6
Keliso 'ana miave'itubama 'wainega mia 'ivauna ta veluagai
1 Yaubada yana nuakalikali nani bwaikaotogina, bega 'wa da nuani? Tutuya fuedi ta na sakosakonaga i lubwaineni, bega 'ana fata Yaubada yana nuakalikali i na vevebwaika? 2 A nuani kebu'a'avaotoga. 'Ai'edi tamu aitoi i na wafaga yana mia fwayefwayeye i 'a'ava, wata bani'odi 'ida sauluva sakoidi ta vedumwe'ai'aieni, 'wa da vo ta da wafa 'waineye. Fai ta wafaga sakona yana toketokena 'waideye i 'a'ava, bega 'ai'edi ta na sakosakonaga kebu i da lubwaineda. 3 Ava'ai a na voneyeniga 'akonadi 'wa 'asetai. Tutuyanina ta bafitaiso Iesu Keliso 'ana wagavayega, 'akonadi taiadi ta miave'itubama. Fai ta miave'itubama taiadi, yana wafa 'waineye 'wa da vo taiadi ta da wafa. 4 Kol 2:12Keliso i wafaga i tavuni, wata bani'odi ta bafitaiso i lekoada ufayega 'wa da vo Iesu taiadi ta da wafa i da tavunida. Fai bani'odi ta wafayediga, bega Yaubada Tamada Keliso i sivetovoia wafayega yana toketokena 'wainega wata 'ida i sivetovoida bega mia 'ivauna wata 'atumaina ta veluagai.
5 Ta wafaga wata i sivetovoida mia 'ivauna ta veluagaiga 'adi 'aseta side bani'odi. Kebu 'aisedaga, Keliso taiadi ta wafa wata bani'odi Yaubada i sivetovoiaga, fai taiadi ta miave'itubama 'ida mogitana i na sivetovoida. 6 'Akonadi ta 'asetai tutuyanina Keliso i tutufwaseni 'ai lagalagana 'waineye, yada nuanua sakoidi nagami, taiadi i tutufwasedi i wafa. Basenadi sakona i vetoketoke 'waideye, sakonanina yana nuanua ta 'i'idewadi, siwe fai bani'odi ta wafayediga Keliso taiadi, kebu 'ana fata sakona wata i na veveimeyeda. 7 'Ai'edi aitoi Keliso taiadi i na wafaga, sakona kebu 'ana fata i na veveimeyeni.
8 Fai Keliso taiadi ta wafaga, ta vetumagana wata Keliso taiadi ta na miamia. 9 Mogitana taiadi ta na miamia fai ta 'asetai Yaubada Keliso i sivetovoia kebu 'ana fata i na wafa-vaitugana, kebu wata wafa i na vetoketoke 'waineye. 10 I wafa-vetamogai tutuya matatabuna faifaina sakona yana toketokena i 'ewayavuleni. We'e tutuya de'e i miamia, bega Yaubada 'ana subia wata 'ana awa'ai'ai i veveluagai 'wainega. 11 Wata bani'odi taunimi 'wa na nuanimi 'wa na vo, 'Ima 'a wafa Keliso taiadi, sakona kebu 'ana fata i na vetoketoke 'waimeye, wata fai Iesu Keliso taiadi 'a miave'itubama, ma yawaima taunima 'a na tautauyema Yaubada 'waineye.”
Ta na tauyeda Yaubada yana nuakalikali i na veimeyeda
12 'Omi 'wa miave'itubama Keliso taiadi, siwe 'ai'edi sakona i na vetoketoke tomogomie bega yana nuanua 'wa na vematayakeyakedi, 'wa na sakosakonaga kebu i da lubwainemiga. 13 Wata kebu tamu du'umi 'wa na tauyeni sakona 'waineye 'wa na vefoloveni. We'e mogitana taunimi 'wa na tauyemi Yaubada 'waineye fai wafayega i vevilami bega mia 'ivauna wata 'atumaina 'wa veluagai. Taunimi 'wa na 'anivelenemi 'waineye yana nuanua tonovidi 'wa na 'i'idewadi. 14 Tutuya de'e veimeanidi i mai Mosese 'wainega kebu i da lulukakademi 'ami 'ive'atumai faifaina basenadi bani'odi, we'e mogitana yavuyavumi Yaubada yana 'isanuakalikali nageneye 'wa miamia, begaidi sakona kebu i na veveimeyemi.
Ta na vetofolova sauluva tonovidi 'waidie
15 'Ada 'ita'ita'i kebu ta da veluagaiga veimea 'adi vematayakayaka 'waidiega, we'e mogitana Yaubada yana 'isanuakalikali 'wainega ta veluagai. 'Wa da nuani, ta na sakosakonaga i lubwaineni 'alo kebu? Kebu'a'avaotoga. 16 'Wa na nuani, 'ai'edi 'wa na nago tamu tomogo bwaikina 'waineye 'wa na vo, 'Auvea, nuanuaku a na vetofolova-maimaiga, tauniku a tauyeku 'waimuye yamu veimea matatabuna a na vematayakeyakedi,”'omi 'akonadi tomogonina yana tofolova-maimaiga. Wata bani'odi 'ai'edi taunimi 'wa na tauyemi sakona 'waineye siwe 'asa'aiana 'akonadi 'wa vetofolova sakona 'waineye i na nagoga wafa i na souyeni. We'e 'ai'edi taunimi 'wa na tauyemi Yaubada 'waineye yana nuanua 'wa na vevematayakeyakediga, siwe 'asa'aiana 'akonadi 'wa vetofolova Yaubada 'waineye i na nagoga i na 'ive'atumaimi. 17 Ta na vekaiwa Yaubada 'waineye, fai basenadi 'wa vetofolova sakona 'waineye, we'e tutuya de'e taunimi 'wa tauyemi mogitana Keliso yana tomotoga yadi ve 'waidie, yadi venidi vona tonovidi 'wa vevematayakeyakedi. 18 'Omi 'akonadi Yaubada i yavumi sakona 'wainega, sakonanina nagami 'ami toveimea we'e 'asiau 'wa vetofolova sauluva tonovidi 'waidie, taunina 'ami toveimea 'ivauna.
19 Vonanidi a voneyediga vitadi 'waimie we'e tofolova wata 'adi toveimea 'waidiega a awatalatutula nika 'wa na 'aseta-matayo'oi. Nagami taunimi 'wa tauyemi mogitana bunu 'ana nuanua sakoidi 'waidie, bega yami sakona i vebwaika-'afo'afo, we'e tutuya de'e i lubwainemi taunimi 'wa na tauyemi sauluva tonovidi 'wa na 'i'idewadi i na nagoga nika yami sauluva magemagetadi, 'wa da vo 'wa na vetofolova sauluvanidi 'waidie. 20 Nagami 'wa vetofolovaga sakona 'waineye, sauluva tonovidi kebu faifaidi 'wa da nuanuaga. 21 Tutuyanina 'waineye ava'ai naniga 'atumaina 'wa veluagai sauluvanidi sakoidi 'waidiega? Sauluvanidi 'adi tutula wafa, we'e 'asiau faifaidi bunumi i mayaga. 22 Tutuya de'e 'akonadi Yaubada i yavumi sakona yana toketokena 'wainega, ma'itufa 'wa vetofolova Yaubada 'waineye. Yami sauluvanidi 'wa 'i'idewadiga i na nagoga yami sauluva matatabuna magemagetadi nika mia 'atumaina wata miamia-vagaina 'wa na veluagai. 23 Sakona 'ana tutula wafa, we'e Yaubada yana 'anivelena-maimaiga 'waideye mia 'atumaina wata miamia-vagaina fai ta miave'itubama 'ada Toveimea Iesu Keliso taiadi.