KOLOSE
Faulo yana kiluma me Kolose 'waidie
'Eba kiavemageta
Tutuyanina Faulo i miamia Loma vanuga yogona nageneye lubulubu de'e i kilumi me Kolose faifaidi. We'e wata tamu lubulubu i kilumiga Filimoni faifaina fai taunina tomogo Kolose, bega lubulubunidi 'ailuga Tikiasa wata Onesimo i nawedi. Kolose sai'afo Efeso lilivaneye, 'awalawa Eisia nageneye. Kolose tovetumagana 'adi 'aila'a i souyeniga kebu Faulo yana lau'age 'wainega, Faulo taunina i miamia Efeso we'e Efafilasi i vetunei i lau'age 'waidie nika tovetumagana 'adi 'aila'a i souyeni. (Kolose 1:7) Efafilasi 'atamana 'ailuga 'waidie i folova Kolose lilivaneye, Lodisia wata Ilafolisi. (Kolose 4:13) Kebu tamu tutuya 'atamananidi 'adi tomotoga Faulo i da 'isediga, siwe faifaidi i nuanua wata i vevelu'ui.
Efafilasi i nago Faulo 'waineye i lu'ivona tove-vekavekali faifaidi, bega Faulo lubulubu de'e i kilumi, kebu nuanuana tovekalinidi me Kolose yadi vetumagana i na 'ivesakoidi. Tovekalinidi nuanuadi tovetumaganavo ma yadi subia i na 'odu'odu tomotoga bwaikidi wata toketokedi bani'odi anelose 'waidie, kumanidiavo i miamia abame. Wata i vonaga Iesu kebu mogitana Yaubada Natuna, taunina tamu anelose bani'odi. Wata tovekalinidi nuanuadi bunu 'aibobo wata veimea 'ifwaidi Mosese 'wainega i na vevematayakeyakedi.
Lubulubu de'e 'wainega Faulo i ve me Kolose 'waidie Keliso 'asa'aiana kumanina Yaubada yana 'ai'aiwabu, yana sauluva wata yana nuanua i vesala. Keliso 'wainega Yaubada nani matatabuna i 'idewadi wata taunina tovetumaganavo yadi To'edakumeta. Keliso 'aiseotogina 'ita'ita'i wata mia 'atumaina lamuna. Lubulubu de'e 'ana 'idi side bani'odi.
Faulo yana vona-vekaiwa. 1:1-2
Faulo i vekaiwa wata i velu'ui me Kolose faifaidi. 1:3-14
Keliso yana vebwaika wata yana folova faifaidi. 1:15-23
Faulo yana folova tovetumagana 'adi 'aila'avo faifaidi. 1:24-2:5
Me Kolose i na miave'itubama Keliso taiadi, we'e tove-vekavekali i na bailedi. 2:6-3:4
Sauluvanidi tovetumaganavo 'adi laubwaina. 3:5-4:1
Velu'ase'ase 'ifwaidi wata yana 'alanuai. 4:2-18
1
1-2 Emavo, yau Faulo iada Timoti taiadi 'a vekaiwa 'waimie. Yaubada nuanuana, bega a vetomata'aulele Iesu Keliso faifaina, we'e 'omi Yaubada yana tomotoga vevenua'ivinimi, 'wa miamia 'atamana Kolose 'waineye. 'Aila'animi 'wa miave'itubama Keliso taiadi, 'waimie a kilukiluma. 'A vevelu'ui faifaimi, nuanuama Yaubada Tamada ma yana nuakalikali i na vevesauluva 'atumaina 'waimie wata nuanua bikana mia 'atumaina taiadi i na velevelemi.
Faulo i vekaiwa Yaubada 'waineye me Kolose faifaidi
3-4 Tutuya fuedi faifaimi 'a vevelu'ui wata 'a vevekaiwa Yaubada 'waineye, kumanina 'ada Toveimea Iesu Keliso Tamana. Fai valami 'a nogai yami vetumagana Iesu Keliso 'waineye toketokena wata Yaubada yana tomotoga matatabudi 'wa nunuakalikaliedi. 5 Basenadi Iesu Valana 'Atumaina 'wa nogai, Valanina Yaubada yana Vona tonovina, nika bei 'wa nuani mogitana 'awaie 'ami veuveuta 'atumaidi 'wa na veluagadi Yaubada 'wainega. 'Ami veuveutanidi Yaubada 'akonadi i 'idewadi abame i 'eno'enovi, bega ma yami vetumagana faifaidi 'wa lulukamata. Fai naninidi 'wa nuani mogitana 'awaie 'wa na veluagadi, 'wa nunuakalikali wata 'wa vevetumagana. 6 Valanina Iesu faifaina basenadi 'wa nogaiga, i vevebwaika tomia fwayafwaya matatabuna 'waidie, 'atumaina wata ma vuagina. Wata 'omi bani'odi. Tutuyanina valanina 'wa nogai wata 'wa 'asetai mogitana Yaubada ma yana nuakalikali i vesauluva 'atumaina 'waimie, i maiga 'asiau Iesu Valana i vevebwaika 'waimie wata yami sauluva i veve'atumai 'wa da vo ma vuagina. 7 Kol 4:12; Fmi 1:23Yami 'asetanina Yaubada yana nuakalikali faifaina Efafila 'wainega 'wa nogai, iadanina to'idumwebika ta nuakalikalieni, ma fuema 'a vetofolova Keliso faifaina, kumanina tutulima i wai 'waimie. 8 We'e 'wa nuakalikaliga Yaubada 'Anu'anununa yana 'anivelena 'waimie, faifaina Efafila i vonema.
Faulo i velu'ui nuanuana me Kolose i na vetoketoke Keliso faifaina
9 Valami 'a nogai bega tutuya fuedi 'a vevelu'ui faifaimi. Tutuyanina 'a nogai i maiga 'asiau kebu 'a da 'ailove 'a vevelu'ui Yaubada 'waineye faifaimi bega naninidi Yaubada nuanuana 'wa na 'i'idewadiga, 'wa na 'aseta-'atumaidi, wata 'Anu'anunu Magemagetana nuamageta i na velemi bega nani matatabuna 'waidie ma yami 'aseta 'wa na vevenua'ivina 'atumaina. 10 Naninidi i na velemiga, nika sauluvanidi 'Auvea yana tomotoga 'adi laubwaina 'wa na 'i'idewadi yami mia matatabuna 'waidie bega 'Auvea 'wa na kiavesosoani. 'Wa na vevesauluva 'atumaina nani tulina tulina 'waidie 'wa da vo yami mia ma vuagina wata Yaubada 'ana 'aseta i na vevebwaika 'waimie. 11 Wata 'a vevelu'ui faifaimi bega tutuya fuedi Yaubada i na kiavetoketokemi taunina yana toketokena magemagetana 'wainega, bega vita tulina tulina i na sousouyediga kebu 'wa na 'abiawa 'wa na tokemaigemi. 12 Ma yami sosoana 'wa na vevekaiwa Tamada 'waineye fai i 'ive'atumaimi bega 'ami fata 'ami veuveuta 'wa na veluagadi yana 'ai'aiwabu 'waidiega. 'Ai'aiwabunidi i 'idewadi yana tomotoga faifaida 'awaie yana 'Eba Veimea magemagetana nageneye i na veleda. 13 Tamadanina i 'ita'ita'ieda Seitani yana veimea dududubalina 'wainega i sidamaneda Natuna nuafouna yana veimea 'waineye. 14 Efe 1:7Natunanina 'wainega Yaubada i tuveobuda sakona 'wainega wata yada sakonanidi i nuatavunidi.
Keliso nani matatabuna i vebwaika-'iawedi
15 Keliso 'asa'aiana kumanina Yaubada 'anununa,
fai Yaubada kebu ta da 'ise'iseniga i vemageta Keliso 'wainega.
Kelisonina Yaubada Natuna, 'eba velamu 'waineye taunina i miamia,
Yaubada 'ana 'idewadewa matatabuda taunina 'ada to'edakumeta.
16 Taunina to'edakumeta fai 'wainega nani matatabuna tomotoga taiadi Yaubada i 'idewada.
Naninidi abame wata fwayefwayeye.
Naninidi ta 'ise'isediga wata kebu 'ada fata ta na 'isediga,
bani'odi kini, tomotoga bwaikidi, toveimea tulina tulina, wata nani toketokedi i miamiani 'awasasa'aveye.
Nani matatabuna i souyedi Keliso 'wainega, taunina yana nuanua faifaina.
17 We'e 'ana 'idewadewanidi bola kebu tamu i da souyeniga, Keliso 'akonadi i miamia,
mulieta nani matatabuna i souyedi i 'a'avana i 'i'isave'avinidi wata i kikiavefa'alidi.
18 Efe 1:22-23Wata Keliso kumanina toveimea yana 'Aila'a faifaina,
'Aila'anina 'asa'aiana Keliso tomogona we'e taunina 'unu'unu.
Keliso 'Aila'anina yana mia 'atumaina lamuna,
wata kumanina nagami wafayega i tovoi-vaitugana.
Begaidi nani matatabuna 'waidiega taunina 'aiseotogina i kumetaotoga.
19 Fai Yaubada nuanuana, tauniotogina i miamia Natuna 'waineye.
20 Efe 2:16Wata Natuna yana wafa 'wainega, 'ana 'idewadewavo matatabuna i veianedi.
Basenadi naninidi abame wata fwayefwayeye tomotoga taiadi i mia'idi Yaubada 'wainega,
siwe Natuna yana wafa 'ai lagalagana 'waineye, dayaginega nani matatabuna i veiana Yaubada taiadi.
21 We'e 'omi basenadi yami sauluva wata yami nuanua sakoidi 'waidiega, Yaubada 'wa vedumwe'ai'aieni 'wa 'awa'idimi 'wainega. 22 Tutuya de'e Yaubada i veianemi Natuna yana wafa 'wainega. Natunanina i vetomotogaotoga i wafa faifaida bega Yaubada i na vagavaimi i na nawemi mataneye, bega 'omi magemagetami, kebu tamu yami sakona wata kebu tamu 'ami 'eba awavesako. 23 Siwe i lubwainemi yami vetumagana Keliso 'waineye fa'alina, kebu 'wa na venuanaluga wata kebu 'wa na fetoga. Tutuyanina Iesu Valana 'Atumaina 'wa nogai, 'wa vetumagana Keliso i wafa 'ami 'ita'ita'i faifaina, wata 'wa nuani mogitana 'awaie 'ami veuveuta 'atumaidi 'wa na veluagadi Yaubada 'wainega, begaidi ma yami vetumagana 'wa lulukamata. Valanina 'wa nogaiga 'akonadi Yaubada yana tomotoga i lu'ivona tomotoga matatabuna 'waidie, we'e yau Faulo a vetofolova faifaina a lalau'age.
Faulo yana folova wata yana veviga Keliso yana 'Aila'a faifaidi
24 Iesu Valana 'Atumaina a lalau'age, we'e 'ana tovedumwe'ai'aivo 'waidiega veviga a veveluagadi faifaimi, siwe ma yaku sosoana. Keliso veviga bwaikina i veluagai, siwe veviganidi bola i 'eno'enovi, bega tomogokuye veviga a veveluagai Keliso yana 'Aila'a 'alo Tomogona faifaina. 25 Yaubada i venua'ivineku a vetofolova Keliso yana 'Aila'a 'awasasamie 'ami 'aivaita faifaina. Yaku folovanina Yaubada yana Vona matatabuna a sisivemagesedi 'waimie. Yana Vonanina a lulu'ageyeniga side bani'odi. 26 Basenadi Yaubada yana nuanua givagivana kebu i da lu'ivoneyeni tomotoga 'waidie, givagivana i 'eno'eno i maiga tutuya de'e i sivemageseni yana tomotoga 'waideye. 27 I sivemageseniga fai nuanuana ta na 'asetai yana nuanuananina givagivana 'atumaiotogina wata magemagetana. Yaubada yana nuanuananina givagivana tomotoga 'ada 'aila'a tulina tulina faifaida side. Keliso i agemi nagemie i miamia, bega 'awaie abame Yaubada yana 'ai'aiwabu magemagetadi i na velemi.
28 Begaidi 'a lalau'age Keliso faifaina tomotoga matatabumi 'waimie, ma yama nuamageta nani tulina tulina faifaidi 'a vevelu'ase'ase wata 'a veve 'waimie. Nuanuama tomotoga 'aitamogana 'aitamogana Keliso taiadi i na miave'itubama i na kumaga bega 'a na vagavaidi 'a na nawedi Yaubada mataneye. 29 Begaidi ma yaku tokemaiga a toke a folofolova. Keliso toketokeotogina yana toketokena i veleku, 'wainega a folofolova wata toketokenanina i folofolova 'waikuye.