fita, Iemesa wata taina Ioni. 38 Tutuyanina i le'wai Yailo yana vanuge, Iesu 'aila'a i 'isedi wata vemogai bwaikina. 39 Bega i luku vanuga nageneye i velutoliedi i vo, Awale 'wa vevemogai? Kwamana de'e kebu i da wafaga, i 'eno'enomo.” 40 'Aila'a Iesu i sidibidibieni wata i namageni fai i 'asetai kwamananina mogitana i wafa.
Iesu i vonedi matatabudi i souyedi, mulieta enavonidi, kwamana tamana wata inana taiadi i luku kwamananina yana tutudaba 'waineye. 41-42 Kwamana nimaneye i 'abi bonanega i voneni i vo, Talaida kumi,”'ana saivila i vo, Kwamana, 'u tovoi,” nika i tovoi i yaba. Kwamananina 'ana malamala 12. Tomotoga i 'iseni nuadi i voganidi. 43 Iesu i talabodedi i vo, Kebu 'wa na lu'ivonaga siwe 'ani'ani 'wa na veleni i na 'ani.”