FOLOVA
Iesu 'ana tomata'aulelevo yadi folova,
Luke 'ana kilukiluma
'Eba kiavemageta
Buki de'e 'ana wagava Tomata'aulelevo yadi Folova, Luke yana buki 'ana veluga, tomata'aulelevo 'aitamogana 'aitamogana yadi folova i veifufuyedi buki de'e nageneye. Veifufunidi 'ifwaidi taunidi i veifufuyedi Luke 'waineye we'e 'ifwaidi taunina i 'asetadi fai Faulo taiadi i yabayaba wata yadi 'eba mia 'aitamogana. Begaidi daba 16 'waineye ta na 'iseni Luke i vo, 'Ima 'a dodoga.” Wata i vo, 'Ima 'a le'wa.” Bega tomotoga 'ifwaidi yadi nuanua i vo, Tutuyanina Faulo i miamia Loma vanuga yogona nageneye buki de'e Luke i kilumi.”
Luke i kilumaga 'Anu'anunu Magemagetana yana toketokena 'wainega tomata'aulelevo wata tovetumagana Iesu faifaina i lau'age, we'e tomata'aulelevo Iesu 'ana wagavayega 'eba nuavogana wata 'eba nua'ewa ma 'adi 'eba 'isa i 'idewadi, bega tomotoga 'awalawa fuedi 'waidie i vetumagana 'waineye. Iesu yana tomata'aulelevo 12 yadi lau'age i velamu Ielusalema nageneye, tutuya kamwaneye 'ifwaidi tomotoga bani'odi Filifi i nago 'awalawa Samelia bei i lau'age, mulieta Faulo 'ainegi i nagoi 'awalawa fuedi 'waidie Iesu valana i lau'age-vuvueni.
Nagami me Diu 'ifwaidi i vetumagana Iesu 'waineye, mulieta mali tomotoga kumanidiavo kebu Diu wata i vetumagana Iesu 'waineye. 'Anu'anunu Magemagetana yana 'aivaita 'wainega, taiadi i luvetubama nika 'aila'a 'aitamogana.
Tutuyanina 'waineye me Diu to'edakumetavo i nuasako tovetumagana 'waidie, bega tomata'aulelevo i 'i'ive'avinidi i nunawedi 'eba vonayavuga 'waineye. We'e Loma kabemani nuanuadi i na 'asetai ava'ai sakonaga faifaina i 'i'ive'avinidi, siwe i lalauala-wayoga, kebu tamu sakona i da veluagai 'waidiega.
Wata Luke nuanuana Loma kabemani i na 'asetai Iesu 'ana tovetumaganavo kebu tovedumwe'ai'ai, we'e mogitana Loma kabemani yadi veimea matatabuna i vematayakeyakedi. Diu to'edakumetavo tutuya fuedi tomata'aulelevo i 'i'ive'avinidi, i nunawedi 'eba vonayavuga 'waineye. We'e Loma toveimea nuanuadi i na 'asetai ava'ai sakonaga faifaina siwe i lalauala kebu tamu sakona i da veveluagai 'waidiega.
Buki de'e nageneye 'Anu'anunu Magemagetana yana folova ifufuna i 'eno'eno. 'Anu'anununina Iesu yana tomotoga i kiavetoketokedi, wata nuanua tonovidi i veledi. Begaidi 'ai'edi bukinina ta da goleni 'Anu'anunu Magemagetana Yana Folova, i lubwaineni. Buki de'e 'ana 'idi side bani'odi.
Tovetumaganavo 'adi 'aila'a yana 'eba velamu wata yana vebwaika. 1:1-5:42
Tovetumaganavo vita i veluagadi siwe i vetoketoke. 6:1-9:31
Fita yana lau'age-vuvua faifaina. 9:32-12:25
Faulo yana lauvivila kumekumetana. 13:1-14:28
Tovetumagana yadi to'edakumetavo i va'auta Ielusalema. 15:1-41
Faulo yana lauvivila 'ana veluga. 16:1-18:23
Faulo yana lauvivila 'ana vetonu. 19:1-21:16
Faulo 'ana 'ive'avina wata yana nago Loma. 21:15-28:31
1
1-2 Luk 1:1-4Iaku Tiofilo, basenadi yaku buki kumekumetana*Buki kumekumetana. Bukinina 'ana wagava Luke. 'waineye a kilumiga tutuyanina Iesu yana folova i velamu nani matatabuna i 'idewadi wata i ve faifaidi, i nagoga nika Yaubada i vagavaia i naweni abame. Bola kebu i da lakaga, nagami 'ana tomata'aulelevo vevenua'ivinidi yana awave'eda'eda i veledi 'Anu'anunu Magemagetana 'wainega. 3 Iesu i yawasa-vaitugana yana veviga i 'a'ava, 'aiata 40 nagedie i sousouyeni 'ana tomata'aulelevo 'waidie, 'eba 'isa fuedi i 'idewadi bega i na 'asetai mogitana ma yawaina wata Yaubada yana veimea tomotoga 'waidie i veifufuyeni. 4 Luk 24:49Tutuyanina Iesu taiadi i miamiaga i velu'ase'asedi i vo, 'Wa na miamia Ielusalema, 'Anu'anunu Magemagetana 'wa na lulukamaseni. Tamaku basenadi i vona'awaufaufaga 'waimie i na velemi wata yau bani'odi bagase a vonemi. 5 Mad 3:11; Mak 1:8; Luk 3:16; Ion 1:33Ioni tomotoga i bafitaisodi ufayega, 'aiata 'ifwaidi i na 'a'avana, 'Anu'anunu Magemagetana i na agemi, 'wa da vo bani'odi Yaubada i da bafitaisomi.”
Yaubada Iesu i vagavaia i naweni abame
6 Tamu 'aiata Iesu ma yana tomata'aulelevo i miava'auta i velutolieni i vo, 'Auvea nuanuama 'u da vonema, tutuya de'e me Isileli 'u na yavuda me Loma yadi veimea 'wainega, we'e ma'itufa yada 'eba veimea 'u na luvaitugani?” 7 Iesu i vonedi i vo, Nani de'e nuanuami 'wa na 'asetai siwe kebu i da lubwainemi. Yaubada Tamaku 'aisena i veimeyedi ava'ai tutuyaga nuanuana bani'odi i na 'idewai. 8 Mad 28:19; Mak 16:15; Luk 24:47-48Siwe nani de'e 'wa na 'asetai. Tutuyanina 'Anu'anunu Magemagetana i na agemi 'wa na vetoketoke bega 'wa na vetolu'ivona faifaiku, tomotoga i miamiani Ielusalema 'waineye, 'awalawa Iudia 'waineye, Samelia matatabuna nageneye wata tomia fwayafwaya matatabuna 'waidie.” 9 Mak 16:19; Luk 24:50-51Tutuyanina Iesu yana vona i 'a'ava, tomata'aulelevo matadie Yaubada i vagavaia, i vevemata'i'i'ieni i lakalaka nika waowa 'waineamo i luku abame.
10 Bola i vevemata'i'i'ieni nika tomotoga 'adi 'ailuga abamayega i souyedi lilivadie ma 'adi talauma mataududulidi i tovotovoi. 11 Nika i vo, Tomotoga Galili, ava'ai faifaina 'wa 'i'isalaka abame? Ta'e Iesu 'waimiega i vagavaia i nunaweni abame, bola i na vila-vaitugani wata beidimo i na mai bani'odi 'wa 'iseni i nunago.”
Tamu tomogo Iudasa tutulina
12 Tomotoganidi abamayega i nagoi, mulieta tomata'aulelevo 'aise'avadi 'Oya Olive 'wainega i viladi i nagoi Ielusalema, kebu 'ani'iega vivideye.†'Ana vemanawe kilomita 'aitamogana. 13 Mad 10:2-4; Mak 3:16-19; Luk 6:14-16Matatabudi i luku tamu vanuga 'waineye. Vanuganina 'etotubwatubwana tutudaba 'ifwaidi dibuneye, 'ifwaidi tabwaneye. I laka tutudaba tabwaneye bei i miamianiga 'waineye. Tomotoganidi side 'adi wagava,
Fita,
Ioni,
Iemesa,
Anidulu,
Filifi,
Tomasi,
Batolomiu,
Madiu,
Iemesa tamu, taunina Alefasi natuna,
Saimoni, toawa'idi'idi kebu nuanuana Loma kabemani i na veveimeyedi,
Iudasa, Iemesa natuna.
14 Tutuya fuedi tomotoganidi i vava'auta i vevelu'ui Yaubada 'waineye wata 'ifwaidi vevine, Meli Iesu inana wata tainavo taiadi.
15-17 'Aiata 'ifwaidi i 'a'ava, Iesu 'ana tovetumaganavo i miava'auta 'adi 'aila'a bani'odi 120. Fita i tovoi i vonedi i vo, Ekwavo, a na vonemi. Basenadiotoga 'Anu'anunu Magemagetana i venuayato Kini Devida 'waineye bega i kilumi Yaubada yana Buki nageneye tamu tomogo Keliso i na 'etogiluveni. I lubwaineni vonanina 'ana mogitana i souyeni, to'etogiluvanina 'asa'aiana Iudasa Isakaliota, tamu 'ada 'aila'a. Basenadi Iesu i venua'ivineni 'ada folova-vaita, siwe kumanina Iesu 'ana to'ive'avina i kumesedi.
18 Mad 27:3-8We'e Iudasa yana 'etogiluva tutulina 'wainega tamu fwayafwaya i kimwanei. To'etogiluvanina tabwanega i be'u kamona i tutulabu'eni, kamokamona i yavula i wafa. 19 Tomotoga fuedi Ielusalema 'waineye valana i nogai, begaidi tanoganina Diu bonadiega i goleni Akelidama, 'ana saivila, Tanoga Dayadayagina.”
20 Sam 69:25,109:8Wata Fita i vonedi i vo, Basenadiotoga Kini Devida i kilumi Yaubada yana Buki Same 'waineye to'etogiluvanina faifaina i vo,
Yana vanuga i da venage'ava, bei kebu tamu aitoi i na miamiana.’
Wata i kilumi i vo,
Tamu tomogo tutulina i da folofolova.’
21-22 Mad 3:16; Mak 1:9,16:19; Luk 3:21, 24:51Fai Yaubada yana Buki bani'odi i voneyediga, i lubwaineda tamu tomogo ta na venua'ivineni Iudasa tutulina, bega ma fuedeye Iesu yana yawasa-vaitugana ta na lulu'ivoneyeni. Tomogonina ta na venua'ivineniga tamu yada 'aila'a, basenadi taiadi ta yabayaba, mataneye Iesu 'ana bafitaiso Ioni 'wainega wata yana folova matatabuna i 'isedi, i nagoga nika Iesu i laka abame.”
23 Tutuyanina Fita i vona'a'ava, tovetumaganavo tomotoga 'adi 'ailuga i 'inanadi. 'Adi wagava Iosefa tamu 'ana wagava Balisaba we'e 'ifwaidi yadi 'eba 'ainana Iusito, wata Mataiasi. 24-25 Fuedi i velu'ui i vo, Ie 'Auvea, basenadi Iudasa i vetomata'aulele siwe i baila i wafa i nago ava'aibe bei i lubwaineniga 'waineye. Tomotoga matatabuma yama nuanua 'u 'asetadi, bega nuanuama tomotoga de'e 'adi 'ailuga 'waidiega 'u na vema aitoi 'u venua'ivineni bega i na vetomata'aulele Iudasa tutulina.” 26 Yadi velu'ui i 'a'avana, tomotoganidi 'adi wagava i kilumidi kileu 'adi 'ailuga 'waidie, i dodogidi vedie, mulieta tamu tomata'aulele vedi i likweni, kileunina Mataiasi 'ana wagava i kilumiga i 'anita'ia, bega fuedi i 'asetai taunina Yaubada i venua'ivineni bega tomata'aulele tamu 'adi 'aila'a 'ana ve-12.