13
Luyavuyavulagi 'ana vona-awatabai
(Malika 4:1-20; Luke 8:4-15)
1 Mulieta 'aiatanina 'waineye Iesu vanuga i 'iaweni i nago balebaleye, bei i miabui i na ve. 2 Luk 5:1-3'Aila'a bwaikina i maia i tovififineni begaidi wakayega i talalaka we'e tomotoga lelege i tovoi. 3 Nani fuedi faifaidi i ve 'waidie vona-awatabaiega i vo,
Tamu tomogo i nago bakule yana witi*Witi 'ana 'isa'isa bani'odi laisi. waifeidi i na bakulidi, we'e yadi sauluva luyavuyavulagi. 4 Yana luyavuyavulagi 'waineye witi 'ifwaidi i ve'anita'idi 'eda balebaleye tomotoga yadi 'eba nago 'waineye, mulieta manuga i mai i 'anidi. 5-6 'Ifwaidi i ve'anita'idi bwakebwakeye, nagami i tabo-matayo'o fai fwayafwaya kebu badubadunaga. Siwe tutuyanina inala i kabu i 'awagi'adi fai 'walamidi kebu i da vagaobuga. 7 'Ifwaidi i ve'anita'idi 'awanavenaveye kebu 'adi 'oiga, i ugawegawedi. 8 We'e 'ifwaidi i ve'anita'idi inageye fwayafwaya 'atumaina 'waineye i tabo i vuaga. Witi 'ifwaidi vuagidi 100, 'ifwaidi 60 wata 'ifwaidi 30.” 9 Wata Iesu i vo, Veifufu de'e 'wa nogaiga, 'wa na venua'ivineni nika 'wa na 'asetai.”
Vona-awatabai lamuna
10 Mulieta Iesu yana tovetutuyamavo i maia 'waineye i velutolieni i vo, Awale 'u veve tomotoga 'waidie vona-awatabaiega?” 11 Bega Iesu i vonedi i vo, 'Akonadi Yaubada i tauyemi nani fuedi givagivadi 'wa 'asetadi yana veimea tomotoga 'waidie faifaina, we'e de'e tomotoganidi kebu. 12 Mad 25:29; Mak 4:25; Luk 8:18,19:26Egavo yaku ve i na vinenegeni wata i na venua'ivineni, yadi 'aseta Yaubada i na 'imoso'ieni bega yadi 'aseta i na vebwaika, we'e egavo kebu i da nogaya-dewai yadi 'aseta siaina Yaubada i na elodi. 13 Avinodi tomotoganidi i 'ise'iseni siwe kebu i da 'isa'inanaiga wata i noganogai siwe kebu i da nogaya-dewai 'alo i da 'asetai, begaidi a veve 'waidie vona-awatabaiega. 14 Ais 6:9-10Nika Yaubada yana tolu'ivona Aisea yana vona-samula 'ana mogitana i souyeni, Yaubada i vo,
Yaku vona 'wa na noganogai
siwe kebu nuami i na magetadi.
Naninidi a 'i'idewadi 'wa na 'ise'isedi
siwe kebu 'wa na 'isa'inanadi.
15 Fai tomotoganidi nuadi i 'ivetabodadi.
Tanigadi i 'ibodadi
bega kebu 'adi fata yaku vona i na vinenegeni.
Matadi i 'uludi
bega kebu 'adi fata naninidi a 'i'idewadi i na 'isedi.
We'e 'ai'edi mogitana i da 'isa'inana
wata i da nogaya-dewa,
nuadi i da magetadi,
i da nuaviladi i da mai 'waikuye,
nika a da 'ive'atumaidi.’
16 Luk 10:23-24 Yaubada yana vonanina tomotoganidi faifaidi, we'e 'omi 'eba sosoana 'waimie fai taunimi matamiega 'wa 'ise'iseni wata taunimi tanigamiega 'wa noganogai. 17 A vona mogitana 'waimie basenadiotoga Yaubada yana tolu'ivonavo fuedi wata tomotoganidi yadi sauluva tonovidi, nuanuadi bwaikina yaku folovanidi 'wa 'ise'isediga i da 'isedi wata yaku ve 'wa noganogaiga i da nogai, siwe kebu.”
Vona-awatabai Iesu i kiavemagetai
18 Wata Iesu yana tovetutuyamavo i vonedi i vo, A na vonemi, luyavuyavulagi 'ana vona-awatabai 'ana kiavemageta side bani'odi. 19 Waifei i ve'anita'idi 'eda balebaleye 'ana nuanua, bani'odi tomotoga vona i nogai Yaubada i na veimeyedaga faifaina, siwe kebu i da 'asetaiga. Bega Seitani, kumanina Tosakona i mai tolau'age waifei i bakuli yadi nuanua 'waidie i elodi. 20 Waifei i ve'anita'idi bwakebwakeye 'ana nuanua side bani'odi. Tomotoga ma yadi sosoana Yaubada yana Vona i nogai siwe yadi nuanua 'waidie kebu mogitana i da lukuga. 21 I vetumagana siwe tutuya 'ale'usana. Tutuyanina vita 'alo ve'isakololo i na souyedi Vonanina faifaina, i na baila-matayo'oyeni. 22 Waifei i ve'anita'idi gaweye 'ana nuanua side bani'odi. Tomotoga Yaubada yana Vona i nogai siwe yadi mia faifaidi i vevenuafouviga wata 'ai'aiwabu 'adi nuanua 'waidie bwaikina, 'wa da vo Yaubada yana Vona i da ugawegaweni kebu i da vuaga. 23 We'e waifei i ve'anita'idi inageye fwayafwaya 'atumaina 'waineye 'ana nuanua side bani'odi. Tomotoga Yaubada yana Vona i nogai, i nuave'avini wata i 'asetai mulieta yadi folova Yaubada faifaina bani'odi i vuaga, 'ifwaidi 100, 'ifwaidi 60 wata 'ifwaidi 30.”
'Atumaidi wata sakoidi taiadi i tabowanawana
24 Wata Iesu i ve tomotoga 'waidie tamu vona-awatabai 'wainega, tomotoga 'atumaidi wata sakoidi faifaidi i vo, Yaubada yana veimea tomotoga 'waidie side bani'odi. Tamu tomogo witi waifeidi 'atumaidi i bakulidi. 25 Tamu lovana, tomotoga matatabudi i 'eno'enovi, 'ana gavia i mai matagawagawa witi 'ana 'isa'isa bani'odi i luyavuyavuleni nika i tauya.
26-27 Tutuyanina witi i vebwaika i adaga matagawagawa i vemageta bega tonibakula yana tofolovavo i 'iseni i mai i voneni i vo, 'Auvea, nagami waifei 'atumaidi ta bakulidi we'e gawa ava'aiega i mai?’ 28 Tonibakula i vo, Tamu 'aku gavia i 'idewai.’ Bega yana tofolovavo i velutolieni i vo, Bani'odi yamu nuanua, 'a na luabuabudi?’ 29 Yadi 'auvea i vo, 'Asa'aiana, 'ai'edi 'wa na luabuabudiga, bola witiotoga taiadi 'wa na siabudi. 30 'Wa bailedi, i na tabowanawana, bola 'aiala 'ana tutuye to'aiala a na vonedi a na vo, Nagami matagawagawa 'wa na luabuabudi 'wa na 'itavidi 'wa na tawedi 'aie i na 'alaidi, we'e witiotoga 'wa na vedodogidi yaku bubuwakeye.’ ”
Yaubada yana veimea tomotoga 'waidie yana vebwaika 'ana vona-awatabai
(Malika 4:30-34; Luke 13:18-21)
31 Wata Iesu i ve 'waidie vona-awatabaiega i vo, Yaubada yana veimea tomotoga 'waidie yana vebwaika side bani'odi. Tamu tomogo 'ayawana bilana i 'ewai i bakuli mulieta i vebwaika. 32 Bilanina siaina siwe tutuyanina i vebwaika welavi bwaikaotogina bega manuga i mimaia didineye i vevegiuva.”
Yaubada yana veimea tomotoga 'waidie yana susula 'ana vona-awatabai
33 Wata Iesu i ve 'waidie vona-awatabaiega i vo, Yaubada yana veimea tomotoga 'waidie yana susula side bani'odi. Tamu vavine falawa bwaikina i vilai mulieta isita i yatoi, i susula falawa matatabuna 'waineye nika i vebwaika.”
34 Tutuya fuedi Iesu i veve tomotoga 'waidie vona-awatabaiega, kebu tamu tutuya i da vonaotoga. 35 Sam 78:2De'e bani'odi i vevega nika tamu Yaubada yana tolu'ivona yana vona 'ana mogitana i souyeni. Basenadiotoga i vona-samula Yaubada 'ana Venua'ivina yana vona faifaina i vo,
Vona-awatabaiega a na veifufu 'waidie.
Nani fuedi givagivadi fwayafwaya 'ana 'idewavau 'wainega
i maiga 'asiau, a na lu'ivoneyedi 'waidie.”
Matagawagawa 'ana vona-awatabai Iesu i kiavemagetai
36 Yana ve i 'a'avana, Iesu 'aila'a i 'iawedi i nago vanuge. Mulieta yana tovetutuyamavo i maia i luku 'waineye i voneni i vo, Nuanuama 'a na 'asetai matagawagawa i taboga bakule 'ana nuanua.”
37-38 Iesu i vo, Tomogonina waifei 'atumaidi i bakulidiga 'ana 'aseta yau, kumaniku a vetomotogaotoga. We'e tanoga, fwayafwaya matatabuna. Waifei 'atumaidi 'adi 'aseta tomotoganidi 'akonadi taunidi i tauyedi Yaubada 'waineye i veveimeyedi, we'e matagawagawa kumanidiavo Seitani yana 'aila'avo. 39 Tomogonina matagawagawa 'ana toluyavuyavulagi taunina Seitani, tutuya 'aiala 'ana 'aseta Vonayavuga 'ana tutuya, we'e to'aiala taunidi anelose.
40-41 Matagawagawa i luabuabudiga i tunudi i 'alaidiga 'ana 'aseta side bani'odi. Fwayafwaya 'ana 'eba ve'a'ava 'waineye, yau a vetomotogaotoga yaku anelosevo a na vetunedi, tovetalaimiimila wata 'ifwaidi tosakona i na va'augidi i na nawedi bega kebu wata i na miamia Yaubada mataneye. 42 I na nawediga i na tawedi 'ai-'ala'alase, bei i na 'we'we'wela wata maigidi i na yuyuyudi fai veviga bwaikaotogina. 43 Egavo yadi sauluva tonovidi Yaubada mataneye 'awaie Tamadi yana 'Eba Veimea nageneye 'adi 'isa magemagetadi, 'wa da vo inala i da vulaoga.
Veifufu de'e 'wa nogaiga, 'wa na venua'ivineni nika 'wa na 'asetai.”
Yaubada yana veimea tomotoga 'waidie 'ana 'atumaina 'adi vona-awatabai
44 Wata Iesu i ve 'waidie i vo, Yaubada yana veimea tomotoga 'waidie 'ana 'atumaina side bani'odi. Basenadi tamu tomogo mani wata 'ai'aiwabu bwaikina i tavuni fwayefwayeye. Mulieta tamu tomogo i veluagai, wata i tavu-vaitugani. I sosoana-'afo'afo, i nago yana kukua matatabuna i vekimwaneyedi tutulidi i 'ewadi, fwayafwayanina i kimwanei bega yana fwayafwaya fai 'ana 'atumaina nageneye i 'eno'eno.”
45 Wata Iesu i vo, Egavo taunidi i tauyedi bega Yaubada i na veveimeyedi yadi sauluva side bani'odi. Tamu tomogo i lalauala nuanuana mwali bwaikina wata 'atumaiotogina. 46 I na veluagaiga yana kukua matatabuna i na 'anivelenedi bega mwalinina i na tuveobuya.”
Tutuya 'eba ve'a'ava 'ana vona-awatabai
47-48 Wata Iesu i ve 'waidie vona-awatabaiega i vo, Yaubada yana veimea tomotoga 'waidie tutuya 'eba ve'a'ava faifaina side bani'odi. Tovuata igana tulina tulina i 'onadi, tutuyanina yadi vuata i adaga i yo'ei 'avale bei i lauvisi igana 'atumaidi yadi venuane i vedodogidi, sakoidi i tawedi. 49-50 Wata bani'odi, bola tutuya 'eba ve'a'ava 'waineye, anelose i na nagoi tomotoga sakoidi i na va'augidi tomotoga 'atumaidi 'awasasadiega i na tawedi 'ai-'ala'alase, bei i na 'we'we'wela wata maigidi i na yuyuyudi fai veviga bwaikaotogina.”
51 Tutuyanina Iesu yana ve i 'a'ava, yana tovetutuyamavo i velutoliedi i vo, De'e vona-awatabainidi matatabuna 'wa 'asetadi 'alo kebu?” I vo, E'e 'a 'asetadi.” 52 Bega Iesu i vo, 'Ai'edi ve'etoboda 'adi tove taunina i na tauyeni bega Yaubada i na veveimeyeni, kumanina bani'odi tomogo 'ai'aiwabuna. Fai Yaubada yana Vona tuatuaidi wata yaku ve 'ivaudi i 'asetadi, 'ana fata mali tomotoga 'waidie i na veve.”
Me Nasaledi kebu nuanuadi Iesu
(Malika 6:1-6; Luke 4:16-30)
53-54 Iesu vona-awatabaiega i ve i 'a'ava, i tauya i nago taunina yana 'atamane Nasaledi. Bei i ve tomotoga 'waidie yadi 'eba miava'auta nageneye siwe nuadi i voganidi yana ve faifaina. I vo, Ava'ai tomotoga de'e? Ava'aiega yana nuamageta i 'ewai, bani'odi i munega 'eba nuavogana wata 'eba nua'ewa i 'i'idewadi? 55-56 Tomogo no'o kebu tulinaga, tamana to'aiyogona, inana Meli wata tainavo ta 'asetadi, Iemesa, Iosefa, Saimoni wata Iudasa wata novunavo taiadi ta miamiani. We'e yana 'asetanidi wata yana toketokenanina ava'aiega i veluagadi?” 57 Ion 4:44I bavuyeni begaidi i baila, kebu nuanuadi Iesu. Bega Iesu i vonedi i vo, Yaubada yana tolu'ivonavo ma 'adi ve'ililibu tomotoga tulidi 'waidie, we'e taunidi yadi 'atamana 'ana tomotogavo wata yadi 'aila'avo kebu i da ve'ililibuyediga.” 58 Fai kebu i da vetumagana Iesu 'waineye, begaidi kebu bei 'eba nuavogana wata 'eba nua'ewa fuedi i da 'idewadiga.