2
Nagami 'ida bani'odi towafa, Keliso mia 'ivauna i veleda
1 Kol 2:13We'e 'omi nagami bani'odi towafa. Yaubada yana veimea 'wa geugeudi taunimi 'wa tauyemi sakona 'waidie bega 'anu'anunumi wafawafadi. 2 Yami mia matatabuna 'waidie fwayafwaya 'ana nuanua sakoidi 'wa vevetutuyamedi wata Seitani, kumanina yaiaina yadi tovemata'ai'ai kebu ta da 'ise'iseniga, 'wa vevematayakeyakeni. Tutuya de'e Seitani Yaubada 'ana tovedumwe'ai'ai i lulukakadedi yana nuanua sakoidi i 'i'idewadi. 3 Wata 'ida basenadi tovedumwe'ai'ainidi bani'odi. Taunida ta tauyeda bunu 'ana nuanua sakoidi 'waidie bega sakonanidi tomogoda yadi nuanua nuada i 'ewadi, 'asa'aiana ta 'i'idewadimo. Yada tubuga 'wainega i maiga 'ida tosakona tomotoga matatabudi bani'odi, i lubwaineda Yaubada ma yana nuasako i da vematavulogida yada sakonanidi faifaidi. 4-5 Siwe Yaubada yana 'isanuakalikali 'etowava-wayoga. Fai yana nuakalikali bwaikaotogina 'waideye, avinodi 'anu'anunuda wafawafadi yada sakona 'waidiega, tutuyanina Keliso i sivetovoia wafayega, 'ida wata taiadi bega mia 'ivauna wata 'atumaina i veleda. Mogitana, Yaubada yana 'isanuakalikali 'wainega i 'ita'ita'ieda. 6 Wata 'ida ta miave'itubama Iesu Keliso taiadi, ma fuedeye Yaubada i sivetovoida, mia 'ivauna i veleda i vemiabuida abame Keliso taiadi. 7 I vesauluva 'atumaina 'waideye Keliso 'wainega bega tutuya matatabuna 'waidie, tomotoga i na 'asetai yana 'isanuakalikali bwaikaotogina 'etowava-wayoga 8 Tutuyanina 'wa vetumagana Keliso 'waineye, Yaubada i 'ita'ita'iemi yana 'isanuakalikali 'wainega. Kebu taunimi yami folova 'waidiega, we'e mogitana Yaubada yana 'anivelena-maimaiga 'wainega. 9 Fai 'ami 'ita'ita'i kebu 'wa da veluagai yami folova 'atumaidi 'waidiega, begaidi kebu tamu aitoi 'ana fata taunina i na awa'ai'aia 'ita'ita'i i veluagaiga faifaina. 10 'Ida Yaubada 'ana 'idewadewa, i 'ive'ivauda Keliso taiadi ta miave'itubama bega Yaubada yana nuanua 'atumaidi ta na 'idumwebikedi. Yana nuanuananidi nagami i 'idewadi bega yada mia 'waidie bani'odi ta na vevesauluvedi.
Tovetumagana matatabuda 'ada 'aila'a 'aitamogana Keliso 'waineye
11 'Omi kumanimiavo kebu me Diu, yami mia nagami, 'wa na nuani. Basenadi 'ima me Diu 'a awavesakoyemi 'a vo, Yaubada yana tugusa bunu 'aibobo kebu 'wa da 'ewaiga, bega 'omi kebu Yaubada yana tomotoga.” Tugusanina tomotoga nimadiega i 'idewai, tomogodi 'aisedi faifaidi. 12 Tutuyanina 'waineye kebu Keliso taiadi 'wa da miave'itubama, 'wa mia'iaweni. Wata 'omi kebu Yaubada yana tomotoga me Diu bani'odi, 'omi tulimi mali tomotoga. Basenadiotoga Yaubada 'ima me Diu i venua'ivinema yana veakutagona 'ana vona'awaufaufa i 'idewai 'ima 'aisema 'ama 'ita'ita'i faifaina, we'e 'omi kebu. Yami mia fwayefwayeye kebu yami Yaubadaga, wata kebu 'wa da vetumagana 'ami 'ita'ita'i faifaina. 13 Vona mogitana, 'ani'ieogose 'wa miamia Yaubada 'wainega, we'e tutuya de'e Keliso dayagina i ilolo faifaimi, Yaubada i miemi lilivaneye bega 'wa miave'itubama Iesu Keliso taiadi.
14 Basenadi me Diu wata mali tomotoga kumanidiavo kebu Diu ta veve'idi'idi 'wa da vo nuasako i da bibineda. Siwe Keliso i mai yana wafa 'wainega nuasakonina i geuya nika veiana i souyeni, 'ida 'aila'a 'aitamogana. Keliso tauniotogina 'ada Toveiana mogitana, 'wainega matatabuda ta mia 'atumaina. 15 Kol 2:14Wata Keliso yana wafa 'wainega, me Diu yama veimea, ve'etoboda wata awave'eda'eda i mai Mosese 'wainega i venani-'avo'avovo, bega yadi toketokena i 'ivemweadi, 'ima me Diu wata 'omi mali tomotoga Keliso i luvetubamida ta veiana nika 'ida 'aila'a 'aitamogana. 16 Kol 1:20Basenadi 'ima wata 'omi Yaubada 'ana gaviavo, siwe Keliso i wafa 'ai lagalagana 'waineye nika ta luvetubama, Yaubada taiadi ta veiana. Wata yana wafanina 'wainega ve'idi'idi matatabuna i geuya. 17 Ais 57:19Tutuyanina Keliso i mai, Vala 'Atumaina veiana faifaina i lau'age tomotoga matatabuda 'waideye, 'omi mali tomotoga Yaubada 'wainega 'wa mia 'ani'ie wata 'ima me Diu 'a miamia Yaubada lilivaneye. 18 Fai bani'odi Keliso i veianeda, bega 'ima me Diu wata 'omi mali tomotoga 'ada fata ta na lukuluku Tamada Yaubada 'waineye 'Anu'anununa 'aitamogana 'wainega.
19 Fai Keliso i luvetubamida, 'omi kebu tulimiga wata 'omi kebu wakawaka, tutuya de'e 'wa luku Yaubada yana 'Aila'a 'waineye, matatabuda yana tomotoga mogitana. 20 'Ida Yaubada yana 'Aila'a, yana vanuga bani'odi. Keliso kumanina vanuganina 'ana 'unututu, we'e tomata'aulelevo wata tolu'ivonavo bani'odi 'ana 'ogola. 'Ida Yaubada yana 'Aila'a vanuganina 'ana folova, 'wainega i 'aiyogona. 21 Keliso vanuganina matatabuna i 'ivefa'ali, yana toketokena 'wainega i vevebwaika i na nagoga nika Vanuga 'eba Velu'ui magemagetana 'Auvea faifaina i na souyeni. 22 'Omi me Efeso wata tovetumagana 'ifwaidi taiadi, Keliso i luluvetubamida bega 'ida Yaubada 'Anu'anununa yana 'eba mia.