6 Iesu 'aila'a i vonedi fwayefwayeye i vemiamiabui. Mulieta 'ani'aninidi 7 i 'ewadi, i vekaiwa Yaubada 'waineye, i 'a'avana i 'ivividi bega yana tovetutuyamavo i veledi 'aila'a i veutadi. 7 Wata 'adi igana siaidi 'ifwaidi faifaidi Iesu i vekaiwa i 'a'avana yana tovetutuyamavo i veledi wata bani'odi tomotoga i veutadi. 8 Matatabudi i 'ani, 'adi fata, mulieta yana tovetutuyamavo tomotoga nikilidi i va'augidi, bayawa bwaikidi 7 i veadagidi. 9 Mulieta Iesu tomotoga i vonedi i nagoi yadi vanuge. To'aninidi iaveta tulai'avadi i lu'iawawadi 'adi 'aila'a bani'odi 4,000, we'e vevine tulaidi wata yavayavava kebu taiadi i da lu'iawawadiga. 10 We'e Iesu ma yana tovetutuyamavo i dodoga wakeye i nagoi 'awalawa Dalimanuda 'waineye.

11 Mad 12:38; Luk 11:16Diu totafalolo Falisi 'ifwaidi i maia Iesu 'waineye taiadi i ve'ikwayekwayega. Nuanuadi i na silubuya bega i vo, Nuanuama tamu 'eba nuavogana wata 'eba nua'ewa 'u na 'idewai bega 'a na 'asetamu ma yamu veimea Yaubada 'wainega.” 12 Mad 12:39; Luk 11:29Iesu i veyawaitunatunagi i vonedi i vo, 'Omi tutuya de'e 'ana tomotoga, awale nuanuami 'eba nuavogana wata 'eba nua'ewa a na 'idewai? Kebu, a vona mogitana 'waimie, kebu tamu 'eba 'isa a na 'idewai 'omi 'aila'animi 'waimie.” 13 Bega i 'iawedi yana tovetutuyamavo taiadi i dodoga wakeye i damana lavu vi'ainega.

14 Tovetutuyamavo nuadi i fani kebu tamu 'ani'ani i da 'ewai, we'e wakeye beledi 'aitamogana. 15 Luk 12:1Iesu vona-awatabaiega i velu'ase'asedi bega tomotoga sakoidi yadi sauluva kebu i na tunuvedamanidi i vo, Taunimi 'wa na 'i'isave'avinimi i na nunago totafalolo Falisi yadi isita wata Kini Elodi yana isita i na vedamanimi i na 'ivesakoimi.” 16 'Aise'avadi i veifufu i vo, Isita*Isita falawa matatabuna 'waineye i na susula, bani'odi walabo 'aluna, 'ai'edi i na 'anibiai 'aisayanina matatabuna i na 'ivesakoi. beledi 'ana 'eba 'ivebwaika, bani'odi i voneyediga fai 'ida beledi kebu ta da 'ewadiga.”

17 Yadi vonanina Iesu 'akonadi i 'asetai begaidi i vo, Awale 'wa ve'ivonavona 'ani'ani kebu ta da 'ewadiga faifaina? We'e nuami tabodadi. Voke yami nuanua bola kebu i da magetaiga wata kebu 'wa da 'asetai. 18 Iel 5:21; Isi 12:2; Mak 4:12Ma matami siwe kebu 'wa da 'iseni wata ma tanigami siwe kebu 'wa da nogai. Yau ma yaku toketokena we'e voke nuami i fani. 19 Tutuyanina 'ani'ani 5 a 'ivividi tomotoga 5,000 faifaidi, nikila 'wa va'augidiga 'aivia bayawa 'wa veadagidi?” I tutula i vo, 'Adi 12.” 20 Wata i vo, 'Ani'ani 7 a 'ivividi tomotoga 4,000 faifaidi, 'aivia bayawa 'wa veadagidi nikilayega?” Tovetutuyamavo i vo, 'Adi 7.” 21 Iesu i vo, 'Omi bola kebu 'wa da 'asetaiga.”

22 Iesu ma yana tovetutuyamavo i maia Bedasaida, tamu tomatasako i mieni 'waineye, i velu'ui nuanuadi i na 'abitonovi bega i na ve'atumai. 23 Iesu tomogo nimaneye i 'abi 'atamanayega i naweni tulineye. Mulieta Iesu tomogo matana i kiwalidi i 'a'avana nimana i yatoi tomogoneye i voneni i vo, 'Amu sala ava'ai 'u na 'isedi?” 24 Tomogo 'i'isanago i vona i vo, Tomotoga a 'ise'isedi siwe 'adi 'isa 'wa da vo bani'odi welavi i da 'anigogogonidi.” 25 Iesu nimana i yato-vaitugani tomogonina mataneye nika matana i ve'atumai i 'isadewa. 26 Iesu i voneni bega i na nago yana vanuge wata i vo, Kebu 'u na lu'ivona 'atamane.”

27 Mulieta Iesu ma yana tovetutuyamavo i tauya i nagoi 'atamana 'ifwaidi 'waidie, 'awalawa Sisalia Filifai nageneye. I nunagoi 'edeye i velutoliedi i vo, 'Wa da nogaiga tomotoga yadi nuanua yau aitoi?” 28 Mak 6:14-15; Luk 9:7-8Tovetutuyamavo i vo, Tomotoga 'ifwaidi i vonaga 'omu Ioni Tobafitaiso wafayega i yawasa, 'ifwaidi i vonaga 'omu Ilaitia abamayega i obuma, we'e 'ifwaidi i vonaga 'omu tamu Yaubada yana tolu'ivona wafayega i tovoi.”

29 Ion 6:68-69Iesu i vonedi i vo, We'e 'omi, 'wa da nuani yau aitoi?” Fita i vo, 'Omu Keliso,†Keliso 'asa'aiana Yaubada 'ana Venua'ivina, tamu 'ana saivila Mesaia. Yaubada 'ana Venua'ivina.” 30 Bega Iesu yana tovetutuyamavo i talabodedi i vo, Kebu tamu aitoi 'waineye 'wa na lu'ivonaga yau Keliso, Yaubada 'ana Venua'ivina.”

31 Tutuyanina 'waineye Iesu i velamu i kiavemageta yana tovetutuyamavo 'waidie naninidi 'awaie i na souyediga 'waineye i vo, Yau a vetomotogaotoga i lubwaineku veviga fuedi a na veluagadi. Me Diu yada to'edakumeta 'au'auveadi, tovelomu yadi to'edakumetavo wata ve'etoboda 'adi tovevo i na vedumwe'ai'aieku mulieta i na luvewafaku siwe 'aiata 'ana vetonu 'waineye Yaubada i na sivetovoiku.” 32 De'e bani'odi Iesu i voneyediga i vonaotoga. Fita Iesu i voneni i vaganago 'aisedie, i toke i talabodebodeni i vo, Kebu bani'odi taunimu 'u na faliwafewafemu.” 33 Iesu i sivilai yana tovetutuyamavo i 'isedi bega Fita i talabodeni i vo, 'U vaganago, yamu nuanuananina Seitani yana nuanua. Wata tomia fwayafwaya yadi nuanua, kebu Yaubada 'wainega.”

34 Mad 10:38; Luk 14:27Mulieta Iesu 'aila'a wata yana tovetutuyamavo i goledi i nagoi 'waineye i vonedi i vo, 'Ai'edi aitoi nuanuana mogitana i na mai 'waikuye taiadi 'a na nagoga, nagami taunina yana nuanua i na bailedi. Fai i na vematayakeyakeku veviga bwaikina i na veluagai yau bani'odi a na veluagai. Voke i na wafa faifaiku yau bani'odi a na wafa 'ai lagalagana 'waineye. 35 Mad 10:39; Luk 17:33; Ion 12:25'Ai'edi aitoi yana mia 'ana 'atumaina i na ve'o'oleni, kebu nuanuana yawaina i na tauyeni faifaiku, taunina i na wafaotoga. We'e 'ai'edi aitoi yana mia 'ana 'atumaina wata yawaina i na tauyedi faifaiku wata Valaku 'Atumaina faifaina, mia 'atumaina wata miamia-vagaina i na veluagai. 36 'Ai'edi tamu aitoi fwayafwaya matatabuna 'ana kukua i na 'ewadi mulieta yawaina i na 'a'ava, ava'ai 'ana 'atumaina? 37 Kebu 'ana fata tamu nani 'wainega yawaina i na kimwanei. 38 'Asiau tomotoganidi yadi sauluva sakoidi wata Yaubada i vedumwe'ai'aieni. We'e 'ai'edi aitoi yau faifaiku wata Valaku 'ana lu'ivona faifaina i na bunumayaga, yau a vetomotogaotoga yaku vila-vaitugana 'waineye wata a na bunumayageni. Yaku vila-vaitugana 'waineye, anelose magemagetadi taiadi 'a na maia, Tamaku yana mageta mataududulina nageneye.”