IEMESA
Iemesa yana kiluma Yaubada yana 'Aila'a 'waidie
'Eba kiavemageta
Lubulubu de'e 'ana tokiluma 'ana wagava Iemesa. To'aseta fuedi yadi nuanua Iemesa kumanina Iesu taina. I kilumiga Yaubada yana 'Aila'a kumanidiavo taunidi i tauyedi Iesu Keliso 'waineye, faifaidi. 'Aila'anidi vita i veveluagadi Keliso 'ana tovedumwe'ai'ai 'waidiega begaidi i miave'eve'e'elagi fwayafwaya matatabuna 'waidie. 'Atamana fuedi 'waidie i miamiani bani'odi wakawaka we'e Iemesa, tovetumaganavo i miamianiga Ielusalema 'adi to'edakumeta bwaikina. (Folova 15:13, 21:18)
Lubulubu de'e nageneye, sauluvanidi 'ida tovetumaganavo 'ada laubwaina faifaidi i veifufu. Wata i tolinuata'i 'waideye bega yada sauluva 'waidiega yada vetumagana ta na sivemagesedi. Vetumagana ma 'ana 'eba 'isa, kebu vona'ava i lubwaineni wata folova taiadi. Lubulubu de'e 'ana 'idi side bani'odi.
Vona-vekaiwa. 1:1
Vita 'waidie ta na sosoana wata ta na vetumagana. 1:2-8
Vewekowekoma wata ve'ai'aiwabu faifaidi. 1:9-11
Vetoketoke 'eba sailubu 'waidie. 1:12-18
Kebu nogaya'ava wata vematayakayaka taiadi. 1:19-27
Kebu ta na lau'idi tomotoga 'adi 'isa 'waidiega. 2:1-13
Kebu vetumagana'ava, wata folova. 2:14-26
Meada ta na 'isave'avinidi. 3:1-18
Fwayafwaya 'ana nuanua sakoidi wata Seitani yana nuanua sakoidi ta na vetoketoke-'iawedi. 4:1-5:6
Yada tokemaiga wata yada vetumagana 'waidie ta na tovotovoi fa'alina. 5:7-20
1
1 Mad 13:55; Mak 6:3; Fol 15:13; Gal 1:19Yau Iemesa, Yaubada wata Toveimea Iesu Keliso yadi tofolova, a vekaiwa 'omi Keliso 'ana tovetumaganavo 'waimie. Kumanimiavo me Isileli wauma 12 'waidiega 'wa mia-ve'eve'e'elagi fwayafwaya matatabuna 'waineye.
Vetumagana wata nuamageta faifaidi
2-3 Ekwavo, 'ai'edi vita wata sailubu tulidi tulidi i na souyedi 'waimie, i lubwainemi 'wa na sosoana-'afo'afo fai vitanidi yami vetumagana 'adi 'eba kiavetoketoke. I na vetoketokega nika 'ami fata 'wa na tokemaigemi vita 'ifwaidi 'waidie. 4 Yami tokemaiganidi i na 'eno-vagata i na nagoga mulieta 'omi 'atumai'avami, yami nuanua kumagidi, kebu tamu ava'ai 'wainega 'wa na ve'ale'usa. 5 We'e 'ai'edi aitoi 'waimiega nuamageta 'wainega i na 'usaga, i lubwaineni i na velu'ui Yaubada 'waineye nika i na veleni. Nuamageta i na velenimo fai taunina 'ani'anivelenina tomotoga matatabuda 'waideye, kebu mokainaga. 6 Siwe tutuyanina 'wa na vevelu'uiga kebu 'wa na venuanaluga, ma yami vetumagana 'wa na nuani mogitana 'wa na veluagai. Egavo i vevenuanaluga 'wa da vo kaukau yagina i da bewebewedi wata i da fetofetodi. 7 Tomotoganidi kebu 'adi fata tamu ava'ai i na veluagai 'Auvea 'wainega. 8 Fai i vevenuanaluga Yaubada wata fwayafwaya 'ana nuanua 'waidie, wata nuadi a'wadi yadi sauluva matatabuna 'waidie, begaidi kebu tamu sai'afo ava'ai i na veluagai.
Tovewekowekoma wata tove'ai'aiwabu faifaidi
9 Tovetumagana i vewekowekomaga i lubwaineni ma yana sosoana taunina i na awa'ai'aia fai Yaubada i silakai, i vagavaia i luku yana 'Aila'a 'waineye. 10 Ais 40:6-7We'e tovetumagana i ve'ai'aiwabuga i lubwaineni i na sosoana fai Yaubada i kiaobuyeni nika i nuani yana 'ai'aiwabunidi nani-'avo'avovo Yaubada mataneye. Tove'ai'aiwabu matatabudi 'awaie i na 'a'ava 'wa da vo welavi ididi i da avuta. 11 Inala i na lakalakaga i na yayayata mosomoso ma idina i kukuve'awagi'ai i avuavuta, 'ana 'isa 'atumaina i 'ivesakoi. Wata bani'odi tove'ai'aiwabu i na folofolova yana 'ai'aiwabu 'waidie tomogonina i na 'awagi'ai nika i na 'a'ava.
Vetoketoke 'eba sailubu 'waidie faifaina
12 'Ai'edi aitoi 'eba sailubu i na veluagai siwe i na tovotovoi fa'alina 'eba sosoana 'waineye. I na vetoketokega mia 'atumaina wata miamia-vagaina i na veluagai, 'asa'aiana 'ana tutula. Tutulanina faifaina basenadi Yaubada i vona'awaufaufa 'ana tonuakalikali 'waidie. 13 'Ai'edi aitoi 'eba sailubu i na veluagai i na sakonaga faifaina, kebu i na vo, Yaubada i sisilubuku,” fai kebu 'ana fata Yaubada tamu sailubu i na veluagai sakona 'wainega wata taunina kebu tamu aitoi i da silubuya bega i na sakona. 14 Sailubu yana mai side bani'odi. 'Ai'edi tamu tomogo yana nuanua sakoidi i na vevenua'ivineni, i siloloi nika i nunaweni sakona i na 'idewai. 15 Yana nuanuananina sakoina i na vetoketoke, taunina i na tauyeni 'waineye nika i na sakona. Sakonanina nuana i na 'ewai bei i na sakosakona, i na nagoga nika tomogonina i na wafaotoga.
16 Ekwavo, taunimi 'wa na 'i'isave'avinimi i na nunago tamu aitoi i na vekaliemi. 17 Naninidi 'atumaiotogidi 'ada 'aivaita faifaina ta veveluagadiga, matatabuna i mai abamayega, 'ada nuakalikali. 'Ada tonuakalikalinina Yaubada, taunina abama 'ana mageta 'adi to'idewadewa, kebu i na vetuli. Inala i na lakaga nagami welavi 'wa'una bwaikina, we'e i na yayayataga 'wa'unanina i na vevesiai. Yaubada kebu bani'odi 'ai'wa'u, 'ana 'isa'isanina wata yana nuanua 'waideye 'asa'aiana bani'odi i na 'eno-vagata kebu i na vetuli. 18 Fai nuanuana mia 'ivauna wata 'atumaina i veleda yana vona tonovina 'wainega, bega 'ana 'idewadewa matatabuna 'waidiega 'ida ta kumeta.
Yaubada yana Vona kebu nogaya'ava
19-20 Ekwavo, a na vonemi 'wa na nuanuani. Kebu 'wa na veifufu-matamatayo'oga nagami 'wa na venua'ivina, we'e tomotoga 'ifwaidi i na veveifufuga bonadi 'wa na nogaidi. Wata bani'odi kebu yami nuasako i na waloga fai kebu 'ana fata nuasako 'wainega yada sauluva i na tonova Yaubada mataneye, nuanuana yada sauluva 'atumai'avana. 21 Fai nuanuana yada sauluva i na tonova, sakona tulina tulina wata bunu 'ana nuanua sakoidi 'wa na bailedi, ma yami nuaobu taunimi 'wa na tauyemi Yaubada 'waineye bega yana Vona i yatoiga nuamie 'wa na vematayakeyakeni, Vonanina 'ana fata i na 'ita'ita'iemi.
22 'Ai'edi Yaubada yana Vona 'wa na nogaimo, taunimi 'wa na vevekaliemi, we'e mogitana ava'ai i vonemiga 'wa na 'i'idewadi. 23 'Ai'edi aitoi i na nogaimo we'e kebu i na 'idewai, taunina bani'odi tamu tomogo taunina maigina 'ana 'isa i na 'iseni nigo'ita 'waineye. 24 I na 'isenimo siwe kebu tamu ava'ai i na 'idewaiga i na nago nika 'ana 'isanina nuana i na fani. 25 We'e 'ai'edi aitoi Yaubada yana Vona i na 'i'isadewai, faifaina i na vevenua'ivina nika kebu nuana i na fani. I na 'i'idewaiga, nika wata Yaubada i na vevesauluva 'atumaina 'waineye. Yaubada yana Vonanina veimea tonovina, 'wainega i yavuda bega ma yada sosoana ta vevematayakeyakeni.
26 'Ai'edi aitoi yana nuanua 'waineye i na vo, Yau tovetumagana,” siwe meana kebu i na veveimeyeniga vekaliega i na veveifufu, yana vetumagana nani-'avo'avovo wata taunina i vevekalieni. 27 'Ai'edi aitoi yana vetumagana tonovina wata 'atumaina Yaubada Tamada mataneye, side bani'odi i na vevesauluvedi. Fovafova wata 'wabu'wabulavo vita i veveluagadiga i na 'i'ivaisedi wata taunina i na 'i'isave'avini, bega sakona kebu i na damana 'waineye Yaubada 'ana tovedumwe'ai'ai 'waidiega.